Ibuobuoki ao te Tamnei ae Raoiroi
Ko kona n namakina te Tamnei ae Raoiroi imwain naba ae ko bwabetitoaki.
A uaia n nakonako Mateo ma tamana nakon aia mwakete n uaanikai. E bon iriia ana kamea Mateo, ae Zeus.
“Ko tuanga te bitiobi ibukin au bwabetito?” E titiraki Mateo. E kaman koro waniua ana ririki, ma e tuai bwabetitoaki ibukin te aoraki are e butinako.
“E taku bwa kona aki kona n bwabetitoaki n te namwakaina aio,” e taku Tamana. “Tao te namwakaina are imwiina.”
“E RAOIROI.” E mata n aki kukurei Mateo. E bon rangi ni kan bwabetitoaki ao n karekea te bwaintituaraoi ae te Tamnei ae Raoiroi. Ma e taraa n ae e na bon aki riki!
E kauka te tabo ni bobwai tamana. E ibuobuoki n uoti n otinako bwaokin te aoranti, remon, mwangkoo, ao banana. Ao e a manga ibuobuoki n katokai iaon taian shelves.
E tabe n iaiangoa te Tamnei ae Raoiroi Mateo inanon aia tai ni mwakuri. Tera raoi kanamakinan te Tamnei ae Raoiroi? e titiraki.
Te Tamnei ae Raoiroi e bon kabebeteai ngkana I nanokawaki, e taku tamana. “Ao e buokai n namakina ae raoiroi ngkana iai ae I buokia.”
“I a bon ingainga ni kan bwabetitoaki bwa I aonga n namakina naba te Tamnei ae Raoiroi!”
“Imwaain naba am bwabetito ao kamatoaam, ko bon kona n namakina te Tamnei ae Raoiro,” e taku Tamana. “Ko kona n namakina ana karaunano ngkai. N aekan ngkana ko tataro ke ni karaoa ae tamaroa nakon temanna. Imwiin kamatoaam, e kona n raoraoniko te Tamnei ae Raoiroi n taainako.”
E iangoa aio Mateo. E a tia n namakina te Tamnei ae Raoiroi mai mwaina?
E aki maan ao a bon bane aia bwaoki ni katokaaki. “Ko tauraoi n ibuobuoki nakoia Sosas?” E titiraki Dad.
E katoua atuuna Mateo. Mr. ao Mrs Sosa iai aia kangaanga n nanakonako. Ngaia are Mateo e nakon te mwakete ibukiia. N tabetaii ao e buokiia ni karaoi naba mwakuri.
Mateo ao Zeus a rianna nakon aia auti Sosas. E katioa baina Mrs. Sosa mai moan te auti. “Mauri n te ingabong aei!”
“Ko kainanoi kanam n te bong aio?” E titiraki Mateo.
“Eng. I kainanoa te kariki, te buteta ao te iriko maiu E warewarekii ana tianti Mrs. Sosa. “I taku bwa e tau anne.”
E anaa te mwane Mateo. E noora te baeki n maange irarikin te mataroa. I kona n uota n kaotinakoa anne ibukim? e titiraki.
“Eng. Ko rabwa!” E taku Mrs. Sosa.
Imwiin karenakoan te maange, e a uota te amwarake Mateo. E iangoi baike ea tia ni bane ni karaoi te ingabong anne. E buoka tamana n te mwakete n uaanikai. E buokiia Sosas n kabooa kanaia. Ao e bon iai te namakin ae tamaroa inanona. E bon namakina te Tamnei ae Raoiroi, n aron raoi are e taekinna tamana!
E kantaningaia Mateo bwa e na aki rangi ni maan taningaakin ana bwabetito. E tangiria bwa e na raonna te Tamnei ae Raoiroi n taainako!