Keetinna bwa Antai ae Tangiriko, Mrs. Banks!
E moan waaki man te uee ae ti teuana …
Roxy e tatangiria n tatarai auti ni kabane ake irarikina ngkai e rianna n oki man te reirei. Teuana te auti iai ana kamea ae kaukau ao e kiba rake ao e ruo man te winto. Te auti are teuana iai mannikiba iai aika a anene n te aroka.
Ao ngkanne ai ana auti Mrs. Banks. Mrs. Banks e a tia n riki bwa ana tia reirei n ana kateniua n ririki, ao bon ti ngaia ae tatangiria. Roxy e katea baina n tainako nakon Mrs. Banks ngkana e nooria n tekateka iaon te kaintekateka i moan ana auti. Mrs. Banks e iraorao ao e kukurei n tainako.
Ma n te bong aei te kaintekateka i moan te auti ai akea kaina. E tara n akea te karongoa n te auti. Bon ana katamwa naba Mrs. Banks, Chester, akea.
Roxy e uringa tinana ngke e taekinna bwa e aoraki Mrs. Banks. E nanakon te onaoraki ni katoabong ibukin ana bwainaoraki. Roxy e taonna te nanokawaki. E tangiria ni karaoa te bwai ae raoiroi ibukin Mrs Banks. Ma tera?
Roxy e tarataranako ao e noori manibeeru ni kibakiba man te uee teuana nakon teuana. Ngkanne e a reke ana iango!
Roxy e biri nakon mweengana ao e kinika te rooti n ana onaroka. E oki nakon ana auti Mrs. Banks ao e katoka i moan ana auti.
N te bong are imwiina e katoka te sunflower iaon ana kaintekateka Mrs. Banks. Ao te bong are imwiin anne, e katuka te daisy (te uee) i moan ana mataroa. Ni katoa bong inanon uoua te wiiki, Roxy e katuka te uee ibukin Mrs. Banks. E taratara raoi bwa e na aki nooraki.
N te bong teuana ni kawaina n okira mweengana, Roxy e noora Mrs. Banks n tekateka i moan ana auti. E taui uee tabeua ni baina.
“Roxy,” Mrs. Banks e taku, “tarai au uee aika rang tikiraoi. Iai ae ninikiri ibukiu. Ni katoa bong iai te uee ae boou ae tataningaai ngkana I okira mweengau man te onaoraki.”
E moangare Roxy. “Ko ataia bwa antai?”
Mrs. Banks e wiingare. “Antai ake a karaoia, I tangiria ni karabwaia.”
“Tao bon temanna ae e tatangiriko!” E taku Roxy.
“Eng, I ingainga ni karekea te uee ae boou ni katoa bong,” e taku Mrs. Banks. “Te moan uee e toka i moan au auti.”
“Tiaki am katamwa ae katikua ikanne?” E titiraki Roxy.
“Chester e tatangiria ni kakubanakoai, ma e aki kakatikui uee.” E ngare Mrs. Banks. “Ao ake iaon au kaintekateka?”
“Te kamea are e mwamwananga iaon te kawai?” Roxy e a bubura riki ana moangare.
“Ao imatan au mataroa?”
“Te squirrel (te man ae uarereke)?”
“Oi auee,” e taku Mrs. Banks, ni ngarengare. “I aki ataia ae a mwaiti maan aika a tatangirai! Ma te uee e bon buokai n namakina te kukurei.”
Roxy e a kuri n tiinako ngarena. E rang kukurei ngkai e a tia ni buoka Mrs. Banks ni manga moangare.
Kamataata n te tamnei iroun Adobe Stock