Ko e Kiʻi Tohi Fakafiefiá
Naʻe pehē ange ʻe he Tangataʻeikí, “ʻOku ʻi ai e taimi ʻe niʻihi ʻoku manavasiʻi ai e kau faiakó.”
“ʻOku talitali lelei ʻa kimoutolu kotoa ki he kalasí.”
Naʻe sio hake ʻa Laila ki heʻene faiako foʻoú mo malimali. Naʻe kei siʻi ange ia ʻi heʻene kau faiako kehé. Naʻe ongo lelei mai ʻene leá. Naʻá ne [taletale ke lava ʻo ongo lelei mai hono leʻó] peá ne hoko atu.
“Ko Mr. Pēlíti au.”
Naʻe hiki hake ʻe ha tokotaha ako hono nimá. Naʻá ne fehuʻi ange, “ʻOkú ke foʻou [mai ki heni]?”
“ʻIo. Ne u toki ʻosi pē mei he ʻunivēsití. Ko ʻeku fuofua kalasí pē [kimoutolu].”
Naʻe fakamatalaʻi leva ʻe Mr. Pēliti ʻa e meʻa ʻe ako ki ai e kalasí. Naʻá ne lea leʻo siʻi. Naʻe faingataʻa he taimi ʻe niʻihi ke fanongo kiate ia.
Naʻe lava ʻa Laila ʻo fanongo ki he fanafana ʻa e fānaú ʻi hono tuʻá. Naʻe toe faingataʻa ange ai ke fanongo ki he meʻa naʻe lea ʻaki ʻe Mr Pēlítí. Ka naʻe fai ʻe Laila hono lelei tahá ke fakafanongo. ʻI he sio atu ʻa Mr. Pēliti kiate iá, naʻá ne malimali.
ʻI he maʻu meʻatokoni efiafi he pō ko iá, naʻe fehuʻi ange ʻe he Fineʻeikí fekauʻaki mo e ʻuluaki ʻaho ʻo Laila ʻi he akó.
Naʻe pehē ʻe Laila, “ʻOku ou saiʻia heʻeku ngaahi kalasí mo ʻeku kau faiakó. ʻOku ʻi ai haʻamau faiako foʻou ʻe taha. Naʻá ne kiʻi tailiili. Naʻe fakakata ʻaki ia ʻe ha niʻihi ʻo e fānaú.”
Naʻe pehē ange ʻe he Tangataʻeikí, “ʻOku ʻi ai e taimi ʻe niʻihi ʻoku manavasiʻi ai e kau faiakó.”
Naʻe malimali ʻa e Fineʻeikí. “ʻOku ou fiefia ʻi hoʻo ʻi aí ke tokoniʻi ia.”
ʻI he ʻaho hono hokó, naʻe fanongo ʻa Laila ki he talanoa ʻa ha fānau ʻe niʻihi ʻi he holó.
Naʻe pehē ʻe ha taha ʻo kinautolu, “ʻOku ou [kalasi] foki mo Mr. Pēliti. Naʻe ʻikai ke u lava ʻo fanongo kiate ia ʻaneafi.
Naʻá ke fanongo nai ki hono leʻó?”
Naʻe pehē ange ʻe ha kiʻi tamasiʻi ʻe taha, “Ko ha taʻu lōloa ʻeni.” Naʻa nau kakata kotoa.
Naʻe fakakaukau ʻa Laila ki he meʻa naʻe lea ʻaki ʻe he Tangataʻeikí fekauʻaki mo e manavasiʻi ʻa e kau faiakó. Ko ʻaneafí ko e ʻuluaki ʻaho ia ʻo Mr. Pēliti he akó. Mahalo naʻe fakailifia ʻaupito ia. Naʻe talaange ʻe he Fineʻeikí ke poupou ki ai. ʻE lava fēfē nai ʻe Laila ʻo fakahoko ia?
ʻI he fai ʻe Laila ʻene lotú he pō ko iá, naʻá ne kole ki he Tamai Hēvaní ke fakahā ange muʻa ʻa e founga ke tokoniʻi ai ʻa Mr. Pēlití.
ʻI he ʻaho hono hokó, naʻe fakaava ʻe Laila ʻene kai hoʻataá. Naʻe ʻi loto ha kiʻi tohi mei he Fineʻeikí. Naʻe pehē, “ʻOkú ke sai ʻaupito!” Naʻe malimali ʻa Laila. Naʻá ne saiʻia ʻi he fanga kiʻi tohi ʻa e Fineʻeikí. Naʻe ui kinautolu ʻe hono fāmilí ko e “fanga kiʻi tohi fakafiefia.”
Ko e meʻá ia! ʻE lava ke fai ʻe Laila mo hono kaungāakó ha kiʻi tohi fakafiefia kia Mr. Pēliti!
Naʻe fakaafeʻi ʻe Laila ha niʻihi ʻo hono kaungāakó ke nau fakataha ki hono ʻapí ʻi he tuku ʻa e akó. Naʻa nau teuteuʻi ha pousitā lahi mo ngingila ʻaki ha ngaahi fofonga malimali mo ha ngaahi fetuʻu. Naʻa nau tohi ha ngaahi meʻa naʻa nau saiʻia ai ʻia Mr. Pēliti. Naʻa nau tohi ha ngaahi meʻa kuo nau ʻosi ako meiate ia. Pea naʻa nau talaange naʻa nau fiefia ʻi heʻene hoko ko ʻenau faiakó.
ʻI he ʻaho hono hokó, naʻe aʻu vave atu ʻa Laila mo hano ngaahi kaungāmeʻa tokosiʻi ki he akó. Naʻa nau tautau ʻa e pousitaá ʻi he matapā ʻo e lokiako ʻo Mr. Pēlití. Hili iá naʻa nau toitoi ʻi he tulikí ke sio ki he meʻa naʻe hokó.
Ne ʻikai fuoloa kuo aʻu atu ʻa Mr. Pēliti ki hono lokiakó. Naʻá ne pehē, “ʻOi!” Naʻe siofi ia ʻe Laila mo hono kaungāakó ʻi heʻene lau ʻenau ngaahi tohí. Naʻá ne malimali fiefia.
ʻI he mamata ʻa Laila ki heʻene fiefiá, naʻá ne ongoʻi fiefia foki mo ia. Naʻá ne mamali pea tā nima mo hono kaungāakó.
ʻI heʻenau mavahé, naʻe fanongo ʻa Laila ki ha taha ʻoku pehē, “ʻOku ʻikai ke u faʻa tatali ke ʻalu ki he kalasi ʻa Mr. Pēlití he ʻahó ni!” Naʻe ʻikai foki ke faʻa tatali ʻa Laila.
Ngaahi tā fakatātā ʻa Kübra Teber