O le Telē Sa’o Lava lea
Sa le’i fiafia Trina i le ese mai ai.
“E te laitiiti tele!” Na fai atu ai Sasha. “E tatau ona valaau oe o Tama’i Trina.”
Sa taumafai Trina e ataata. Sa taufaalili atu isi tamaiti i le aoga ia te ia ona o lona laitiiti. Sa fanau mai o ia e laitiiti, ma sa le’i vave tele lona tuputupu a’e e pei o isi tamaiti. Ae sa le fiafia o ia i le igoa o Tama’i Trina. Sa le’i fiafia o ia i le ese mai ai.
“E matua’i laitiiti lava oe atonu e te le tuputupu a’e lava,” o le tala lea a Max a o latou o atu i fafo mo le malologa.
“Ou te iloa ou te laitiiti,” o le tala lea a Trina. “Ae e leai se mea e mafai ona ou faia i ai. Ta o e taaalo.”
Sa tamoe Trina e taalo soka ma isi tamaiti. Sa latou kikiina atu ma kikiina mai le polo. Sa latou maua uma le fiafia faatasi.
Ae e le’i umi ae matua lelava lava Trina. Sa ia savali lemu ese mai le taaloga ma nofo i lalo i luga o le mutia.
E le’i umi ae sau lana uo o Josie. Sa i ai foi Josie i lana vasega Peraimeri i le lotu.
“O a mai oe?” Sa fesili atu ai Josie.
“Ioe,” o le tala lea a Trina. “E manaomia ona ou malolo. E vaivai o’u mamā pe a ou tamoe soo. E le malolosi tele.”
Na nofo ifo Josie i talaane o Trina. Sa la’ua tau le mutia ma fai ai ni mama laiti ma taulima. Sa la talanoa e uiga i le a’oga ma uo ma meaaoga.
“Sa ou faalogo i le tala a Sasha,” o le tala lea a Josie. “Ou te faamalie atu sa ia valaau atu ia te oe o Tama’i Trina.”
Sa na o le lue atu o le ulu o Trina.
“Ae ou te manatu o le telē sa’o lava lea e iai oe!” Sa fai atu ai Josie.
Sa ataata Trina. Sa ia tuuina atu ia Josie le taulima mutia sa ia faia.
O le Aso Sa na sosoo ai, na sauni ai Trina mo le lotu. Sa ia ofuina lona ofu ma selu lona lauulu. Ona ia faanonō lea i ona tama’i seevae i totonu o le kapoti. Sa ia mautinoa e leai se isi tagata i lana vasega Peraimeri na laeiina ni seevae laiti faapena.
Sa faatotoso mai vae o Trina a o savali atu o ia i lalo o le potu tele i le lotu. Ina ua ia taunuu i lona potuaoga o le Peraimeri, sa faatalitali mai ai Josie i fafo.
“E i ai se mea matou te faaofo ai oe!” Sa fai atu ai Josie. “Sau e vaai!”
Ina ua savali atu Trina i totonu o le potu, o isi tamaiti ma lo latou faiaoga, o Sister Bott, sa tusi atu i se laupapa teuteuina susulu. Sa i ai ni fatu na faapipii atoa i ai. Sa i ai ni faamatalaga i fatu na faapea mai, “E ataata tele Trina! E telē le loto o Trina!”
“E te fiafia i ai?” o le fesili lea a Josie. “Sa fesoasoani Sister Bott ia i matou e faia.”
“Ou te fiafia i ai!” o le tala lea a Trina. “Faafetai lava.”
“Sa matou mananao e faamanatu atu ia te oe se upumoni tele,” o le tala lea a Sister Bott. “E alofa le Tama Faalelagi ia i tatou taitoatasi. Puupuu. Umi. Telē. Laitiiti. E le afaina lena mea ia te Ia. O i tatou uma o Ana fanau, ma e alofa o Ia i tagata uma taitoatasi.”
Sa tilotilo a’e Trina i luga o fatu i luga o le laupapa ma se ataata—lapoa.
Ata na tusia e Olga Lee