Uteute ao Taeka aika Bubuaka
“E aera ti aki karaoa te berita n te utu?” E titiraki tinana.
“Ti kona ni maroro?” Jonas e tuanga Tinana. E tekateka iaon te uteute are e kouteute iai tinana n te beera n uee.
“Eng. Tera ae e riki?” E titiraki tinana. E butii bwaai ake e karini i baina ake bwain te onaroka.
“N te bong aei n te reirei tabeman ataei a taekini taeka aika bubuaka aika I aki atai. A ngare ngke a taekinna,” e taku Jonas. “I taku bwa bon te taeka ae buakaka.”
“Tera am namakin ngke ko ongo te taeka?” e titiraki Tinana.
“E aki raoiroi au namakin iai.”
Jonas e wirikirikina te taeka nakon Tinana. Tinana e tuangnga nanon te taeka anne. E eti are e taku Jonas. Bon tiaki te taeka ae raoiroi.
“Ma bukin tera e buakaka?” e titiraki.
“E bon buakaka ibukina bwa e aki iraorao ao e aki karinerine. Ngkana ti kabonganai taeka n aron akanne, e aki kona n raoniira te Tamnei ae Raoiroi. Te Tamnei ae Raoiroi e tuangko bwa e buakaka. Anne bukina ko aki namakina ae raoiroi inanom.”
E mata n un Jonas. “Ma ataei ake tabeman a tara ni kukurei iai. Bukin tera bon ti ngai ae I namakina te mweengabuaka?”
“Ko kanga n ataia bwa aki namakina are ko namakinna?” E titiraki tinana.
“Ibukina bwa a bane ni ngare ao a moangare ngkana iai ae e atonga te taeka.” Jonas e namakina te nanououa.
“N tabetai aomata a ngare ke a moangare ngkana aki mweengaraoi,” e taku te Tina. “Ao n tabetai ngkana a ongongo ke a taekin taeka aika buakaka aika a mwaiti, ngkanne a bon aki kona n tabe iai. Ma e bon teimatoa n aki eti taekinan taeka akanne. Kaanga ai aron uteute aikai. I a kouti bwa e aonga n teimatoa itiakin te onaroka ao ni karekea rikirakeia aroka aika raraoi.”
“I kukurei bwa I aki taekina te taeka,” e taku Jonas.
“Ngai naba,” e taku Tinana. “I kakatonga iroum. Ao iai au iango. E aera ti aki karaoa ara berita n te utu?”
“N tera iai?” E titiraki Jonas.
“Ti a berita bwa ti na kakabonganai taeka aika raraoi ao tiaki aika a buakaka. E kona n riki bwa ara boraraoi n utu.”
Jonas e kukurei n te iango anne. Ngaia ma Tinana a iobai. Jonas e namakina te kukurei n ana berita are e karaoia ma Tinana.
“Ngkanne, ao e uara ko a berita bwa kona buokai ni kabanea te kouteute?” E titiraki tinana. “Imwiina N na berita bwa N na kairiko nakon te tabo ni kamaangang.”
Jonas e wiingare ao e tabeka te tibeiti. “Anne te boraraoi.”
Ngke e buoka Tinana, Jonas e a namakina riki te kukurei. E ataia bwa te berita ibukin aki kabonganaakin taeka aika buakaka bon te rinerine ae tamaroa ibukin aia utu.