Ikaruoruo Nakon te Taromauri
“Ngkana ko oki nakon te auti, tuangai bwa tera ami anene ae kam aneneia n te Buraimwari,” e taku Jenny.
“Ngaia!” e kaeka Miriam ngke e karin ana kau.
A aki kona ni bane n nako n taromauri ana utu Jenny ni katoa Tabati. Onoman mwaitiia n ana utu Jenny. Ao e aki tau ana kataumwane Tinaia ibukin te kantoka n te bwati. Ngaia are a ikaruoruo ni mwanangaia n te bwati.
E tangiria Jenny bwa e na mwananga ni katoa wiiki. E tatangiria n reiakina rongorongon Iesu Kristo. E mamate nanona n te anene n te Buraimwari. E kukurei n nonoriia raoraona. Riki, e tatangira te namakin ae abue, te namakin ae kakukurei are e aki toki n namakinna n te taromauri. Ma n te bong aei ao e aki mwananga.
“Ti nang mwananga.” E inga Mama ma Jenny ao tarina ma mwaanena.
E kataia ni wiingare Jenny nakoia Miriam ao Mama ngke a nako. Ma e roko namakinan te nanokawaki irouna ngke e taraia ni mwananga nako. Ai tera ngke I iri naba , e iango Jenny. E bon matoa te titiku n te mweenga.
“Ko tangiria ni kara?” Mwaanen Jenny ae uarereke, Marco, e anai tabeua kureiaon ao beeba.
E katoua atuuna Jenny.
Inanon tabeua te aoa, Jenny e warekii karaki ao e kara ma Marco ao tariia ake a ikawai. E rang kaunga, ma ana iango Jenny bon iaon te taromauri. A reiakin anene aika boou n te Buraimwari ngkai? Tera taekan te reirei n te bong aei?
N tokina Jenny e a ongo ukin te mataroa are i moa. A roko Mama ma Miriam!
“Mamá! Miriam!” E biri Jenny nakon te mataroa ao e inga ma ngaiia.
E katuka ana bwauti ni mwane Mama. “Ti a marooro iaon bwaai ake ti reiakin n te taromauri.”
A bane n tekateka. E buuta ana boki n anene ae uarereke man ana bwauti ni mwane. Ana utu Jenny a anenea “Families Can Be Together Forever.” E atai taekana ni kabane.
Ao e titiraki Jenny nakon Miriam bwa e uara te Buraimwari. E kauka ana Boki Moomon Miriam ao e buuta te beeba ae rukumaki. E taua i eta bwa e aonga n nooraki. Bon tamnein Iesu are e bon karanii ma ataei.
“Ti karana te tamnei aei ao ti anenea ‘I’m Trying to Be like Jesus.’ Ao imwina ti marooroakina ana ibuobuoki Iesu nakoia aomata.”
“Anne naba are ti marooroakinna n te Botaki n Aine,” e taetae Mamá. “E kona ni buokiira Iesu Kristo ngkana ti maaku ke ti maroaa.” Mama e buuta te beba ae uarereke man ana bwauti ni mwane. “Te tia reirei e anganiia aiine te taeka n reirei aei mairoun te burabeti. ‘Ngkana ko rineia bwa ko na maeka irarikin te Uea, ko na bon aki maroaa.’”*
“E ngae ngke ko mena n te auti!” E titiraki Jenny.
E wiingare Mama. “N te auti naba. Ti kona n namakina ae ti kaan ma te Tia Kamaiu.”
E bubura moangaren Jenny. E aki katoa Tabati nakona n taromauri ni katoa wiiki. Ma e ataia bwa e kona ni kaan naba ma Iesu man mweengana. Ao e ingainga bwa e na roko ana tai ni manga nakon te taromauri.
Korotamnei iroun Laura Catrinella