Taian Bwaeoniia ni Katoai Aaba
E Kaitibo Harriet ma Mitinare
E na kona ni manga kaitibo ma Papa?
Harriet e taraa tamnein Papa are e teke n oon te auti. Ai waniua te namwakaina imwin matena. E titiraki bwa e na bon kona ni manga nooria. E rang ni ururingnga.
Kaukia, kaukia, kaukia.
Harriet e kauka mataroan aia abatimenti. Uoman kairake n ataeinimwaane a tei itinaniku.
“Guten Tag! Mauri! Ngaira mitiranare man Ana Ekaretia Iesu Kristo ibukiia Aika Itiaki ni Boong aika Kaitira. Ti kan marooro ma ami utu n rongorongon Iesu Kristo.”
E wiingare Harriet. Iai te bwai ae a taekinna are e namakina iai te kukurei. “N na tuanga Mutti (Tinau).”
E roko iroun tinana. “Mitinare ake a tei imatan te mataroa,” e taetae. “A kan marooro ma ngaira iaon Iesu.”
E matanun tinau. “Tuangiia bwa ti tabe moa.”
“Ma kai a rang taraa n akoi,” e taku Harriet. “Ao e aki bati ni maan.”
E taraa te tai tinau. “E raoiroi. Ngaia ti na ongora tii teutana te tai.”
A rinnako mitinare ni marooro nakon tinau, Harriet, ao tarin Harriet ae Carment. A reirei taekan Iesu ao te boki ae arana das Buch Mormon, Ana Boki Moomon. Ao a katuka teuana te boki ibukin ana utu Harriet bwa ana warekia.
“Tao ti kona ni wareware iai,” e taku tinau, ngke e kauka te boki. Inanon boong ake imwina, e aki bwaka ana wareware tinau. E kabaibati ni wareki mwakoro tabeua nakoia Harriet ao Carmen.
Ngke ngkai e wareware naba iai Papa. E na bon tangiria e iango Harriet.
Ngke a manga roko naba mitinare, a reirei taekan ana babaire te Atua. “Ti maeka ma te Atua imwain ae ti bungiaki. Ti roko nakon te aonaaba bwa ti na reirei man riki n ai Arona. Ngkana ti mate, ti na manga Okiria.”
Ao tera aron Papa? E titiraki inanona Harriet.
Mitinare a taraa Harriet. “Ibukina bwa e mate Iesu ao e a mangauti, ti a kona n riki bwa te utu ae akea tokina. Riki n ikotaki ma ara utu ake a tia ni mate.”
E rang namakina te kukurei Harriet. Bwa ngaia e kona ni manga kaitibo ma Papa! E karekea moangarena ae bubura naba tinana—te moan inanon te tai ae maan.
Harriet, tinana, ao Carmen e aki bwaka aia reirei mairouia mitinare. A mwananga n taromauri. E reke raoraon Harriet te ataeinimwaane ae Dieter.
Ai aron ae e namakinna Harriet bwa e a rang oota nanon ruun aia auti ni kabane. Ao tabeua te tai imwina ao a motikia bwa a nang bwabetitoaki.
N te tairiki are imwain aia bwabetito, a katorobubua n tataro Harriet ma tinana ao Carmen. “Tamara are i Karawa,” e tataro Harriet, “ti rang kaitau ibukiia mitinare, te euangkerio, ao ara utu. Ti a ingainga nakon ara bwabetito.”
Ngke e kaurei matana Harriet, e taraa tamnein Papa ao e wiingare. E ingainga ni kan nooria n te bong teuana.