Koronivuli Vou, iTokani Vou
E rawa vakacava me vakaitokani o Ada ni sega ni rawa ni vosa vaka-Jaina?
“Au sa rere,” a kaya o Ada. Oqo na imatai ni siga ni nona vuli e Taiwan. Ia a sega ni vosa vaka-Jaina me vakataki ira na gonevuli tale eso. Ena rawa vakacava me vakaitokani? O cei ena qito vata kaya ena gauna ni vakacagicagi?
A mokoti Ada vinaka sara o Na. E sega ni dua na ka kevaka o rere.”
A mata tarotaro o Ada. “Au sega ni kila me‘u na vakaitokani vakacava eke.”
A mokoti koya tale o Na. “Kevaka o rere, sa rawa ni o vakasamataka e dua na sere ni Lalai. Ena veivuke beka o ya?
A deguvacu o Ada. A qai lako vata kei Na ki na nona rumu ni vuli. A waraki koya tiko o nona qasenivuli. “Ni hao!” a kaya na qasenivuli. A tovolea o Ada me mata dredredre. E sega ni kila o koya na ibalebale ni vosa oya.
A vakamoce o Ada vei Na. A qai kunea e dua na desi ka dabe sobu.
A raici ira na vo ni gone. Eso vei ira era veitalanoa tiko. Eso tale era dabe vakanomodi me vakataki Ada. A nuiqawaqawa o Ada. E vaka me vakila ni cevaruru tiko na pi e ketena.
A qai raica o Ada e dua na goneyalewa ni tagi toka. A vinakata o Ada me vukei koya. Ia ena veivuke vakacava o koya ni sega ni rawa tiko madaga ni vosa vaka-Jaina? Vakacava ke sega ni vinakata o goneyalewa me vukei?
Ia a qai vakayacora o Ada na ka a kaya o Na. A vakasamataka o koya na qaqa ni nona sere taleitaki ni Lalai: “Dou veilomani me vaka sa lomani iko ko Jisu.” A vakila o Ada ni kerei koya tiko na Yalo Tabu me veivuke.
A dabe tikivi goneyalewa yani o Ada. A mokoti koya. A qai vakamasia na dakuna me vakataka ni dau vakayacora o Na ni dau rarawa o Ada. A mai cegu yani ena tagi na goneyalewa! A mokoti Ada lesu.
A dusi koya vakaikoya o Ada. “Ada.”
A dusi koya vakaikoya na goneyalewa. “Mei,” a kaya o koya.
A mata dredredre o Ada. A dabe toka ga e yasai Mei ena vo ni siga oya. E dina ga ni sega ni tautauvata na nodrau vosa, ia e rau a marau vata. E rau a kania vata na kedrau ivakasigalevu. E rau dau qito vata ena gauna ni vakacagicagi. A vukei Ada o Mei me vulica na vosa vovou vaka-Jaina!
A sega ni rawa ni wawa o Ada me tukuna vei Na me baleta na nona itokani vou. E kila o koya ni kevaka e muri Jisu, ena sega ni rerevaka e dua na ka.
Droini mai vei Shawna J. C. Tenney