Tiim ao Tarena
Tiim aika a tamaroa a ikarekebai ao a ibuobuoki imarenaia ni karekea te tamaroa.
“Birinako, Jillian, birinako!” E takarua Tamau. Taman Jillian bon te kouti n ana tiim ni butibooro. E korakora aia kakatauraoi imwain te kaboo. E kabuebue taai, ma e aki toki birin Jillian.
Ao e a katanga ana biira Tamau. “Ngaia, ti a motirawa moa.”
Jillian e anaa ana bwatoro n ran ao e tekateka iaon te benti irarikiia ataeinimwaane. Bon tii ngaia te aine n aia tiim, ma e aki tabe iai. A ikarekebai ao a ibuobuoki imarenaia ni katamaroaa aia takakaro. E boni ngae ngke e kua man maonotiti, e namakina te kukurei irarikiia kaain ana tiim.
“Tamau, e uara ara takakaro n te bong aei?” e titiraki.
E wingare Tamau. “E Tamaroa! I taku bwa e a tauraoi ara tiiim nakon te kaboo.”
E wiingare Jillian. E materaoi aia mwakuri korakora!
Ngke e oki rikaaki man ana takakaro, Jillian e noora raoraona ae Mei. Bon kaain ana kiraati n te Moanrinan. Ma e tuai man roko Mei n te kiraati.
E wiingare Jillian nakon Mei. “Mauri, Mei! I rang mitiniko n te kiraati n te Buraimwari. Ko nako RAOI?”
E baraaki Mei n tarai ana kau. “E rawa tinau N nako n taromauri.”
“Bwa bukin teraa?”
“I aaki ataia.” E euta atuuna Mei. “E tamaroa, N nang nako moa.”
E kaboo Jillian ao n taraa Mei ngke e boonako. N na kanga ni buoka Mei? e iango.
Ngke e roko ni mweengana, e anenei kunan te buraimwari n ana ukirere. E tuangiia mwaanena bwa a na katoaa kunana. A tabe n anene ni karokoa e a wewete tinaia ibukin te katairiki.
“N na nako ni kawara Titita Aurea ningabong,” e taku Tinau.
“Nei Aurea ngkoa tinan Mei, eang?” E titiraki Jillian. “I kona n iriko? E tuai man kaoti Mei n te kiraati. Ngke I kaitibo ma ngaia n te bong aei, e ubu n aron ae e nanokawaki.”
“Ao ngaia, ko kona n iri,” e taku Tinau.
“N na uota au ukirere! I kona n anenei kunan te Buraimwari. Ngai irou e na bon kan anenei,” e taku Jillian.
Ngke a roko n ana auti Mei n te bong are imwina, E inga Jillian ma Mei. Ngke a tabe ni kakaraki tinaia, a nako tinanikun te auti. E katanga te ukirere Jillian, ao Mei e anene. A ngarengare ao a anene ni karokoa are e nang oki Jillian.
“E rabwa te kaitibo,” e taku Jillian. “Ti a rang mitiniko n ara buraimwarii.”
“Bwa ngaia, I rangi ni kan roko. Tao N na manga tuatua riki taekau iroun tinau.”
N te Tabati are imwina, e a kaoti Mei n te taromauri. E tekateka irarikina Jillian. “I rangi ni kukurei ngkai ko a manga roko,” e taku.
E moangare Mei. “Ngai naba.”
Tabeua te bong imwiina ao e a roko tain te kaboo. E tuatua Jillian nakoia kaain ana tiim bwa a na tataro imwain aia takakaro. Ngkanne e a nako kain te takakaro. E kabanea birina Jillian. E ibuobuoki ma kaain ana tiim n anaa te booro ao ni karinna. E tokanikai ana tiim!
N te tairiki anne ao e wene n ana kainiwene, Jillian e tabe n iangoa Mei ao kaain ana tiim ni butibooro. E rang kukurei ngkai e kaaina te tiim, ai aron naba kukureina ngkai ngaia kaain te Moanrinan. A bane n ibuobuoki imarenaia. E rang kukurei Jillian ngkai e kona ni buokiia raoraona, n te ekaretia ke n te marae n takakaro.