Bainier ro ilo Aolep Āne Ko
Piano eo nejin Ludovic
Ludovic ekar m̧ōņōņō in jerbal n̄an Jemedwōj Ilan̄.
Ludovic kotaki jet jea ko me remaron̄ limi im bōki n̄an turājet in iaļ eo. Kar Jabōt men eo, im epaak an kar jino jar . M̧weo ijo rekar jar ie ilo Togo ekar jabwe jea ie. Kōn menin Ludovic ej kajorbōktok jea ko jān m̧weo m̧ōn jim̧m̧aan.
“Etke kwojaam maron̄ in kar etal jān juon m̧ōn jar em̧m̧an n̄an juon em̧ jidikdik bajjōk?” juon armej ej lam̧ōj ļo̧k n̄an e. “Kabun̄ ne am̧ jon̄an ejjeļo̧k jikin jijet ie!” bar juon armej ekar ba ļo̧k, ilo an ettōn̄.
Ludovic ekar āinwōt n̄e ejjab ron̄. Ij aikuj wōnm̧anļo̧k wōt im kōm̧m̧an ta eo ejim̧we, ekar ļōmņak.
Ludovic ekar jino ekkatak kōn Kabun̄ in ke ekar 10 an iiō. Kiiō ekar 12 an iiō. E im baam̧le eo an rej kab tin peptaij. E ekar kabwijer priesthood eo im ekar jipan̄ ajeje kwojkwoj eo. E ekar kakkoņ jet iaan jāān in m̧ōn̄ā in raelep ko an n̄an wia pilawā n̄an kwojkwoj eo kajjojo wiik. Ludovic ekar m̧ōņōņō in jerbal n̄an Jemedwōj Ilan̄.
Ke ekar iien̄ n̄an jino jar eo, ruum jidikdik eo ekar obrak. Jet armej rekar jijet ilo jea ko me Ludovic ekar bōktoki. Armej ro jet rekar jutak.
Kweilo̧k eo ekar jino kōn juon al. “Israel, Israel, God is calling,” Ludovic ekar al. Em̧m̧an ippān al ilo m̧ōn jar eo.
Ālkin jar eo, Ludovic ekar kōm̧m̧an ainikien al eo ke ej karōki jea ko. Ekar al ilo an kar etal n̄an m̧ōn jar eo. Innem ekar wōr juon an ļōmņak. Ekar jibwe nabōj tak kein ikkure eo an im ej piano keyboard. Bolen emaron̄ kar pukot kilen an kōjan̄ “Israel, Israel, God Is Calling”!
Ludovic ej kōm̧m̧an ainikien ņoot ko im ekar kōjan̄e kōn ki ko rokkotaktak m̧ae ekar jim̧we an kōm̧m̧ane. Ejjab to ekar katak kōjan̄e aolepān al eo.
Innem ekar keememej bwe baam̧le eo an rekar rekoote jet iaan al in jar ko an Kabun̄ in E ekar ron̄jakiim ekar ekkatak bar kōjan̄jan̄ al ko jet. Ludovic ekar kaminene im bar kaminene.
“Etke kwojjab kōjan̄jan̄ ilo m̧ōn jar n̄e jej jar?” Jemān Ludovic ekar kajjitōk ippān juon raan.
Ludovic ear jino an iruj lo̧jeen. “Ilukkuun ikūm̧kūm̧,” ekar ba. “N̄e ikōm̧m̧an bōd?”
“Innem kwonaaj wōnm̧anļo̧k wōt kake,” Jemān ekar ba. “Kwoj juon eo em̧m̧an am̧ kejan̄jan̄ piano jān jon̄an eo kwoj ļōmņake.”
Jabōt eo tok juon, Ludovic ekar jab ebbōktok jea wōt. Ekar bōk keyboard eo an n̄an m̧ōn jar eo. Ke ear iien n̄an kōpeļļo̧ke kōn al, ekar ikūm̧kūm̧ wōt im likūt addin pein ilo ki ko. Innem ekar jino kōjan̄jan̄. Aolep rekar al ippān kōjan̄jan̄ eo. Im elukkuun em̧m̧an ainikien!
Ludovic ekar kōjan̄jan̄ ilo m̧ōn jar eo kajjojo Jabōt ālkin iien eo. Jet iien ej kōm̧m̧an bōd. Bōtaab ekar jab bōjrak. Ke al eo ekar lukkuun pen kōjan̄e, rekar al kake ilo an ejjeļo̧k kōjan̄jan̄, im Ludovic ekar tōl al eo.
Ludovic ekar ettōn̄ dikdik. Ekar jab lukkuun aorōk n̄an e n̄e rej jar ilo bar m̧ōn juon armej. Ekar jab lukkuun aorōk an armej ro kōm̧m̧an kōjak kake. Ta eo eaorōk tata ej bwe Ludovic ekar kōjerbal taļōn eo an n̄an jerbal n̄an Anij.
Togo ej juon laļ edik ilo western Africa.
Rainin, ewōr 21 ward ko im branch ko ijeņ.
Kajin eo rej kōjerbal ilo Togo ej kajin French.
Juon mijinede ekar katakin Ludovic riiti no̧o̧t in al ko bwe en maron̄ em̧m̧anļo̧k an kōjan̄jan̄ piano.
Ludovic erūtto ļo̧k kiiō. E im lio pāleen, Benedict, rej jim̧or em̧m̧an ippāer kōjan̄jan̄ j.
Ludovic elōn̄ juon nejin make piano ilo m̧weo m̧ōn im ej kōjan̄jan̄ okōn ilo m̧ōn jar eo.
Kōmeļeļe ko jān Caroline Garcia