Tohi ʻe Koe

Ko e Fili ki he Soká

ʻAisake E., taʻu 8, Iukatani, Mekisikou

Naʻá ku manako ʻi he vaʻinga soká ʻi heʻeku timi fakaakó. Ka naʻe ʻikai ke u lava ʻo ʻalu ki he ngaahi vaʻinga lahi koeʻuhí he naʻe fakahoko kinautolu ʻi he ʻaho Sāpaté. Naʻá ku loto ke tauhi e ʻaho Sāpaté ke māʻoniʻoni.

Naʻe ʻeke mai ʻe heʻeku faiakó ʻi ha ʻaho ʻe taha pe ko e hā naʻe ʻikai ke u haʻu ai ki he vaʻingá he Sāpaté. Naʻá ku fakamatalaʻi ange ko ha mēmipa au ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Naʻá ku talaange ko e Sāpaté ko ha ʻaho makehe ia kiate au. ʻOku ou fai pē ʻa e ngaahi meʻa ʻoku nau tokoniʻi au ke u manatuʻi ʻa Sīsū Kalaisi mo toe ofi ange ai kiate Iá. Naʻe pehē ʻe he faiakó kimui naʻe fai ha vaʻinga he Sāpate hono hokó. Naʻá ku talaange he ʻikai ke u ʻi he vaʻingá. Naʻe pehē ʻe he faiakó ʻoku sai pē ia pea ʻoua ʻe hohaʻa.

Hili ha ngaahi miniti siʻi mei ai, naʻe kole ʻe he faiakó ke tokanga ange e tokotaha kotoa pē. Naʻe liliu ʻa e taimi vaʻingá ki he Tokonakí! Naʻá ku ongoʻi fiefia.

Hili e akoakó, ne haʻu ha kiʻi tamasiʻi ʻo pehē mai, “Mālō aupito!” Naʻá ku fehuʻi ange pe ko e hā naʻá ne fakamālō mai aí. Naʻá ne pehē mai, “ʻOku ou ʻalu foki mo au ki he lotú he Sāpaté. ʻOku ou houngaʻia ʻi hoʻo fakamatala ki he faiakó hoʻo tuí. Naʻe ʻikai ke u mei ʻalu mo au ki he vaʻingá.” Hili e ʻaho ko iá, naʻá ku kaungāmeʻa lelei ʻaupito mo e kiʻi tamasiʻí.

Naʻá ku maʻu mei he aʻusia ko ʻení ha kaungāmeʻa foʻou mo ha faingamālie ke ʻalu ki he vaʻingá. ʻI he taʻu hono hokó, naʻá ku hoko ko e kapiteni ʻo e timi soka hoku ʻapiakó. Ka ko e meʻa lelei taha kuó u akó ko e faivelenga maʻu pē ki he ʻEikí. Kapau te u faivelenga kia Sīsū Kalaisi, te Ne tāpuakiʻi maʻu pē au.

Tā fakatātā ʻa Josh Talbot