Në San‑Diego, SHBA

Tungjatjeta! Quhem Çejs B. Jam 14 vjeç dhe jetoj në San‑Diego. San‑Diegoja është në skajin jugor të shtetit të Kalifornisë në SHBA. Peizazhi është mjaft i larmishëm. San‑Diegoja është vendi i porteve, rrafshnaltave, luginave, kanioneve dhe kodrave. Zakonisht është mjaft ngrohtë dhe me diell gjatë gjithë vitit.

Njihuni me Familjen Time

Unë dhe familja ime jetojmë në malet e San-Diegos. Jetoj me mamin, motrën time 10‑vjeçare, Pejslin, dhe me abuelito‑n e abuelita‑n time (gjyshin dhe gjyshen). Ne jetojmë në një fermë me shumë kafshë. Përpiqemi të jetojmë me një stil jetese shumë të thjeshtë dhe jo moderne.

Bërja e Sakramentit që të Ishte i Veçantë

Gjatë karantinës prej COVID‑19, e diela mund të bëhej shumë rastësore në shtëpi, të ulur në kolltukët tanë dhe me rrobat e shtëpisë. Doja të bëja diçka për t’u siguruar që e diela të ishte e veçantë. Vendosa të bëj për familjen time tabakanë tonë të sakramentit si një nga synimet e mia shpirtërore për programin e ri Fëmijët dhe Rinia.

Fillimisht mora një copë druri dhe hapa vrima në gjysmën e saj për gotat. Pastaj gdhenda një tabaka në gjysmën tjetër për bukën. Abuelita [Gjyshja] ime më ndihmoi ta smeriloja derisa të ishte përsosmërisht e lëmuar. Më pas ne i vumë një dorezë dhe e lyem me llak drurin.

Të dielën e parë ne filluam të përgatitnim sakramentin dhe nuk mund të gjenim gota që u përshtateshin vrimave në tabaka. Kërkuam me orë të tëra për to. Pas njëfarë kohe vendosa që me ose pa gotat e përsosura, ne prapë do ta merrnim sakramentin. Ne nuk do ta linim këtë që të na zinte rrugën ndaj mbajtjes së ditës së Shabatit të shenjtë.

Atë të diel kur e morëm sakramentin, ishte me më tepër qetësi, qëllim dhe nderim. U ndjeva i kënaqur me synimin që kisha vendosur dhe arritur. Unë e di dhe mund ta ndieja që Ati im Qiellor ishte krenar për mua, për synimin tim dhe zgjedhjet që përfshinte kjo.