Rabis Gras mo Rabis Toktok
“?Olsem wanem? ?bae yumi mekem wan famli promes?” Mama i askem.
“?Yumi save storian?” Jonas i askem Mama. Hem i sidaon long gras kolosap long ples we hem i stap pulumaot ol rabis gras long ples blong planem flaoa.
“Yes. ?Wanem i hapen?” Mama i askem. Hem i karemaot ol doti hanglav blong garen blong hem.
“Tedei long skul sam pikinini i stap talem wan toktok ia mi no save. Oli laf taem oli talem,” Jonas i talem. “Mi mi ting se hem i wan rabis toktok.”
“?Yu filim olsem wanem taem yu harem toktok ia?” Mama i askem.
“I no mekem mi filim gud.”
Jonas i wispa toktok ia long mama blong hem. Mama blong hem i talem long hem i minim wanem. Jonas i raet. Toktok ia i no wan naes toktok.
“?Be from wanem hem i nogud?” Jonas i askem.
“Hem i nogud from hem i no kaen mo i no gat respek. Taem yumi yusum ol kaen toktok olsem, i mekem i had blong Tabu Spirit i stap wetem yumi. Tabu Spirit i stap talem long yu se i nogud. Hemia nao from wanem yu no filim gud insaed.”
Jonas i mekem fes blong hem i nogud. “Be luk olsem se ol narafala pikinini i gat wan gud taem wetem. ?From wanem mi wan nomo i no filim gud?”
“?Hao nao yu save se ol narafala pikinini oli no filim i semmak?” Mama i askem.
“From se evriwan i laf o smael taem wan man i talem toktok ia.” Jonas i konfius nao.
“Samtaem ol pipol oli stap laf o smael taem oli filim i no stret,” Mama i talem. “Mo samtaem taem oli harem o talem ol rabis toktok plante taem, i kam nomol nao long olgeta. Be hem i no stret blong talem ol toktok ia. Hem i olsem ol rabis gras ia. Mi stap pulumaot olgeta blong mekem garen i klin mo letem ol gudfala flaoa i gro.”
“Mi glad we mi no talem toktok ia,” Jonas i talem.
“Mi tu,” Mama i talem. “Mi praod long yu. Mo mi gat wan aedia. “?Olsem wanem? ?Bae yumi mekem wan famli promes?”
“?Wanem kaen?” Jonas i askem.
“Yumi promes blong yusum ol gudfala toktok mo no yusum rabis toktok. Hemia bae i olsem wan famli promes.”
Jonas i laekem aedia ia. Hem mo Mama i sekhan. Jonas i filim gud abaot promes ia we hem i mekem wetem Mama blong hem.
“Naoia, ?olsem wanem long yu bae yu promes blong helpem mi blong finis pulumaot ol gras ia?” Mama i askem. “Afta mi promes blong karem yu go long ples blong pleplei.”
Jonas i smael mo i karem wan savel. “Hemia i wan dil.”
Taem hem i helpem mama blong hem, Jonas i filim gud. Hem i save se blong promes blong no yusum wan rabis toktok i wan gud joes blong famli blong hem.
Pikja i kam long Dan Widdowson