Wan Smol Storian wetem Xiomara abaot Stap Niu long Yang Woman
Xiomara (oli talem she-o-MA-ra) hem i blong Jiapas, wan stet long saot Meksiko. Hem i jes muv i go long Yang Woman.
Faswan, mifala i wantem kam blong save yu.
?Wanem nao yu stap mekem blong gat gudtaem?
Ronron long baeskel blong mi, plei futbol, mo kuk. Wanem we mi laekem tumas blong kukum hem i tako.
“?Wanem fevret kala blong yu?”
Yelo.
?Wanem nao yu bin stap luk fored fored from tumas blong stap muv aot long praemeri i kam long Yang Woman?
Mi glad tumas blong go long tempol mo mekem ol baptaes.
?Olsem wanem nao yu filim abaot fastaem blong yu blong go long Yang Woman?
Fastaem i bin had. Mi bin wari abaot wanem nao ol bigfala gel oli tingting long mi. Mi bin fraet smol kasem taem we mifala evriwan i go tugeta long tempol. Long taem ia nao mifala i bin kam ol gudfala fren.
?Yu bin filim olsem wanem long fastaem we yu go long tempol?
Hem i bin spesel tumas. Blong stap go insaed long tempol blong Lod, hem i wan eksperiens long saed blong spirit. Oltaem mi bin stap wantem blong go long tempol. Long Praemeri mifala i singsing, “Mi lavem blong luk tempol. Wan dei bae mi go ia.” Nao ia mi save talem “Mi laekem tumas blong go long tempol.”
Fastaem ia insaed long tempol, mi mekem baptaes blong sam long ol anti blong mi, sam famli blong apu woman blong mi (long saed blong mama blong mi) mo sam narafala man we mi no save. Tempol mo famli histri oli pat blong testemoni blong mi.
?Wanem nao sam long ol aktiviti we i mekem yufala i gat gudtaem, we yu bin mekem wetem grup blong Yang Woman blong yu?
!Stap mekem ol kuki! Mifala i mekem 150 kuki. Afta mifala i serem wetem ol narafala man. Ol aktiviti i blong Yang Woman oli gud tumas. Oli fulap long ol gudfala lesen, givim strong tingting, mo helpem yumi blong wan dei yumi kam ol misinari.
?I gat eni nara gel insaed long wod blong yu we i gat semmak yia olsem yu?
Mi nomo. l.Mi tu mi wan memba nomo blong Jos insaed long klas long skul blong mi.
?Hem i had blong stap olsem wan memba ia nomo blong Jos long skul?
No. Evri fren blong mi oli save se mi stap folem wan defren relijin long olgeta, be oli tritim mi olsem se mi semmak nomo long olgeta.
?Wanem nao yu laekem tumas abaot blong stap insaed long Yang Woman?
Mi laekem blong lanem moa abaot Sevya mo plan blong sevem man. Hem i wan bigfala blesing blong mekem famli histri wok. Mi laekem blong mekem ol tempol baptaes blo givim hop long ol famli blong yumi we oli lego wol ia finis.
!Mi laekem tumas blong stap insaed long program blong Yang Woman!
Ol droing oli kam long Alyssa Tallent