Ko e Fakapalakū [ʻaki e] Foʻimoá
Naʻe teka hifo ha foʻi moa ʻe taha mei he tēpilé. Tau!
Naʻe vilo takai ʻa Sasa ʻi hono piva lanu pingikī mālohí. Ko e vala ia naʻá ne saiʻia taha ai ke tui ki he lotú. Pea kuo taimi ʻeni ki he konga ʻokú na saiʻia taha ai he lotú. Palaimelí!
Naʻe tokoniʻi kinautolu ʻe he faiako ʻa Sasá ke nau ako ʻa e Ngaahi Tefito ʻo e Tuí. Naʻa nau ako he ʻahó ni ʻa e fika 13. Naʻe lōloa ia! Ka naʻe pehē ʻe Sisitā Pani, “ʻOku ou ʻilo te mou lava ʻo ako ʻa e konga ʻuluakí. ‘ʻOku mau tui ʻoku totonu ke faitotonu.’ Lea fakataha mo au!”
Naʻe pehē ʻe Sasa mo e fānau kehé, “ʻOku mau tui ʻoku totonu ke faitotonu.”
Kimui ange ʻi he uike ko iá, naʻe vaʻinga ʻa Sasa mo hono kiʻi tuongaʻane siʻisiʻi ko ʻAlifeletí ʻi peito. Naʻe pehē ange ʻe ʻAlifeleti, “ʻOku ou taʻeoliʻia.”
“Mo au foki.” Naʻe sio atu leva ʻa Sasa ki ha ngaahi foʻimoa ʻi he funga tēpilé. Naʻe ngali fakalata ke vaʻinga aki kinautolu. “Hei, ʻoku ʻi ai ʻeku fakakaukau. ʻI he taimi ní fai ha kiʻi vaʻinga!”
Naʻe toʻo hake ʻe Sasa ha foʻimoa. Naʻá ne talaange kia ʻAlifeleti, “Tuʻu ʻi he tafaʻaki ʻe taha ʻo e tēpilé.” Naʻá ne tekaʻi leva ʻa e foʻimoá ki ai. Naʻe kata ʻa Sasa mo ʻAlifeleti. Naʻe fuʻu fakaʻofoʻofa ʻaupito ʻa e foʻimoá!
“Ko koe eni.” Ko Sasa ange ia.
Naʻe toe tekaʻi fakafoki mai ʻe ʻAlifeleti ʻa e foʻimoá ki ai. Ka ʻi he taimi ko ʻení, naʻe ʻikai ke teka hangatonu ʻa e foʻimoá. Ka naʻe afe ia ʻo tō mei he tēpilé he taimi pē ko iá. Tau! Naʻe tō ʻa e foʻimoá ki he falikí, ʻo aape palakū ai.
Naʻe sio mataʻi ʻohovale atu ʻa ʻAlifeleti kia Sasa. Naʻá na fakatou kakata. Naʻá ne pehē mai, “Ta toe ʻai pē ia!”
Naʻe toe toʻo mai ʻe Sasa ha foʻimoa ʻe taha. Naʻá ne pehē mai, “Puke ia naʻa tō ki lalo!” Naʻá ne tekaʻi ʻa e foʻimoá ʻo mālohi ange ʻi he meʻa naʻá ne fai kimuʻá. Naʻe ʻikai maʻu ia ʻe ʻAlifeleti. Tau!
Naʻe toe toʻo mai ʻe ʻAlifeleti ha foʻi moa ʻe ua. Naʻá ne tekaʻi vave ange kinaua. Naʻe ʻikai lava ʻe Sasa ʻo taʻofi vave kinaua. Tau! Tau! Naʻe toe makiʻikiʻi ʻa Sasa mo ʻAlifeleti.
Naʻe fanongo atu leva ʻa Sasa ki he haʻu ʻa e Fineʻeikí. ʻOiauē, ʻikai! [ʻE kau kovi ia kiate kinaua]!
Naʻe ʻikai loto ʻa Sasa ke ʻita ange ʻa e Fineʻeikí kiate kinaua. Mahalo te na lava ʻo faʻu ha foʻi talanoa [loi]. ʻE lava ke ne talaange ki he Fineʻeikí naʻe ʻikai ko kinaua naʻá na ʻaí.
Ka naʻe manatuʻi leva ʻe Sasa ʻa e tefito ʻo e tui hono hongofulu mā tolú. “ʻOku mau tui ʻoku totonu ke faitotonu.”
“Ko e hā e meʻa ne hokó?” Ko e fehuʻi ange ia ʻa e Fineʻeikí. Naʻá ne sio fakamamaʻu ki he faliki palakuú. “Ko hai naʻá ne fahi e foʻimoá?”
Naʻe mihi ʻe Sasa ʻene mānavá. “Kātaki fakamolemole, Fineʻeiki. Ko au mo ʻAlifeleti. Naʻá ma fakakaukau naʻe ngali fakafiefia ke vaʻinga ʻaki e foʻimoá. Ka naʻe ʻikai ko ha fakakaukau lelei ia. Te u tokoni ke fakamaʻa [ia].”
Ne pehē atu ʻa ʻAlifeleti, “Mo au pē.”
Naʻe fāʻofua ʻa e Fineʻeikí kia Sasa mo ʻAlifeleti. “Mālō hoʻomo talamai ʻa e moʻoní.”
Naʻe malimali ʻa Sasa. Naʻá ne tafoki leva kia ʻAlifeleti. “Mahalo te tau lava ʻo faʻu ha foʻi vaʻinga foʻou—fekauʻaki mo e fakamaʻá!”
Ngaahi tā fakatātā ʻa Valentina Belloni