Koreaki Iroum
Kouru ibukin te Bwabetito
N Nobembwa 2019, I ongora nakon ana maroro Unimwaane Gong are te Face to Face botaki ibukiia Ataei ao Kairake ma au utu. Imwiina, bitiobi e anganiira bokinreirei bwa ti na kanga n mwakuri nakon ara kouru.
Au moan kouru bwa N na kabanea n wareka ana Boki Moomon imwain koron waniua au ririki bwa katauraoau imwain au bwabetito. I a kaman waaki n warekia ma e aki rangi n unga nanou. Ma n te bong anne, I karaoa au babaire ma tamau. Ti nooria bwa iraua te mwakoro ae N na riai n warekia ni katoa bong bwa e aonga ni bane ana boki Moomon imwain au bwabetito. I moana au wareware ni katoa bong ao ni mwakenna ngkana e bane teuana te mwakoro.
Ngkai I wareware, I tangiria ni karaoi baika a tamaroa. Ngaia are I a iira te aki mamatam ni kabutaa te aonnaba are e katanoataa Beretitenti Nelson bwa buokan te aoraki are te COVID-19. I kukurei ngkai I kona n karaoa au aki mamatam ae bwanin. Au karo naba a kaungaai bwa N na tataro ao n aki mamatam bwa I aonga ni karekea au koaua i bon irou n ana Boki Moomon ao te bwabetito.
N moan Tabatin Meei, I tataro ao n aki mamatam. E aki maan imwiina, e a bane n warekaki Ana Boki Moomon ni kabanea. I bon ingainga nakon au bwabetito - are e na boo n au bong ni bung. I namakinna bwa I tauraoi ni karaoa te berita ae tabu ma te Atua! I ataia bwa ana Boki Moomon e bon koaua. I tatangiria n warekia, ao I kukurei ngkai ea tia n koro nanon au kouru aio rinanon aia ibuobuoki kain au utu.
Kamatata n te tamnei iroun Rosalie Ledezma