“Na iTaube Caliva,” iTokani, Okosita 2023, 42–43.
Na iTaube Caliva
A vinakata ga o Carolina me maroroya tale vakalailai na itaube.
Na italanoa oqo a yaco e Argentina.
A lakova yani vakatotolo na lomanibai o Carolina. E a tiko e tautuba na nona itokani o Isabella.
E a yaloyalo mai o Isabella. “Mai qito!”
A takosova o Carolina na lomanibai ki na vale nei Isabella.
Sa tatara ki nona taga o Isabella. “Au vinakata me’u vakaraitaka vei iko e dua na ka,” a kaya o koya. Sa qai ucuna mai o koya na itaube totoka duadua se qai bau raica o Carolina! E ra a caliva ka ramase na kena veivatu talei.
“E nei noqu mamá,” a kaya o Isabella. “E kaya o koya ni rawa ni’u qitotaka nikua. Raica ena rarama ni siga.”
E a dulaka cake o Isabella na itaube ki na rarama. E drau na drodrolagi era a viritaki mai na vatu talei. A sa totoka dina!
“Daru qitotaka mada na vuni kei na vakasaqara!” A kaya o Isabella.
“Sa donu,” a kaya o Carolina. “Au rawa ni veivuke me taqomaki vinaka na itaube.”
“Vinaka vakalevu!” A solia o Isabella vei Carolina na itaube, ka biuta sara o Carolina ki na nona taga.
Sega ni dede sa yaco mai na gauna me lako kina i vale o Carolina. Ni vakamoce o koya, a sega ni taroga o Isabella na itaube. E rairai a guilecava. Ka sega ni vakananuma vua o Carolina.
E a ca vakalailai na loma i Carolina ena nona kauta na itaube ki vale. Ia a vinakata o koya me tiko mada ga vua vakalailai tale. A sega ni kauwaitaka o koya na ca ni lomana ka biuta na itaube e ruku ni nona ilokoloko.
Na siga e tarava a Siga Vakarauwai. A cakava na nona cakacaka o Carolina ka lako i tuba me laki qito. Sa guilecava vakadua o koya na itaube.
“Carolina!” A kaci o Papá. E rawa ni o lako mada mai?”
E a cici yani i loma o Carolina. “Io?”
A taura tu o Papá na itaube e ligana. “A kunea o Mamá ena ruku ni nomu ilokoloko na ka oqo. E nei cei beka?”
“E nei Isabella.” E a tonawanawa na wainimata i Carolina. “Au a maroroya vinaka tiko ena noqu taga ni keirau qito tiko ena noa. Ia au a mani lewa me’u kauta i vale.”
A dabe sobu o Mamá vata kei Carolina e na idabedabe. “Vinaka vakalevu na tukuna na dina. “Na cava o nanuma ni dodonu mo cakava qo?”
E a galu o Carolina. A vakasamataki Jisu. Ena vinakata o Koya vei au me’u lomadina ka vakasuka na itaube.
“E dodonu me’u solia lesu vei Isabella ka tukuna vua ni’u cala,” a kaya o Carolina. Ena gauna ga e kaya kina, a yali sara na ca ni lomana. A vakila na katakata e lomana.
A gole o Carolina ki na vale nei Isabella.
“Bula,” a kaya o Carolina. A solia vei Isabella na itaube. “Vosoti au ni’u a maroroya tiko. E rawa beka ni ko na vosoti au?”
“Io” a kaya o Isabella. “Vinaka vakalevu nomu kauta lesu mai.” A qai matadredre o koya. “O via qitotaka tale na vuni kei na vakasaqara?”
“Io! Mo wiliwili iliu—au na laki vuni!”
Ena bogi oya, a cabora o Carolina e dua na masu. “Tamaqu Vakalomalagi lomani, yalovinaka ni vosoti au ni’u a taura tiko na itaube. Vinaka vakalevu na nomuni vukei au me’u vakadodonutaka.”
A vakila tale o Carolina na katakata e lomana. A marau o koya ni rawa ni cakava na veika e vinakata vua o Jisu me cakava.
Droini mai vei Sue Teodoro