Ana Tiim ae Boou Tamuera
E na butimwaeaki irouia raoraona?
Bon ingabongin te Kaonobong. E tekateka Tamuera n te taibora n amwarake ao n taraa ana boora n tirioo. E aki namakina te kan amwarake.
“Dad?” e taku. “I a manga bita au iango. I aki moa kan nako n takakaro n te bwatiketiboora n te bong aei.”
“I ataia e bon matoatoa ngkana ko boou, tai raraoma bwa e na reke raoraom,” e taku tamana.
“Tiaki ngaia anne… I raorama bwa tao a na tera aia iango.”
E tekateka tamana irarikina. “Ko kananonaa are a na miimi kaain am tiim ngkai ko boou nakon te tiim ao tii teuana baim?”
E bungiaki Tamuera ma akean baina te angamaing. Baina are te angamaing e toki n toun baina.
“Eang,” e kaeka Tamuera. “Ngkai a bon tuai kinaai, ngkanne are a na bae n taku bwa I kabitaia n takakaro.”
“Tao anne aia iango, ma I ataia bwa ko bon bwakuaku. Ao nanakom ni kataneiai n takakaro ao e na katamaroa riki takakarom,” e taetae tamana ma te moangare. “Ti a nako. Anaa am korobai ao bwatoro n ran. Ti a nako ni kaitibo ma kaain am tiim.”
E ikerikaaki Tamuera. “E TAMAROA.”
Ngke a rin n te tabo n takakaro, e mwananga nakoia te coach.
“Kam na mauri! Arau bon Monroe. Ngkoe kaain ara tiim ae boou.”
“Eang, arau Tamuera.”
“Ti rang kukurei ngkai ko kaaina ara tiim,” e taku Coach Monroe. “Ti a nako bwa ko na kinaiia kaian am tiim.”
E tekateka Dad n te tabo n tekateka. Tamuera e anaa ana booro ao e rimwiin te coach.
“N na kabwarabwara kaain ara tiim ae boou, Tamuera,” e taetae Coach Monroe. Tabeman ataeinimwaane a katei baia ni butimwaaia. “Ti kukurei ngkai e roko n te tai ibukin ara moan takakaro. Ngai irou e na nakoaraoi ara tiim, nakoraoi ara takakaro, ao ara tai n te ririki aei!”
E katanga ana biira Coach Monroe, ao e a waaki tabeua kataneiai n takakaro. Tamuera e nooria bwa e miiakinaki irouia tabeman kaain ana tiim ngke e katebea ao e karina ana booro tii ni baina te atai. Ma e aki katabea iai nanona.
Ngke a motirawa, e tekateka temanna te ataeinimwaane irarikina. “Mauri, arau Jackson. Tera ae riki nakon baim?”
“Akea. Bon rikiu ngke I bungiaki aei,” e taku Tamuera.
“Au moantai aio n noora te aomata ae kona n takakaro n tii teuana baina,” e taku Jackson. “Ko rang bwakuaku.”
E wiingare Tamuera. “E rabwa.”
E a manga tang naba ana biira Coach Monroe. “Nikiran ara tai ae 30 te miniti, ti na takakaro ni kataneiai teutana.” E katei uoua tiim. E kukurei Tamuera bwa Jackson e kaaina ana tiim.
Ai teuana te miniti nikiran te tai, ao titebo aia bwii tiim aika uoua aikai. E reke te booro iroun toan Tamuera ao e taratara nako bwa e na kakaea ae e na bwatinna nakoina. E rang kaan Tamauera, ao e tauraoi. Ma te ataenimwaane aei e bwaatina te booro nakon Jackson.
E kerikaaki teutana Jackson. E noora Tamuera ao e bwatiina te booro nakoina. E rawea te booro Tamuera, e rairaki, ao e kare ni karinna.
Rin! E rin raoi te booro ao e katanga te biira Coach Monroe. A takarua kaain ana tiim Tamuera.
“E nakoraoi am bwaati,” e taetae Tamuera nakon Jackson ngke a mwananga nakon te tabo n tekateka.
“E rang tamaroa am karinbooro,” e taku Jackson. “Ataeinimwaane ake tabeman a na riai n ataia ae ko kona n takakaro ma tii teuana baim n te bwatiketibooro.”
E wiingare Tamuera ao e high five ma Jackson. E karekea te namakin ni kakoaua ana taeka Coach Monroe. E na nakoraoi aia tiim, nakoraoi aia takakaro, ao nakoraoi aia tai n te ririki aei.