Moa Taem wetem Max

I Kam long Ashlyn B., we i gat 12 yia, Wasington, YSA

Wan taem mifala i go long kamp long solwota wetem famli blong mi, sam fren mo dog blong mi, Max. Mifala i swim mo pleiplei ful dei. Afta, mifala i wajem ol faeawoks taem ples i tudak. Mifala evri wan i gat wan gudfala taem tumas.

Taem we faeawoks i finis, mi lukaotem Max. !Be, hem i go finis! Mi fraet mo seksek tumas mo mi singaot se Max i lus. Taem wota blong ae i foldaon long fes blong mi, mifala evri wan i lukaotem hem long bus. Mi filim wan smol voes i talem long mi blong prea, so mi mekem. Be ful bodi blong mi i kam slak olsem makaroni, mo mi fraet from Max.

Mifala i no faenem hem, mekem se mifala i wokbaot tru ol bus blong gobak long tent blong mifala. Mi gohed blong prea insaed long hed blong mi, be mi stat blong lusum hop. Mi krae kasem mi slip.

Sam aoa i pas, papa mo mama blong i tufala i wekemap mi. !Max i stap sidaon narasaed long mi! Papa mo mama blong mi tufala i harem saon blong strap blong nek we i gat bel long nek blong Max i stap mekem naes aotsaed long tent blong mifala. Mi holem hem strong mo mi talem wan kwaet prea blong talem tangkyu long God blong stap ansarem ol prea blong mi.

Tri yia i pas, Max i spolem baksaed blong hem mo hem i filim nogud plante from. Hem i nomo save kam oraet, mekem se mifala i mas talem tata long hem. Papa long Heven i givim kamfot long mi mo givim pis long mi. Tabu Spirit i rimaenem mi bakegen se, kolosap mifala i bin lusum Max finis tri yia i pas, be God i helpem mifala blong faenem hem. Mi glad tumas se Hem i givim moa taem long mifala blong lavem Max.

Mi save se God i stap givim ansa long ol prea mo stap givim kamfot long taem blong ol hadtaem. Atonmen blong Jisas Kraes hem i blong evri wan. Mi talem tangkyu tumas from wanem we Jisas Kraes mo Papa long Heven Tufala i bin mekem blong famli blong mi mo mi.