Yu Defren be Yu No Stap Yuwan
Samtaem blong stap yuwan nomo olsem wan memba blong Jos i filim olsem yu stap yuwan nomo.
!Brrrrring! Bel i ring blong las klas blong dei i stat. Nao Megan, i stap long junia sekendri skul, hem i go long defren klas long dei. Mo i gat plante samting blong lanem. Megan i glad se las klas blong hem i taem blong stadi. Hemia i minim se hem i save stat blong mekem ol homwok blong hem.
Megan i sidaon long wan emti tebol. Wan boe, nem blong hem Bennett i wokbaot i go long hem.
“?Ei, Megan, yu wan Momon, ah?”
“Mi wan memba blong Jos Ia blong Jisas Kraes blong Ol Lata-dei Sent,” Megan i talem.
“?So, yu ting se Josef Smit i raetem Buk blong Momon o wan samting olsem ia, ah?” Bennet i askem.
Megan i mekem wan kwaet prea kwiktaem nomo blong save olsem wanem blong ansa. “Hem i transletem Buk blong Momon,” Megan i talem. “God i bin singaotem hem blong kam olsem wan profet blong help blong karembak Jos blong Kraes.”
Bennett i skwisim nus blong hem “!Hemia i krangke ia!” hem i talem. Hem i laf mo wokbaot i go.
Fes blong Megan i kam wom. Hem i lukluk i go daon long buk blong hem.
“Ei, Megan.”
?Wanem? Megan i lukluk antap. “O. Halo, Taj.”
“Sore long wanem Bennett i talem long yu,” Taj i talem. Hem i sidaon narasaed long hem long tebol. “?Wanem yu stap talem, i olsem se i impoten long yu?”
“Tangkyu” Megan i talem. “Yes.”
Mi ting se mi save hao yu filim,” Taj i talem. “Mi mi wan Hindu ia nomo long skul. Mo hem i had taem ol pipol oli no andastanem ol bilif blong yu.”
Megan i filim se hem i stap hemwan nomo olsem wanem memba Jos Ia blong Jisas Kraes Ia blong Ol Lata-dei Sent long skul blong olgeta. Be hem i neva tingting se bae i gat ol narafala pikinini we bae oli filim sem samting tu.
“Mama mo Papa blong mi, oltaem tufala i talem se, taem wan man i mekem nogud long yu, hem i from se hem i no hapi,” Megan i talem. Hem i stap tantanem pensel blong hem raon long ol fingga blong hem. “Mi stap tingting se ating Bennett i harem nogud. O hem i stap hemwan.”
Taj i tanem hed blong hem long saed. “Mi ting se yu talem tru. Ating hem i nidim wan fren.”
Megan i smael. “!Ating hem i nidim 2!”
Long nekis dei long stadi taem, Megan mo Taj i luk Bennett i stap sidaon hemwan long wan tebol.
“Halo, Bennett,” Taj i talem.
Bennett i sek. “Halo”
“?Yu stap wok long wanem?” Megan i askem, mo i sidaon long jea.
“Histri.”
“?Blong tes blong tumoro?” Taj tu i sidaon.
“Yes,” Bennett i talem.
“Hemia i plante samting blong tingbaot,” Taj i talem. Bennett i sakem hed blong hem.
“Ating yumi sud testem yumi wanwan.” Megan i openem histri buk blong hem. Wanwan i askem mo ansarem kwestin kasem taem we bel i ring.
“Ei, Megan, mi sore abaot yestedei,” Bennett i talem taem tufala i stanap mo go. “Mi harem sam samting abaot jos blong yufala mo mi stap tingting.” Hem i stap muvum leg blong hem go kam. “Mi bilif long defren samting, be mi sapos blong mekem gud long ol narafalawan.”
Megan i smael. “Tangkyu. Jos blong mi i impoten long mi, be hem i oraet sapos yumi bilif long defren samting.”
“Mi ting se yumi mekem wan gudfala stadi grup iven sapos yumi gat ol defren bilif,” Taj i talem.
Bennett i smael. “Mi tu.” Mo mi ting se bae yumi mekem gud long tes.”
Ol pikja droing oli kam long Mark Robison