“Na Tavaya Ni Wai Kavoro,” iTokani, Okosita 2023, page–page.
Na Tavaya Ni Wai Kavoro
A karamaca o Kadie. E rawa vakacava ni veivuke o Sophia?
Na italanoa oqo a yaco mai Sierra Leone.
A vakarorogo matua sara o Sophia ni vakamacalataka tiko o nona qasenivuli na leqa vaka-fika ena papa ni volavola.
“Na cava na ciwa me vakalevutaki vaka va?” a taroga o qasenivuli.
A laveliga o Sophia. “Tolusagavulu ka ono,” a kaya o koya.
A matadredredre na nona qasenivuli. “E dina qori, Sophia!”
Ni oti na kalasi, sa kena gauna me caka na lako ivale. A lako vata kei ira nona itokani o Sophia. Era a dui ucuna mai na medra tavaya wai me ra gunuva na iotioti ni medra wai. A katakata dina ni kua!
Ia a raica o Sophia e dua na ka matalia. Na nona itokani o Kadie a sega ni gunu wai tiko. A taubale galugalu tikoga o koya.
“Kadie, evei na nomu tavaya ni wai?” A taroga o Sophia. O ira kece era dau karamaca ni voleka ni suka na vuli.
“Au a voroka ena noa, kau sega ni rawa ni vakaisosomitaka,” a kaya o Kadie. “Ia oqo au sa sega ni rawa ni kau wai mai ki koronivuli.”
A raica sobu o Sophia na nona tavaya ni wai. A diva me rawa ni wasea! Ia sa maca taucoko na mena wai.
Ena siga taucoko, o Sophia e a vakasamataki Kadie tikoga kei na nona tavaya ni wai kavoro. E sega ni rawarawa me kunei na wai savasava ena vanua eratou tiko kina. E vuqa na gone a tiko vei ira e dua ga na tavaya ni wai mera vakayagataka ena yabaki taucoko. Era dau vakatawana mai na dua na itawatawa levu ni wai savasava mai vale. E rawa nio tauvimate ena gunuvi ni wai tale eso. Kevaka e sega ni dua na tavaya ni wai nei Kadie, ena sega ni rawa ni kau wai mai vale me mai gunuva e koronivuli.
Ena mataka ka tarava, a vakasamataka o Sophia na sala e rawa ni vukei Kadie kina. E tiko ena matavuvale nei Sophia eso na tavaya palasitika ka sinai tu ena wai. E a biuta e dua o Sophia kina nona katodreketi, vata kei na nona tavaya kaukamea. E a vakabibitaka vakalailai na kato, ia a sega ni kauwaitaka.
Ni yaco ki vuli, a kunei Kadie sara.
“Kadie, sa dua tale beka na nomu tavaya ni wai vou?” A taroga o Sophia.
A kure ulu o Kadie ni rai sobu tiko.
“Kua ni leqa,” a kaya o Sophia. “E tiko vei au e dua me nomu!”
E a solia vei Kadie na tavaya wai. A matadredredre o Kadie.
“Vinaka vakalevu, Sophia!” E a mokoti nona itokani o Kadie.
Ena gauna ni kalasi, e gunu mai na nona tavaya ni wai o Kadie vata kei ira na vo ni gone. A marau o Sophia me raici nona itokani ni sega ni karamaca.
Ena veisiga ena macawa oya, e dau kauta mai o Sophia e dua tale na tavaya wai vei nona itokani. Ia ena dua na mataka, a laveta cake o tinai Sophia na katodreketi.
“Mmm,” a kaya o Na. “E vaka e bibi cake oqo mai na kena ivakarau eliu.” A dolava na katodreketi ka dreta mai na ikarua ni tavaya wai.
“O nakita na nomu tawana na tavaya wai oqo ki koronivuli, Sophia?’ A taroga o Na.
A deguvacu o Sophia. “Sa kavoro na tavaya ni wai nei Kadie, ka sega ni rawa ni vakaisosomitaka. Ka sega ni rawa me dua kina na mena wai e koronivuli.”
“Sa vakacava na dede ni nomu kauta tiko e dua tale na tavaya wai vua?” A taroga o Na.
“Ena macawa ga oqo, a kaya o Sophia. “Au sega ni vinakata me karamaca o Kadie.”
A matadredre o Na. “O sa yalovinaka dina ena nomu nanumi nomu itokani. Oqori e dua na ka ena cakava o Jisu. Au marau meu raici iko mo vakataki Jisu.” A mokoti Sophia o koya. “Kau nanuma niu kila e dua tale na sala edaru rawa ni veivuke kina.”
A solia vei Sophia o Na e dua na tavaya ni wai kaukamea. “Solia oqo vei nomu itokani me rawa vua me na vakayagataka tikoga. Oqori na sala o na sega ni kauta tiko kina e dua na ka palasitika e veisiga.”
“E dina?” A taroga o Sophia.
A deguvacu o Na. “Io. Kerei koya ga me maroroya vinaka.”
A kauta o Sophia na tavaya ni wai ki koronivuli. Na imatai ni ka a cakava oya me solia vei Kadie na tavaya.
“Isa,” a kaya o Kadie. “Vinaka vakalevu, Sophia!” A mokoti koya o Kadie.
A vakila o Sophia na katakata ni lomana. E kila o koya ni a vukei nona itokani, me vaka ena cakava o Jisu.
Droini mai vei Melissa Kashiwagi