Bwaeoniia n Aba Nako
Tom ao te Flu ae Korakora
E ataia Tom bwa te Atua e na buokiia.
“Awaio nimam, Tamā (Tamau),” e aamarau n taetae Tom. E karaurau n teiraki taman Tom mai aon kiena. Tom e buokia n totoma nima te moimoto.
Tamana ao kaain ana utu a bwaka n aoraki inanon boong aika mwaiti. E kuri ni bane te koraki n te kaawa aei n aoraki. E roko te butinaoraki nakon te abamwakoro—te Spanish flu.
E nakonako i tinaniku Tom. Boni ngaia naba temanna mai buakoia aomata ake e tau korakoraia n tabeakiniia ake a aoraki. Ao e mwaiti te utu ake a kainnanoa te ibuobuoki.
I kainnanoi riki moimoto aika mwaiti e iango Tom. E katamwa te nii ae rang rietaata. Ngke e roko i taberana, e aenikii tabeua moimoto ao e kabwakai nako aontano.
Ngke e ruo rikaaki, E iangoia kaain ana kaawa. E bon kakamaku norakiia aika a mwaiti n aoraki.
Te ririki ae nako, tarina ae uarereke, Ailama, e aoraki. E bon kakamaku naba. Tom ma ana utu a tataro ibukina bwa e na marurung.
Ao ngkanne tamana e mii. E kaotaki nakoina n te mii te bwainaoraki ibukin Ailama—e na ikiika kunin te aroka ae te wiriwiri ao n ongira ranna. Tom e buoka tamana n tabeakina Ailama, ao a kamoiia n ranin te aroka. Ao e reke marurungin Ailama!
E ataia Tom bwa ngkai a tia ni buokaki iroun te Atua. E ataia bwa e na buokiia naba ngkai te Atua.
E kauki moimoto Tom. Boin ranin te moimoto ae boiarara e kamarurungnga teutana. E mwananga nakon teuana te auti n aia kaawa bwa e na anga ranin te moimoto nakoia. Imwin anne ao e a manga nakon te auti are imwina. Ao are imwina.
E a nako te wiiki. E mwakuri korakora Tom ni buokiia aomata. E karekei tabeua mooa bwa e aonga ni kukana te tuubu ibukin te amwarake. E uotii baketi n ran man te karaanga bwa nimaia aomata.
Iai tabeman kaain te kaawa ake a mate. E mate naba tamana. E bon rang kananokawaki aei iroun Tom. E rootaki te kaawa n te nanokawaki. Ma inanon te kangaanga aei, E uringnga Tom bwa e tangiraki iroun te Atua ao e na buokaki.
E aki toki ana ibuobuoki Tom nakoia aomata. Tabeua te tai imwina, a moanna ni marurung aomata!
Ao e a toki te butinaoraki ae te flu. A aikoa manga aoraki aomata. Tom ao Ailama a manga nako n reirei. Tom e uringa tamana. Ma e ataia bwa e na manga kaitibo ma tamana n te tai teuana. Ao e ataia bwa e na teimatoa Tamara are i Karawa ni buokia.
Samoa bon te kurubu n abamwakoro ae mena n Marawan Te Betebeke.
Iai ngkai teuana te tembora iaon Samoa.
Te auti n Samoa, ae aranaki bwa te fale, bon akea oona.
E butinako te aoraki ae te spanish flu i Samoa n 1918.
Tom bon 12 ana ririki n te tai are e moan buti iai te aoraki.
Ana kaawa Tom, Sauniatu, e kaainaki irouia Aomata aika Itiaki.
Korotamnei iroun Corey Egbert