“Wan Ista blong Tingbaot,” Fren, Maj 2024, 14–15.
Wan Ista blong Tingbaot
Jonas i bin filim lav blong Jisas taem hem i singsing.
Stori ia tekem ples long Finlan.
Jonas i laf taem hem i resis wetem brata blong hem i kam long rum blong salong we oli gat haos naet long hem. Hem i save smelem yet sipsip we oli rusum we oli bin kakae long Ista dina. Mo hem i gat tes blong swit pasa (wan swits blong Teki), tradisen swit kaekae blong Ista.
Afta we famli i sidaon kwaet, bigfala brata blong Jonas, Tristan i stanap.
“!Hapi Ista!” Tristan i talem. Hem i statem haos naet blong olgeta wetem wan singsing mo prea. Afta, naoia i taem blong spesel miusik program blong olgeta. Evriwan oli bin rere long wan singsing abaot Jisas Kraes blong serem.
Tristan i plei long kita, taem hem i stap prestem wanwan string wetem kea. Afta, brata blong hem Einar i plei long piano. Ol fingga blong hem oli muv i go kros long ol ki. Mama, papa mo ol narafala brata blong Jonas tu oli plei ol singsing. Jonas i laekem tumas blong harem miusik blong famli blong hem.
Long en, naoia hem i taem blong Jonas. Hem i pulum longfala win mo stat blong singsing.
“Samtaem mi kasem temtesen blong mekem wan rong joes, be mi traem blong lisin taem smol kwaet voes i talem, Lavem ol narawan olsem Jisas i lavem yu.’”*
Taem Jonas i singsing, hat blong hem i fulap wetem lav. Ae blong hem i fulap wetem ol wota blong ae blong glad. Filing ia i olsem se Tabu Spirit i stap talem long Jonas se Papa long Heven mo Jisas, Tufala i lavem hem.
“Tangkyu evriwan blong stap serem ol talen blong yufala,” papa i talem. Hem leftemap wan pikja. Hem i soem Jisas Kraes we i stap nildaon mo stap prea long saed blong wan tri. “?Huia i save wanem we i stap hapen insaed long pikja ia?”
Jonas i leftemap han blong hem. “Hem i pikja blong Jisas we i stap prea long Getsemane.”
Papa i saksakem hed blong agri. “Yes. Hemia nao hem i ples ia we Hem filim ol soa blong bodi mo ol harem nogud blong yumi.”
“Hem i go long garen blong Getsemane bifo Hem i ded,” Mama i talem. “Afta we Hem ai ded, Hem i laef bakegen. Hemia i evri pat blong Atonmen blong Hem. Jisas i mekem evri samting ia fro[m se Hem i lavem yumi.”
Mama i putum wan vidio blong fas Ista. Taem we vidio i en, evriwan oli kwaet blong wan minit. Jonas i filim lav blong Papa long Heven mo Jisas Kraes bakegen.
“Naoia, ?hem i taem blong aktiviti?” Jonas i askem.
Mama i stanap aot long ansarem jea mo go long kabot. “!Yes! Jonas, ?bae yu helpem mi?”
Jonas mo mama i karemaot klu, ol sisis, mo plante jos magasin. Tufala i putum wanwan long flo. Afta, mama i givim spesel Ista jenol blong evriwan. “Bae yumi mekem pikja art blong Jisas Kraes insaed long ol jenol blong yumi blong Ista.”
Jonas i sidaon long flo mo openem notbuk blong hem.
Papa i pikimap wan pen blong raet long jenol blong hem. “Narasaed long pikja blong yu, yu save raetemdaon wanem bae yu mekem blong folem Papa long Heven mo Jisas mekem se bae yu kam moa olsem Tufala.”
Jonas i tanem pej blong wan long ol magasin. Hem i faenem pikja blong Jisas we i stap smael.
Jonas i katemaot pikja mo putum klu long hem mo putum long medel blong jenol pej blong hem. Hem i tingting long evri filing blong lav we hem i bin filim long Sevya long dei ia. Afta, hem i raetem, “Bae mi folem Papa long Heven mo Jisas tru taem mi stap lisin long papa mo mama mo stap helpem tufala blong mekem ol wok long haos. Bae mi lavem ol brata blong mi moa.” Hem i leftemap blong soem long mama. Hem i ridim wanem we hem i bin raetem mo smael.
Jonas bae i tingbaot Ista ia blong wan longfala taem. Hem i filim lav blong Jisas Kraes taem hem i singsing mo lanem samting abaot Hem. Mo hem i filim lav blong Jisas taem hem i traem blong kam olsem Hem.
Papa long Heven mo Jisas Kraes, i tru se Tufala i lavem Jonas. Mo Jonas i lavem Tufala tu.
Ol pikja droing oli kam long Steliyana Doneva