Sarasara ena Valetabu:

E vakaevei tu na draki ni bula ena loma ni valetabu? Rai yani ki loma ni Valetabu e Rio de Janeiro Brazil mo kila kina. Na valetabu e vanua era ciqoma kina na tamata na cakacaka vakalotu (veicakacaka tabu se soqoni e vakayacori ena lewa ni matabete, me vaka na papitaiso).

Desi ni iVolatara

Ni o curuma na valetabu, ena kidavaki iko e dua na vakailesilesi sega ni saumi. Kevaka o lako kina mo papitaiso ka vakadeitaki ena vukudra na tani, o na vakaraitaka na nomu ivolatara pepa ni valetabu. E vakaraitaka ni o sa vakarau tu mo curu ki loma ni Valetabu. E rawa ni o taura e dua na ivolatara mai vua na nomu bisopi se peresitedi ni tabana ena gauna o na yabaki 12 kina.

Vanua ni Veipapitaisotaki

Ena valetabu e rawa ni o papitaiso kina ena vukudra na nomu qase e liu kei ira tale eso era sa mate ia era a sega ni papitaiso. E rawa talega ni o vakadeitaki me baleti ira me rawa ni ra ciqoma kina na isolisoli ni Yalo Tabu.

Rumu ni Cakacaka Vakalotu

Eke o na vulica kina eso tale na ka me baleta na ituvatuva ni marau Nona na Tamada Vakalomalagi kei na Nona inaki me baleti keda e vuravura. Ena dua na siga sa na rawa ni o lako mai ki ke mo mai vakayaco veiyalayalati digitaki, se yalayala, vata kei Koya.

Rumu Vakaselesitieli

Na rumu totoka, ka veivakacegui oqo sa vanua ni masu ka vakasamataki kina na veika e bibi duadua ena nomu bula. E vakananuma vei keda na ituvaki ni noda itikotiko vakalomalagi.

Rumu ni Veivauci

Ena rumu oqo, e rawa ni rau vakamau tawamudu kina e dua na veiwatini. Qo e vakatokai me veivauci. E rau tekiduru na veiwatini ena icabocabo ni soro me rau vauci. E rawa talega ni ra vauci na gone vei ira na nodra itubutubu eke kevaka era susugi se sucu ni bera ni vauci na nodra matavuvale.