Taian Bwaeoniia ni Katoai Aba
Ana biano Ludovic
E rangi ni kukurei Ludovic n beku ibukin te Tama are i Karawa.
E rikoi kaintekateka ake a rurukumaki Ludovic ao n uotii nako iteran te kawai. Bon te Tabati, ao iaon kawaina n waaki te taromauri. Te auti are e na boo iai te taromauri i Togo e bon aki tau kaintekatekana. Ngaia are Ludovic e bon uouotii kaintekateka man ana auti tibuna te unimwaane.
Bukin tera Ko kitana te umwantabu ae tamaroa ao n nakon te auti ae e uarereke? e titiraki temanna nakoina. Akea naba kaintekatekan ami umwantabu aei, e taku are temanna ni ngangarengare.
Ma e baka n aki ongo bwanaaia Ludovic. N na tii teimatoa ni karaoa ae e eti, e taku n ana iango.
E moan reiakina taekan te ekaretia ngke 10 ana ririki. Ngkai ai 12 ana ririki. A bon tibwa bwabetitoaki naba ngaia ma ana utu. E karekea te nakoanibonga ao e buoka kabutan te toa. E bon kaikoa naba ana mwane man boon kanana ni karekea iai te kariki ibukin te toa ni katoa wiiki. Ludovic E kukurei ni beku ibukin Tamana are i Karawa.
Ngke ea boo te tai ni waakina te taromauri, te ruu are uarereke ea onrake ngkai. Tabeman a tekateka iaon kaintekateka ake e uotii Ludovic. Tabeman a teitei.
E waaki te bootaki ma te anene ni kaukuki. “Israel, Israel, God Is Calling,” e anene Ludovic. E tatangiria n anene n te umwantabu.
Imwiin te taromauri, e anene inanona Ludovic ngke e riingii kaintekateka. E anene inanona ngke e tabe n okira mweengana. Ngkanne e a rio ana iango! E kaotinakoa ana biano are kanga te bwai n takakaro. Tao e na kona n reiakina i bon irouna te anene are “Israel, Israel, God Is Calling!
E anenei nootina inanona Ludovic ao n katangtangii kiingin ana biano nuaa e bon eti. E aki nang maan ao ea bon reiakinna i bon irouna te anene ae bwanin.
Ao ea uringnga are iai ana rawerawe ana utu iaon anene n taromauri. E ongoraeakin ao n reireinna ni katangii naba. E a kataneiai ma ea kataneiai Ludovic.
“E aera ko aki katangtang n te umwantabu ngkai ti anene?” E titiraki taman Ludovic.
E nako nanon Ludovic. “I rangi ni maama,” e taku. Ao ngkana arona bwa ea buretata naba?”
“Ngkanne kona bon teimatoa n reitinako,” e taku Tamana. “Bon te tia katang biano ngkoe ae ko mwaatai ma ko aki ataia.”
Te Tabati are imwiina, e aki tii uotii kaintekateka Ludovic. E uota naba ana biano are bon te bwai n takakaro nakon te umwantabu naba. Ngke ai tain te kaukuki n te anene, e katokai baina iaon ana biano ma te nako n nano. Imwiina ea waaki ni katangtang. A bane n iriiria n anene. Ao e bon rangi n tamaroa ongoraeakinana!
E a katangtang naba Ludovic n te taromauri ni katoaa te Tabati imwiin anne. Tabetai e buretata baina. Ma e aki bwara nanona. Ngkana e a rangi n kangaanga katangana, a bon anene n akean te biano, ma e kairaki te anene iroun Ludovic.
E moangare Ludovic. E aki kakawaki irouna ae e boo te taromauri n ana auti temanna. E aki naba kakawaki ae a kakanikoa aomata. Te bwai ae kakawaki bwa Ludovic e kabonganai ana tarena n beku ibukin te Atua.
Togo bon te aba ae uarereke i maeaon Aberika.
Ngkai, iai 21 uoote ao mwaanga ikekei.
Te taetae ae bwainaki iaon Togo bon te taetae n Buranti.
E reireinaki Ludovic iroun temanna te mitinare bwa e aonga ni kona n katanga te biano n ae tamaroa riki.
E a ikawai ngkai Ludovic. Buuna ma natina a kaai n tangira te katangtang.
Bon iai ngkai oin ana biano Ludovic ni mwengana ao e kakatanga naba te aokan n ana taromauri.
Kamataata n te tamnei iroun Carolina Garcia