!Traem Talem Hu Lavem Yu, Misis Banks!
I stat wetem wan flaoa …
Roxy i laekem blong luk ol haos blong neba blong hem, taem hem i stap wokbaot i kam long haos afta skul. Wan haos i gat wan dog we i stap singaot mo jiamjiam long windo. Wan narafala haos i gat ol pijin oli stap singaot long ol tri.
Afta i gat haos blong Misis Banks. Misis Banks hem i bin klas 3 tija blong hem, mo hem i feveret tija blong Roxy. Roxy oltaem i sakem han long Misis Banks taem hem i luk hem i stap sidaon long jea blong long vranda blong hem. Misis Banks i naes mo hapi.
Be tedei jea blong hem long vranda i emti. Haos i kwaet. Iven puskat blong Misis Banks, Chester, i no gat.
Roxy i tingbaot se mama blong hem i talem se Misis Banks i sik. Hem i stap go long hospital evri dei. Roxy i harem nogud. Hem i bin wantem blong mekem wan samting i naes blong Misis Banks. ?Naoia wanem nao?
Roxy i lukluk raon long ol bi we oli stap flae long wan flaoa i go long narafala flaoa. !Afta, hem i gat wan aedia!
Roxy i ron i go long haos blong mama blong hem mo pikimap wan rosflaoa long garen blong hem. Hem i gobak long haos blong Misis Banks mo putum long vranda blong hem.
Nekis dei, Roxy i putum sanflaoa long jea blong Misis Banks. Mo long dei afta long hemia, hem i putum wan deisiflaoa long fored long doa blong hem. Evri dei blong tu wik, Roxy i lego wan flaoa blong Misis Banks. Be hem i mekem sua se i no gat man i luk hem.
Wan dei, taem hem i stap wokbaot i gobak long haos, Roxy i luk Misis Banks i sidaon long fored blong vranda. Hem i holem sam flaoa long han blong hem.
“Roxy,” Misis Banks i talem, “luk ol naes flaoa blong mi. Wan man i stap kam putum blong mi. Evri dei wan niu flaoa bae i stap wet long mi taem mi kambak long haos long hospital.”
Roxy i smael. “?Yu yu save se huia?”
Misis Banks i smael i kambak. “Huia hem, mi wantem talem tangkyu long hem.”
“!Ating i wan we i laekem yu tumas!” Roxy i talem.
“Okei, mi hop blong faenem wan niu flaoa evri dei,” Misis Banks i talem. “Fas flaoa i stap long vranda blong mi”
“?Yu ting se puskat blong yu i lego i stap ia?” Roxy i askem.
“Chester i laekem blong lego ol sapraes long mi, be hem i neva putum flaoa blong mi.” Misis Banks i laf. “?Weswe flaoa long jea blong mi?”
“?Dog we i stap daon long rod longwe?” Roxy i smael bigwan nao.
“?Be long fored long doa blong mi?”
“?Wan skwirel?”
“O,” Misis Banks i laf. “!Mi no luk save se i gat plante samting we oli laekem mi! Be ol flaoa ia oli helpem blong filim se mi spesel”
Roxy i glad tumas. Hem i glad se hem i help blong mekem Misis Banks i smael bakegen.
Ol pikja oli kam long Adobe Stock