iVuvu ena Vanua Kecega
Vakasaqaqara Balavu nei Michael
A lomatarotarotaka o Michael se lotu cava e dina.
E vakaliliga e tabana o Michael na nona katodreketi. Oqo na imatai ni siga ni vuli, ka sa sega ni rawa ni wawa o koya! E ratou vakaitikotiko kei na nona matavuvale mai Idia. E vuqa na gone ena nona siti era sega ni rawa ni ra lako ki vuli. A vakavinavinakataka o Michael ni rawa ni vuli.
E taleitaka o koya na vuli—vakauasivi ena fika. E dau taleitaka talega na wilika na mekasini. A cega na draunipepa duiroka. A wilika na duidui ni manumanu kei na veivanua e veiyasai vuravura.
Ena dua na siga a wilika o Michael e dua na mataqali mekasini duidui. E a mekasini mai Na Lotu i Jisu Karisito ni Yalododonu-Edaidai. A taleitaka o Michael na wilika. A vinakata me kila e levu tale na ka.
A dau gole o Michael ki na veimatalotu tale eso e liu. E dau taleitaka o koya me vulica na veika me baleti Jisu Karisito. Ia ena so na gauna e a dau vakila na veilecayaki. Na lotu cava beka na lotu dina?
E muri, a qai wilika e dua na ivolalailai me baleta na parofita o Josefa Simici. A vakila e dua na ka talei ni wilika tiko. Sa dau gole talega o Josefa Simici ki na veimatalotu duidui ena nona vakasaqara na dina. Au vakataki Josefa beka, e nanuma o Michael.
E vinakata o Michael me gole ki na lotu vou oqo me kila se vakacava tu. Ia a sega ni dua na lotu ni Yalododonu Edaidai e Idia. A yalorarawa o Michael. A vulica tikoga na veika kece e rawata. E a wilika na iVola i Momani ka masu. A kila saraga ni sa ka dina! Sa vinakata me papitaiso. Ia me na wawa mada.
A sivi e vica vata na yabaki. Ni yabaki 21 o Michael, rau a gole mai ki Idia e dua na veiwatini daukaulotu. Sa mani qai papitaiso o Michael! Sega ni dede sa rawa vua me veiqaravi vakadaukaulotu e Utah, Amerika.
Sa sivi tale e vuqa na yabaki. Ena dua na siga a qiri koya e dua na itokani. Na Lotu e a vakasaqarai ira tiko na tamata me ra veivuke ena kena vakadewataki ni koniferedi raraba me baleti ira na tamata mai Idia. E a nuiqawaqawa taumada o Michael. Ia a marautaka o koya me veivuke.
Ena dua na yakavi ni Okotova a vakadewataka tiko o Michael e dua na vosa nei Peresitedi Nelson ena koniferedi raraba. A rogoca ni sa kacivaka na parofita ni na tara e dua na valetabu mai Idia! A vinakata o Michael me kaila ena reki. A tagi ena marau.
A vakavinavinakataka o Michael na veika kece a vulica mai koronivuli. Ia me kena ilutua, e vakavinavinakataka o koya ni sa vulica na kosipeli i Jisu Karisito. E marautaka ni levu na tamata ena nona vanua era sa na rawa ni vulica talega na veika me baleti Koya!
Sega ni dede sa na dua na valetabu e Idia!
E tiko e Idia e sivia ni 20 na vosa vakadonui.
E rua tiko na tabana ni kaulotu e Idia nikua.
Na kakana taleitaki kei Michael na biryani (raisi kei na lewe ni manumanu saqa tu ena isaluwaki ni kakana).
Na nona italanoa taleitaki mai na ivolanikalou e baleti Josefa ena Veiyalayalati Makawa.
Nikua, e sa dau veivuke o Michael ena kena vakadewataki na koniferedi raraba me baleti ira na tamata mai Idia.
Droini mai vei Oriol Vidal