Jes Raet Saes
Trina i no laekem blong stap defren.
“!Yu yu smol tumas!” Sasha i talem. “Mifala i mas singaotem yu smol Trina.”
Trina i traem blong smael. Ol narafala pikinini long skul oli traem blong jikim hem plante from hem i smol. Hem i bin bon i kam long wol ia olsem wan smol pikinini, mo hem i no groap hariap olsem ol narafala pikinini. Be hem i no laekem nem ia Smol Trina. Hem i no laekem blong stap defren.
“Yu smol tumas ating bae yu nomo save gro ia,” Max i talem taem we oli stap go aotsaed blong brektaem.
“Mi save se mi smol,” Trina i talem. “Be i no gat samting we bae mi save mekem abaot hemia. Ale yumi go pleplei.”
Trina i ron blong plei futbol wetem ol narafala pikinini. Oli kikim balong i go i kam. Evriwan oli stap gat wan gudfala taem tugeta.
Be i no longtaem nomo, Trina i taet tumas. Hem i wokbaot slo i go aot long gem mo sidaon long gras.
I no long taem fren blong hem Josie i kam. Josie i stap tu long Praemeri klas wetem hem long Jos.
“?Yu yu oraet?” Josie i askem.
“Yes,” Trina i talem. “Mi nid blong spel. Lang blong mi i taet taem mi ron tumas. Oli no strong tumas.”
Josie i sidaon long saed blong Trina. Tufala i stap pikimap gras mo stap mekem ol smosmol ring mo ol smol jen blong han. Tufala i stap tokbaot skul, ol fren mo homwok.
Josie i talem, “Mi harem wanem Sasha i talem,” “Mi sori hem i singaotem yu Smol Trina.”
Trina i saksakem hed blong agri.
“!Be mi ting se yu stret saes ia nao!” Josie i talem.
Trina i smael. Hem i givim smol jen we hem i mekem long gras
Long nekis Sandei, Trina i stap rere blong go long jos. Hem i werem dres blong hem mo brasem hea blong hem. Mo afta hem i mekem strong fes long smol sus blong hem insaed long ples blong ol klos. Hem i save gud se i no gat wan insaed long praemeri blong hem i werem smol sus olsem.
Trina i pulpulum leg blong hem taem hem i stap wokbaot insaed long Jos. Taem hem go insaed long Praemeri klasrum, Josie i bin stap wet aotsaed.
“!Mifala gat wan sapraes blong yu!” Josie i talem. “!Kam luk!”
Taem Trina i wokbaot i go insaed long klas, ol narafala pikinini mo tija blong olgeta, sista Bott i stap poen i go long wan bod we oli dekoretem gud. I gat sep blong fulap hat oli putum olbaot long bod ia. I gat ol not insaed long sep blong ol hat we i talem se, “!Trina i gat wan bigfala smael! !Trina i gat wan big hat!”
“Yu yu laekem?” Josie i askem. “Sista Bott i helpem mifala blong mekem hem ia.”
“Mi lavem!” Trina i talem. “Tangkyu.”
“Mifala i wantem blong yu blong tingbaot wan bigfala trutok,” Sista Bott talem. “Papa long Heven i lavem wanwan long yumi. Sot. Longfala. Bigwan. Smol. Hemia i no impoten long Hem. Yumi evriwan i ol pikinini blong Hem, mo Hem i lavem wanwan long yumi.”
Trina i lukluk i go long bod mo i smael—bigwan.
Ol pikja oli kam long Olga Lee