Jipan̄ imJETŌB Kwojarjar
Kwomaron̄ en̄jake Jetōb Kwojarjar m̧okta jān am̧ peptaij.
Mateo im jemān rekar jim̧or etetal laļļo̧k n̄an jikin wia kake fruit eo an baam̧le eo aer. Kidu eo nejin Mateo etan, Zeus, ekar ļoor er.
“Kwar ke kajjitōk ippān bisop eo kōn peptaij eo aō?” Mateo ekar kajjitōk. Ekar rualitōk an iiō, ak ekar jan̄in peptaij kōn wōt ajedeed in nan̄inmej eo.
“Ekar ba kwoban maron̄ peptaij ilo allōn̄ in,” Jemān ekar ba. “Bolen allōn̄ in laļ.”
“EM̧M̧AN.” Mateo ekar mejān burom̧ōj. Ekar lukkuun kōņaan peptaij im bōk menin letok eo an Jetōb Kwojarjar. Ak āinwōt eban maron̄ kōm̧m̧an!
Jemān ekar kōpeļļo̧k jikin wia kake leen wōjke eo. Mateo ekar jipan̄ e bōki nabōj tōk bo̧o̧k in o̧ran , lemōn, māānko , im binana ko. Innem ekar jipan̄ likūti ilo jeļab ko.
Mateo ellakar ļōmņak kōn Jetōb Kwojarjar ke rej jerbal. “Ewi wewein en̄jake eo an Jetōb Kwojarjar?” ekar kajjitōk.
“Jetōb Kwojarjar ej kaeņōm̧m̧an eō n̄e ij burom̧ōj,” Jemān ekar ba. “Im ej kōm̧m̧an bwe en em̧m̧an aō mour n̄e ij jipan̄ juon armej.”
“Ijikijerjer aō peptaij bwe in maron̄ bar en̄jake Jetōb Kwojarjar!”
“Ilo tōre eo m̧okta jān am̧ peptaij im kapen, koj maron̄ wōt en̄jake Jetōb Kwojarjar,” Jemān ekar ba. “Kwomaron̄ en̄jake kaeņōm̧m̧an eo An kiiō. Āinwōt ilo am̧ jar ak jouj n̄an bar juon armij. Innem ālkin am̧ nej bōk kapen, kwomaron̄ en̄jake an Jetōb Kwojarjar pād ippām aolep ien.”
Mateo ekar ļōmņak kōn menin. Em̧ōj ke an kar en̄jake Jetōb Kwojarjar m̧okta?
Ejjab to ekar dedelok aerro eketto kobban bo̧o̧k ko aolep. “Kwopojak ke n̄an jipan̄ Sosas?” Jemān ekar kajjitōk.
Mateo ekar emajidjid. Mr. im Mrs. Sosa rekar jim̧or abūr aerro etetal. Kōn menin Mateo ekar etal n̄an m̧ōn wia n̄an erro . Jet iien ekar bar jipan̄ er kōm̧m̧ani jerbal ko.
Mateo im Zeus rekar etetal laļļo̧k n̄an m̧weo m̧ōn Sosa. Mrs. Sosa ekar kajutak pein n̄an er jān ettōņaak nabōj in m̧weo im̧ōn. “Iakwe in Jibbon̄!”
“Ewōr ke am̧ aikuj rainin? Mateo ekar kajjitōk.
“Aaet. Ij aikuj pilawā, potato, im beef.” Mrs. Sosa ekar bōni ļo̧k jāān jiddik ko an. “Enaj bwe jon̄an ne.”
Mateo ekar bōk jāān ko. Ekar lo juon pāāk in kobej turin kōjem̧ eo. “Imaron̄ ke juļo̧k kobej n̄an kwe?” ekar kajjitōk.
“Aaet. Kom̧m̧ol Tata!” Mrs. Sosa ekar ba.
Ālkin an kar juļo̧ki, Mateo ekar wia tok m̧ōn̄ā. Ekar ļōmņak kōn aolep men ko ekar kōm̧m̧ani jibbon̄ eo. Ekar jipan̄ Jemān ilo jikin wia kake leen wōjke eo. Ekar jipan̄ Sosas wia m̧ōn̄ā. Im ekar wōr juon an en̄jake em̧m̧an ilowa. Ekar en̄jake Jetōb Kwojarjar, āinwōt an Jemān kar ba!
Mateo ekar kōjatdikdik bwe eban kar aetok an kōttar n̄an an peptaij. Ekar kōņaan bwe Jetōb Kwojarjar eo en pād ippān aolep iien!
Kōmeļeļe jān Carolina Farías