“Sega Ni Tiko Duadua,” iTokani, Okosita 2023, 22–23.
Sega Ni Tiko Duadua
Ena vakaeveitaki ke mavoa tale o Ethan ena gauna e sega ni dua e tiko e kea me veivuke?
Na italanoa oqo a yaco e Amerika.
E vakayagataka o Ethan na yavana me yavalata kina na ililili. E toso cake tikoga na nona tubu cake. Na cagi a vakavuna me vakila o koya ni vaka e vuka tiko!
A qai taqiri na lali. E a cegulevu o Ethan. E se bera ni vinakata me sa oti na vakacagicagi.
Era yatuni na gone mera lesu tale i loma. E vakamaluataka sobu na nona ililili o Ethan. E qai sobu mai na ililili me lesu tale i kalasi.
Ia ni tara na qele na yavai Ethan, a vakila e dua na mosi kaukauwa e yavana. E lutu ki na qele. E a tovolea me tucake, ia a vakila ni vaka e kama tu na yavana. Sa mosi dina sara ga!
“Kere veivuke!” A kailavaka o Ethan. E drodro sobu e baluna na wai ni matana. Era a cici na gone kei na qasenivuli me ra vukei koya.
“Na cava e leqa?” a taroga e dua na qasenivuli.
“E ramusu na yavaqu!”
Oqo e sega ni imatai ni gauna me ramusu kina e dua na sui nei Ethan. E sega mada ga ni kena ikarua se ikatolu ni gauna! A tauvi Ethan tiko na mate na brittle bone, e dua na mate ka dau vakavuna me ramusu kina vakarawarawa na nona sui. Na veika lalai mada ga, me vaka na sikalutu e bati ni sala se coqa kei na dua tale, e rawa ni ramusu na nona sui.
“Keitou na qiriti rau na nomu itubutubu mo kau kina vua e dua na vuniwai,” a kaya o qasenivuli. “Ena vinaka na veika kece.”
A marau o Ethan nira tiko e kea na tamata me vukei koya. E se mosi tiko ga vakalevu na yavana, ia a kila o koya ni na taqomaki.
Erau a gole i koronivuli o Na kei Ta ka kauti Ethan vua e dua na vuniwai. A ologi na yavana ena palasita karakarawa ka lako ivale me lai vakacegu.
Ena vuku ni yavana-ramusu, a vakayagataka o Ethan e levu na gauna ena idavodavo. E tiko vua e levu sara na ivola me wilika. Eso na gauna era dau lako mai na nona itokani mera mai qito vata kei koya. Ia e se yamasamasa tiko ga.
Ena dua na bogi, a yadra cake mai o Ethan ka sega ni rawa ni moce tale. A tovolea me vakacegu, ia e lomaleqa tikoga. Ena vakaeveitaki ke ramusu e dua na noqu sui ka sega ni dua e tiko e kea, me vaka ena lomaloma ni bogi? A vakasamataka o Ethan. E a tavatukituki na utona. A vakila na rere.
“Ta!” A kailavaka o Ethan.
A cici o Ta kina rumu nei Ethan. “Na cava e leqa?”
“Au rere,” a kaya o Ethan. “Ena vakaeveitaki ke ramusu tale e dua na suiqu ka sega ni dua ena tiko e kea me vukei au?”
E a dabe tikivi koya ena imocemoce o Ta. “Oqori e dua na vakasama veivakarerei,” a kaya o koya. “Ena gauna mada ga eda tovolea kina meda qaqarauni ka taqomaki, e se rawa tiko ga ni yaco na veika ca. Ia se cava ga e yaco, e wanonovi iko tiko na Tamada Vakalomalagi.”
“E kena ibalebale oya ni dau tiko vata ga kei au o Koya?” A kaya o Ethan.
“Donu vinaka.” A mokoti Ethan vakamalua o Ta.
A vakasamataka o Ethan na totolo ni nona mai vukei koya o Ta. E kila ni lomani koya o Ta ka dau vinakata tu ga me vukei koya. E rairai sa vaka talega kina na Tamada Vakalomalagi.
Ena siga ka tarava, a wilika o Ethan ena mekesini na iTokani e dua na tikini ivolatabu. E kaya, “O koya mo dou marau kina, ka kakua ni rere, niu sa tiko vata kei kemudou koi Au na Turaga, kau na tu e yasamudou.”*
A vakila o Ethan ni vakacegu ka taqomaki ni wilika na ivolanikalou, me vaka ga a vakila ena gauna a veivosaki kina kei Ta. A kila o koya ni Yalo Tabu a vakacegui koya tiko. E vaka ni a mokoti Ta tale tiko.
Au na rairai vakamusutaka tale eso na sui, a vakasamataka o Ethan, ia e sega ni dodonu me’u na rere. A kila o koya ni na sega sara ni tiko duadua.
Droini mai vei Simini Blocker