Okoro ma Tiaki Tii Ngaia
N tabetai kainakin te Ekaretia n ti ngaia e kamaroa.
Brrrrring! E tang te beero ibukin te kabanea ni kiraati n te bong anne. N te tai aei ngkai Megan e a roko n te reirei are i nuuka, e kaei kiraati aika a kakaokoro inanon te ngaina. Ao e bon rang mwaiti bwaai aika a na reiakinaki. Megan e kukurei bwa ana kabanea ni kiraati bon te tai ni kamatebwai. Anne nanona bwa e a kona ni waaki iaon bwaai ake e na karaoi ni mweengana.
Megan e tekateka n te taibora ae akea kaaina. Te ataeinimwaane ae arana Bennett e kawaria.
“Eei, Megan, ngkoe ngkoa kain te Moomon, ngaia?”
“Ngai kain Ana Ekaretia Iesu Kristo ibukiia Aika Itiaki ni Boong aika Kaitira,” e taku Megan.
“Ngaia, ko iangoia bwa Iotebwa Timiti e korea ana Boki Moomon ke kaanga aiaron anne, ngaia?” E titiraki Bennett.
Megan e waekoa, n tataro ni kainabwabu bwa e na ataia bwa e na kanga aron ana kaeka. “E raira Ana Boki Moomon,” e taku. “Te Atua e weteia bwa e na riki bwa te burabeti bwa e na buoka kaokan ana Ekaretia Kristo.”
Bennett e kakuia bwairina. “E kaminonano anne,” e taku. E ngare ao e taonnako.
E moanna ni mata n un Megan. E baraaki n tara ana boki.
“Eei, Megan.”
Tera ngkanne? Megan e tararake. “O. Mauri, Taj.”
“Kabwara te bure ibukin Bennett,” e taku Taj. E tekateka ni kaitara. “Te bwai are ko taekinna e tara n rang ni kakawaki iroum.”
“Ko rabwa,” e taku Megan. “Bon eng!”
“I taku bwa I ata am namakin,” e taku Taj. “Bon tii ngai te Hindu n te reirei. E bon matoatoa ngkana aomata a rawa ni kan ota n am koaua.”
Megan n tabetai e namakina te maroa ngkai ti ngaia kaain ana Ekaretia Iesu Kristo ibukiia Aika Itiaki ni Boong aika Kaitira n aia reirei. Ma akea ana iango irouia ataei ake tabeman bwa a na kona n namakina naba anne.
“Au karo a taekinna bwa ngkana iai temanna ae iowawa nanona aki kukurei inanoia,”e taku Megan. E kaminominoa te bentira n tabonibaina. “I kan ataia ngkana Bennett e namakina te rawawata. Ke te maroa.”
Taj e karara atuna. “I taku bwa e eti anne. Tao e kainnanoa raoraona.”
E moangare Megan. “Tao e kainnanoia uoman!”
Te bong are imwiina n te tai ni kamatebwai, Megan ao Taj a noora Bennett n tekateka n ti ngaia n te taibora.
“Mauri, Bennett,” e taku Taj.
E tara ni mimii Bennett . “Mauri.”
“Tera ae karaoaki?” Megan e titiraki, ni katekateka bukina iaon te kaintekateka.
“History.”
“Iai te kamwaninga n ningabong?” Taj e tekateka naba.
“Eng,” e taku Bennett.
“A mwaiti bwaai aika tina riai n uringii,” e taku Taj. E katoutoua atuna Bennett.
“Tao ti kona ni kamwaninga imarenara.” Megan e kauka ana boki n history. A ikaruoruo n anga titiraki ao ni kaekai ni karokoa e tang te beero.
“Eei, Megan, Kabwara au bure ibukin ngkoananoa,” Bennett e taetae ngke e teirake bwa e nang nako. “I ongo taekan am ekaretia ao I rang kan ataia.” E ieiei iaon waena ngke e tei.mmm “A kaokoro ara koaua, ma I bon riai ni karaoa ae riai.”
E moanagare Megan. “E rabwa. E kakaawaki au ekaretia irou, ma e TAMAROA ngkana a kaokoro ara koaua.”
“I taku bwa e rang n nakoraoi ara kurubu ni kamatebwai e ngae ngke a kaokoro ara koaua,” e taku Taj.
E wiingare Bennett. “Ngai naba. Ao I taku bwa e na nakoraoi ara bwi n te kamwaninga anne.”