O Le Tusi Faapitoa
“O lou taimi e faitau ai, Papa,” o le tala lea a Bernice. Sa ia tatalaina tusitusiga paia. Sa saofafai Mama ma Papa i ona autafa i luga o le nofoa.
Sa faitau e Papa le mau muamua. “Ua ou iloa e alofa o ia i ana fanau.”
“Ua ou iloa e alofa o ia i ana fanau,” na toe fai atu ai Bernice.
“E ui i lea,” o le tala lea a Papa, “ou te le iloa le uiga o mea uma.”*
E ui i lea o se upu faigata. Sa le’i mafai ona faitau Bernice, ma na te le’i iloa po o le a le uiga o upu uma. Ae sa fiafia o ia e toe fai atu upu pe a faitau faatasi e lona aiga ia tusitusiga paia.
O le aso na sosoo ai i le taimi o tusitusiga paia, sa i ai se meaalofa a Papa. “E i ai sa’u meaalofa faapitoa mo oe,” na fai atu ai Papa. Sa ia tuuina atu ia Bernice se tusi. Sa i ai se ata o tagata ma se vaa i le pito i luma.
“O le mea lena mo a’u?” Sa fesili atu ai Bernice. Sa ia opoina le tusi tele i ona lima.
“Mo oe,” o le tala lea a Papa. “Autilo i totonu.”
Sa tatala e Bernice le tusi. Na faalapopoa ona mata. Sa tele le mau ata felanulanua’i.
“O le a lona ta’uina?” Sa fesili atu ai Bernice.
Sa tusi atu Papa i upu o loo i luga o le faavaa. Tala o le Tusi a Mamona,” na ia fai mai ai.
Sa toe tusi e Bernice upu o loo i luga o le faavaa. Tala o le Tusi a Mamona,” na fai mai ai.
“E tutusa lava tala o loo tatou faitau i ai i tusitusiga paia,” o le tala lea a Mama.
Sa tusi atu Bernice i se tasi o ata. “O ai lena?” sa ia fesili ai.
“Aaa. O e vaai i le aufana ma aū?” O le fesili lea a Mama.
Sa luelue le ulu o Bernice.
“E te manatua le faitau ai e uiga i se tasi sa gau lana aufana?” Sa fesili atu ai Papa.
“Nifae?” Sa fai atu ai Bernice.
“Ioe, o Nifae lena,” o le tala lea a Papa.
Sa ataata Bernice. “Faafetai lava, Papa. Faafetai lava, Mama. Ou te fiafia i lenei tusi.”
O po taitasi, e faitau ai e Bernice lana tusi o tusitusiga paia faatasi ma Mama ma Papa. Sa ia tusi atu i ata. Sa ia aoao e fai atu ni upu faigata. Ma sa ia aoao e faitau na o ia ni upu faigofie!
O le faitauina o tusitusiga paia sa fiafia ai foi o ia. Sa fiafia o ia ona sa mafai ona ia faitauina faatasi ma Mama ma Papa!
Ata na tusia e Adam Record