Wan Smol Ekstra Help
Ol bun blong daenaso oli moa gud blong stap pleiple wetem bitim blong go long klas ia we i blong lanem blong save toktok gud mo klia.
“Alex, hem i taem blong go long klas ia blong save toktok gud mo klia,” Misis Jenkins i talem.
Alex i tanem hed blong hem long saed. Klas ia blong save toktok gud mo klia, hem i wan spesel klas we hem i bin go long hem. Hem i no save talem gud sam toktok mo sam saon. I mekem se hem i stap praktisim olgeta long klas blong toktok gud mo klia long samfala dei blong wik. !Evri taem hem i lego klas blong hem, hem i filim i sem!
Hem i lukluk i go antap long tija blong hem. “?Mi save ronwe long klas ia?” hem talem long wan smol voes. “?Tedei nomo?”
Tedei, Mista Timmons i stap kam long klas blong Alex blong tokbaot daenaso. Mista Timmons i wok long wan miusiom wetem plante naesfala bun blong daenaso. !Hem bae i tekem wan bun blong daenaso we yia blong hem i kasem taosen yia! Alex i no wantem mestem hemia.
Misis Jenkins i smael. “Yu stil nid blong go long klas ia blong toktok gud mo klia. Be yu save kambak stret long taem blong las pat blong toktok blong Mista Timmons.”
Alex i traem blong smael i go bak, be hem i no save. Hem i wokbaot sloslo i go long klasrum long klas ia blong toktok gud mo klia. Long klas, oli praktis blong stap talem semmak saon bakegen mo bakegen. Blong stap lanem abaot daenaso, i wan samting blong mekem blong gat wan gudtaem.
“Mi no laekem blong stap talem ol stupid saon ia,” hem i talem long tija blong hem long klas ia blong toktok gud mo klia. “Mi filim se mi mi wan bebi.”
“Yu yu no wan bebi nating,” tija talem. “Yumi evriwan i nidim wan smol ekstra help samtaem. ?Be yu save se mi bin go long klas ia blong toktok gud mo klia taem yia blong mi i olsem yu?”
Toktok ia i mekem Alex i glad. Hem i wok had long evri klas blong hem blong praktisim ol saon blong hem.
Taem Alex i go bak long klasrum blong Misis Jenkin, hem i luk fren blong hem Courtney i stap aot.
“Yu stap go wea?” hem i askem.
Courtney i lukluk i go daon. “Mi no save rid gud. Mi nid blong go long wan spesel klas blong rid.” Courtney i sem.
“E, hem i oraet nomo” Alex talem. “Mi jes kambak long klas ia blong save toktok gud mo klia. Mi tekem fultaem ia blong stap ripitim semmak saon nomo.” Hem i skwisim nus blong mi.
“?Yu bin mekem?”
Hem i saksakem hed blong hem blong agri. “Mi bin stap go long klas blong toktok gud mo klia blong tu yia nao.”
“?Olsem wanem nao mi no bin save?” hem i askem.
Alex i leftemap solda blong hem. “Mi neva talem long wan man. Mi fraet tumas se bae olgeta oli laf long mi.”
“Mi bae mi neva laf long yu,” Courtney i talem. “Mi glad we yu kambak long stret taem blong luk ol bun blong daenaso. !Oli naes we!” Hem i sakem han. “Mi mas go nao. Bae mi luk yu bakegen.”
Afta long taem ia Alex i faenemaot se i no hem mo Courtney nomo we oli stap go long ol narafala klas. Tommy i go long wan klas blong helpem hem blong lanem gud olsem wanem blong wok wetem ol narafala man. Mo Bekah i bin wok wetem wan spesel tija blong helpem hem wetem han blong hem blong i kam strong bakegen afta we hem i bin bangem.
Naoia Alex i nomo sem blong go long klas ia blong toktok gud mo klia. Hem i wantem helpem ol nara pikinini oli filim gud tu. Hem i praktisim blong stap rid wetem Courtney mo stori wetem Tommy long lanj taem. Evriwan i nidim wan smol ekstra help samtaem, mo hem ia i !ORAET!
Mi mi stap tekem ekstra help wetem riding.
Mi mi stap tekem ekstra help long olsem wanem blong wok wetem ol nara man.
Mi mi stap tekem ekstra help blong han blong mi.
Ol pikja droing oli kam long Mark Robison