“Pepol Ston Ia we I Saen Gud,” Fren, Maj 2024, 10–11.
Pepol Ston Ia we I Saen Gud
Sapos hem i talem trutok, ?yu ting se bae hem i kros long Marie?
Stori ia i tekem ples long Nedalan.
Marie i openem bokis blong hem blong ol earing mo jen blong lukluk long ol naesfala ston blong hem. Hem i karem wanwan long han blong hem. Red wan, afta grin wan, afta waet wan we oli save luk tru long hem.
Bubuwoman i noknok long doa. “?Rere blong Go?”
“!Yes!” Sloslo, Marie i putumbak ol ston i go insaed long bokis blong hem.
Bubuwoman i stap tekem Marie i go long laebri. Be i no blong go lukluk nomo long ol buk. !I gat wan spesel presentesen blong ston long ples ia! Marie i glad tumas.
Taem we bas blong tufala i kasem laebri, Marie mo bubuwoman tufala i wokbaot i go insaed. Tufala i luk plante plante tebol blong ol naesfala ston. Samfala oli saen mo smut. Ol narafala wan oli gat ol naesfala sep we pulum tingting.
“!Luk hemia ia!” Bubuwoman i poen i go long wan bigfala saen ston. Hem i gat ol blu smol saen ston we i poen i kamaot raon long hem.
Wan narafala tebol i gat plante long ol smosmol raon ston. Marie i lukluk long evri kala. Long en, i gat wan pepol ston, i smol mo i saen tumas mo i smut.
Mi no bin gat wan pepol ston yet, Marie i tingting long maen blong hem. Bae i go stret gud wetem olgeta we hem i gat finis i stap.
Marie i lukluk raon. Bubuwoman i stap long wan narafala tebol. I no moa gat wan i stap kolosap long hem. Mo bae i no gat wan we bae i wantem lukaotem wan smol ston olsem ia ? i tru ah?
Marie i pikimap ston ia mo putum insaed long paket blong hem.
Marie i go long bed long naet ia wetem pepol ston ia we i stap sef insaed long bokis blong ol nekles blong hem.
“?Yu rere blong stori taem?” Papa i sidaon long bed mo openem Fren magasin.
Marie i skwisim blangket blong hem mo stap lisin. Stori ia i blong wan boe we i bin sakem sin afta we hem i mekem wan rong joes.
Taem we papa i stap rid, Marie i filim olsem se bel blong hem i stap tantanem hem. Hem i rol i go long saed blong hem afta, putum hed blong hem long pilo. Be hem i no filim gud. Mo hem i no save stop blong tingting long pepol ston.
Papa i finisim stori. “?Yu yu Oraet?”
Marie i no save wanem blong mekem. Sapos hem i talemaot long papa, bae hem i save kros.
Be ating bae hem i save olsem wanem blong help.
Sloslo, Marie i krol aot long bed mo tekem pepol ston aot long bokis blong hem. “Mi bin tekem hemia long laebri tedei.” Wota blong ae i ron aot long ae blong Marie. “Mi sore tumas.”
Papa i haggem hem. “Oltaem hem i oraet blong talem trutok long mi. Mi glad tumas long yu blong gat strong paoa long tingting blong stap talem trutok.”
Marie i filim se bel blong hem i stat blong kam oraet. !Papa i no kros!
“Mo tru long Jisas, yumi save sakem sin. Semmak olsem long stori,” hem i talem. “?I oraet sapos yumi tekem ston ia i gobka long laebri?”
Marie i skwisim tufala ae blong hem i sat. “!No! Bae oli kros ia.”
Papa i putum wan han blong hem long solda blong Marie. “Bae oli save kros smol. Be mi ting se bae oli glad se yu givimbak. Bae i mekem yu filim moa gud tu.”
Marie i saksakem hed blong hem blong agri. “Okei.”
Marie i karemaot wan pis blong pepa mo stat blong raetem wan leta. “Mi sore blong tekem hemia,” hem i raetem. “Mi stap tingting se sapos mi no bin mekem olsem. Mi wantem stretem.”
Hem i pusum leta ia i go insaed long wan envlop. Afta, hem i putum smol pepol ston ia tu insaed.
“Bae yumitu tekem hemia i gobak tumoro,” papa i talem. “?Naoia yu filim olsem wanem nao?”
“Moa gud,” Marie i talem. “I gat wan moa samting we mi nid blong mekem.”
Marie i nildaon long saed blong bed blong hem mo prea. “Mi sore from mi tekem ston ia,” hem i talem. “Bae mi neva stil bakegen. Tangkyu blong helpem mi blong nogat fraet mo talemaot trutok.”
Taem hem i go antap long bed bakegen, Marie i filim pis. Tumoro bae hem i go stretem evri samting we hem i mekem i rong. Mo hem i save se Papa long Heven mo Jisas Kraes bae Tufala i helpem hem. From se tru long Tufala, evri samting bae I Oraet.
Ol pikja droing oli kam long Katie Rewse