“Mama Faol mo Ol Pikinini blong Hem,” Fren, Maj 2024, 4–5.
Mama Faol mo Ol Pikinini blong Hem
“Jisas Kraes i tokbaot hemia insaed long ol skripja,” Papa i talem.
Stori ia i hapen YSA.
Faef yelo pikinini blong faol we oli gat fulap feta, oli stap lukluk i go antap long Clara. !Pip, pip, pip!
Evri springtaem, famli blong Clara oli pem ol pikinini faol blong lukaot long olgeta. Tedei hem i bin helpem papa blong tekem olgeta i go hom blong oli stap laef wetem ol narafala pikinini faol.
Rod we oli stap draev long hem i nogud mo mekem trak i stap jiamjiam. Be Clara i holem strong bokis we ol pikinini faol oli stap insaed long hem. Sloslo, hem i raprapem wan long olgeta wetem en blong fingga blong hem. !Oli naes we!
Taem we Clara mo papa i kasem haos, tufala i wokbaot i go long haos blong faol long biaen long yad. Haos blong ol faol i wan smol haos we long ples ia, evri mama faol oli stap long hem mo mekem ol nes blong olgeta.
“?Wijwan mama faol nao bae yumitu putum ol pikinini faol ia wetem hem?” Papa i askem.
Clara i lukluk raon. Wan mama faol i stap hipimap ol gras tugeta. Ol gras bae i save mekem wan gudfala nes blong ol niufala pikinini blong faol. Mi ting se bae hem i wan gudfala mama faol.
“Hemia,” Clara i talem, taem i stap poen i go long mama faol ia.
Sloslo, papa i leftemap wan pikinini faol i kamaot long bokis mo putum narasaed long mama faol ia. Mama faol i lukluk long pikinini faol. Hem i leftemap wing blong hem, !kwiktaem hem i ronwe!
“?Hem i go wea? ?Pikinini faol ia i Oraet?” Clara i askem.
Papa i saksakem hed blong agri. “!Luk!”
Pikinini faol ia i stap pusumaot hed blong hem andanit long ol feta blong mama faol.
?From wanem mama faol i mekem olsem? Clara i askem.
“Blong protektem pikinini faol,” papa i talem. “Bae hem i mekem se pikinini faol i stap sef mo stap wom andanit long ol wing blong hem.”
Clara i helpem papa blong putum ol narafala pikinini faol wetem niufala mama faol blong olgeta. Mama faol i leftemap tufala wing blong hem blong karem evriwan i kam kolosap tugeta.
“Yu save, Jisas Kraes i bin tokbaot hemia insaed long ol skripja ,” papa i talem.
“?Tru?” Clara i askem. “?Hem i bin talem wanem?”
“Bae mi soem long yu.”
Clara mo papa tufala i go insaed long haos. Papa i karem ol skripja blong hem i kam. Afta, hem i stat blong ridim.
“Hamas taem bae mi karem yufala i kam olsem wan faol i karem ol pikinini blong hem andanit long ol wing blong hem, sapos yufala i sakem sin mo kambak long mi wetem ful stamba tingting blong hat.”*
Clara i tingting abaot wanwan long ol pikinini faol andanit long ol feta blong mama faol. “?So, Jisas i tekem yumi kam tugeta olsem mama faol we i tekem ol pikinini faol andanit long ol wing blong hem?” Clara i askem.
“Hemia nao,” papa i talem. “Hem i kipim yumi sef, semmak nomo olsem we mama faol i kipim ol pikinini faol oli sef. Be Hem i protektem yumi moa bitim taem we ples i kolkol. Hem i save taem we yumi harem nogud long bodi o sik o filim nogud. Hem i givim pis mo kamfot long yumi. Hem i kea long yumi.”
Long nekis moning, hem i fidim ol mama faol mo niufala pikinini faol blong hem. Hemia i mekem hem i tingbaot ol skripja we papa i bin ridim. Hem i smael taem hem i tingting abaot Jisas. Clara i save se Hem i lavem hem mo kea long hem olsem mama faol i kea long ol pikinini faol blong hem.
Pikja droing i kam long Assia Ieradi