“E dua na iSolisoli Talei,” iTokani, Okosita 2023, 18–19.
E Dua na iSolisoli Talei
“Oqo beka na Yalo Tabu,” e a vakananuma o Mehrimah.
Na italanoa oqo a yaco mai Varanise.
“Mehrimah! Fatima! “E rau tiko qo na daukaulotu,” a kaci yani o Nana.
A sogota o Mehrimah na nonai vola italanoa ni ivolanikalou ka cici yani kina rumu ni gade. Rau sa vakavulica tiko na daukaulotu na nodratou matavuvale baleti Jisu Karisito. O Mehrimah kei na nona matavuvale eratou sa na vakarau papitaiso tiko. A sega ni rawa ni wawa!
E dabe sobu o Mehrimah kei na nona matavuvale.
“Nikua edatou na veivosaki tiko me baleta na Yalo Tabu,” a kaya o Elda Moea’i. “E vukei keda o Koya meda vakila na vakacegu kei na veivakacegui mai vua na Tamada Vakalomalagi.”
“E vakauqeti keda talega o Koya meda cakava na veika vinaka,” a kuria o Elda Campbell. “E vukei keda o Koya meda kila na ka dina. O sa na rairai vakila oti beka na Yalo Tabu mai liu.”
A vakasamataka o Mehrimah na gauna a vulica kina me baleta na iVola i Momani. A vakila o koya na vakacegu kei na marau. Oqori na sala a kila kina ni dina. “O ya beka na Yalo Tabu?
“Ni oti nomu papitaiso, ena soli vei iko na isolisoli ni Yalo Tabu,” a kaya o Elda Moea’i. “Sa kena ibalebale ni o Koya e rawa ni dau tiko vata ga kei iko me vukei iko ka tuberi iko.”
“Ena macawa oqo, wanonova matua sara na nomu vakanananu kei na veika o vakila,” a kaya o Elda Campbell. “Vakaraica na gauna ena dau vosa kina vei iko na Yalo Tabu.”
Ena bogi oya ni ratou masu vakamatavuvale, a vakila o Mehrimah e dua na ka e lomana. A vakila na lomavakacegu kei na veivakacegui. A vaka sara ga ni dua a mokoti koya tiko. Oqo beka na Yalo Tabu, e a vakananuma o koya.
Ena lotu ena Sigatabu, a vakarorogo o Mehrimah ki na dua na sere baleti Jisu Karisito. A vakila o koya na marau. A vakavuna me vinakata o koya me vukei ira na tamata tale eso. Oqo tale beka ga na Yalo Tabu, a vakananuma o koya.
Ni bera na moce, a wilika o Mehrimah na nonai vola ni italanoa ni volanikalou. Na tacina, o Fatima, a kerea talega me wiliwili. O Mehrimah a kaya sega.
A wiliwili tikoga o Merimah. Ia a ca sara ga na lomana ni sega ni veiwasei.
“Vosoti au,” a kaya vei Fatima. “Vinakata medaru wiliwili vata?”
A dabe e yasana o Fatima. Rau veivukevuke ena wiliwili. A vakila o Mehrimah na katakata kei na marau. Oqo beka na Yalo Tabu, e a vakananuma o koya.
Sa qai yaco mai na siga ni nodratou papitaiso. Eratou lako kina vale ni Lotu o Mehrimah kei na nona matavuvale ka veisau kina isulu vulavula.
A papitaiso e liu o Mehrimah. A batabata na wai, ia a marau me cakava e dua na veiyalayalati kei Tamada Vakalomalagi. E ologi koya o Nana ena dua na itawelu. A qai saravi Nana, Tata, kei Fatima ena nodratou papitaiso.
E veisau lesu o Mehrimah ki na nona isulu mamaca. Oqo sa kena gauna me vakadeitaki kina o koya.
Rau tabaka na ului Mehrimah na daukaulotu. “Keirau sa vakadeitaki iko mo dua na lewe Ni Lotu i Jisu Karisito ni Yalododonu Edaidai,” a kaya o Elda Campbell, “ka kaya vei iko, mo ciqoma na Yalo Tabu.” Sa vakila o Mehrimah ni katakata na yagona taucoko ni vakarogoca tiko na vo ni veivakalougatataki.
Ni oti na vakadeitaki nei Mehrimah, e a mokoti koya o Nana. “O sa vakacava tiko?”
“Vinaka dina,” e kaya o Mehrimah. “Ni rau sa tabaka na uluqu, au a vakila e dua na ka, ka vaka na vakacegu.” A matadredredre o koya. “E vaka ni dua a tukuna tiko vei au me’u bulataka e dua na bula vinaka, ka muria na ivakaro.”
O kila beka na ka o a vakila tiko?” A taroga o Nana.
“Io, e vakakina,” a kaya o Mehrimah, ka ramase mai na matana. “Oya na Yalo Tabu!”
Droini mai vei Alyssa Petersen