« Te ’imira’a ia Ziona ’e i te mau ha’amaita’ira’a a te Fatu », Nō te Pūai o te Feiā ’Āpī, Tetepa 2021, 2–5.
Mai, pe’e mai
Te ’imira’a ia Ziona ’e i te mau ha’amaita’ira’a a te Fatu
Te Parau Ha’api’ira’a ’e te mau Parau Fafau 97:21
E hōpoi’a rahi te patura’a ia Ziona, e hōro’a ato’a mai rā te reira i te mau utu’a maita’i rahi.
Te parau mau rahi mātāmua o te ra’i, maori rā tē here nei te Atua ia tātou ma tōna ā’au ato’a ’e te pūai ’e te mana’o ’e te itoito. Tē hina’aro nei ’oia i te maita’i roa a’e nō tātou—’ua nā reira noa na ’oia, ’e e nā reira noa ā ’oia. Tē hina’aro nei ’oia ia ’oa’oa tātou ; ’eiaha te ’oa’oa nō te hō’ē tau poto ’aore rā te ’oa’oa iti noa, e ’oa’oa hōhonu rā ’e te mure ’ore mai iāna. Tē hina’aro nei ’oia ’ia tupu tātou i te rahi ’e ’ia roa’a tō tātou pūai hanahana ’ei tamaiti ’aore rā ’ei tamāhine nā te Atua.
’Ua ’ite au ē, e ’ere te reira i te mea ’ōhie i te mau taime ato’a. E rave rahi o ’outou e fa’aruru nei i te mau ha’afifira’a ’e te mau tāmatara’a ’o tē nehenehe e riro i te tahi taime ’ei mea teimaha. ’Ua hi’o paha ’outou i tō ’outou iho huru orara’a, i te tahi mau huru mea i roto i tō ’outou ’utuāfare ’aore rā i te mau fifi i rotopū i te mau nūna’a nā te ao ato’a nei, ’e ’ua uiui ’outou ē : « Nāhea e ti’a ai iā’u ’ia upo’oti’a i ni’a i teie rahira’a tāmatara’a ? » E māere paha ’outou i te hō’ē pāhonora’a : ’A ’imi ’ia patu ia Ziona.
Tei hea Ziona ?
Lovest Thou Me More Than These? [Te rahi na tō ’oe hina’aro iā’u i teie ?], nā David Lindsley
I roto i te roara’a o te tua’ā’ai ’ua pi’i tāmau noa te Atua i tōna mau ta’ata ’ia ha’amau ia Ziona. Tei mātarohia, e vāhi i reira te mau ta’ata o te Atua e nehenehe ai e ti’amā i te mau fa’aurura’a o te ao nei ’e ’ia ora ma te au māite te tahi ’e te tahi. Terā rā, i roto i teie tau tu’ura’a hope’a rahi, ’aita ’o Ziona i tā’ōti’ahia i te hō’ē noa tuha’a fenua. I tō tātou nei ’anotau, e nehenehe ’o Ziona i te mau vāhi ato’a tei reira te hō’ē melo ha’apa’o maita’i nō Te ’Ēkālesia a Iesu Mesia i te Feiā Mo’a i te mau Mahana Hope’a nei. ’Ua fa’ata’a mai te Fatu i teie mau ta’ata nō Ziona ’ei mau ta’ata « ’ā’au hō’ē ’e te mana’o hō’ē » (Mose 7:18) ’e « te ’ā’au mā » (Te Parau Ha’api’ira’a ’e te mau Parau Fafau 97:21)). ’Ei ha’apotora’a, e’ita tātou e feruri fa’ahou ia Ziona ’ei vāhi i reira tātou e ora ai, ’o te huru rā tātou e ora ai.
E rave rahi ha’amaita’ira’a e vai ra nō ’outou mai te mea e rave maita’i roa ’outou nō te patu ia Ziona, nō te riro ’ei ta’ata tā te Fa’aora e hina’aro ’ia riro ’outou, ’e nō te tauturu i te fa’aineine i te ’ē’a nō tōna ho’ira’a mai i te fenua nei. E tītau teie huru tauto’ora’a i te ’ohipa ’e te fa’aro’o rahi, terā rā e hōpoi ato’a mai te reira i te poupou ’e te ’oa’oa vai maoro. Maita’i ē, e ’ite mai ’outou i te reira ma te ’ā’au aroha ’e te ’ana’anatae mai iā’u ! Mai tā te peresideni Russell M. Nelson i ha’api’i mai, ’aita—’aita roa atu—hō’ē mea e riro ’ei mea hau atu i te faufa’a.1 ’E e mea ti’a ia tātou ’ia rave i te reira ! ’O tātou te mau fa’ehau i ni’a i te rēni i mua roa o te parau mau. ’Aita tātou e ta’ita’i i te ’ōfa’i pupuhi ; e ta’ita’i tātou i te mau ’ahu tā’amu ! ’Ua pi’ihia tātou nō te tauturu i te fa’aora i te ao nei ’e nō te ha’amau i te hō’ē ’āmuira’a ta’ata nā te ao ato’a nei, ia rātou ra ho’i e nehenehe ai te Fa’aora e haere mai.
Here i te Atua ’e i te ta’ata tupu
E nehenehe tātou e fa’atupu i teie huru ’utuāfare, ’aore rā, i teie huru vāhi nohora’a ’aore rā, nūna’a, nā roto i te ha’apa’ora’a i te fa’auera’a ’ia here. E rahi atu tō tātou here i te Atua, rahi ato’a atu tō tātou here i tō tātou mau ta’ata tupu ’e tō tātou ’ite i te mau rāve’a e nehenehe ai tātou ’ia ha’amaita’i ia rātou. Tē vai ra te mau ta’ata tupu e tauturu, te feiā veve e fa’ateitei mai, ’e te maita’i e rave i te mau vāhi ato’a.
’Ua fa’ata’a mai te Fatu i te hō’ē taime i teie hōpoi’a ’e te ha’amaita’ira’a mai teie te huru :
« Nō reira, ’a ha’apa’o maita’i […] ’a aupuru i te feiā paruparu, ’a fa’ateitei mai i te rima tautau ra i ni’a, ’e ’a fa’a’eta’eta i te mau turi ’āvae paruparu ra.
« ’E mai te mea e ha’apa’o maita’i noa ’oe e tae noa atu i te hope’a ra, e noa’a ia ’oe te hō’ē korona nō te tāhuti ’ore, ’e te ora mure ’ore ho’i i roto i te mau aora’i tā’u i fa’aineine i roto i te fare o tō’u Metua » (Te Parau Ha’api’ira’a ’e te mau Parau Fafau 81:5–6).
Ti’a i ni’a nō te parau mau
’Ia pi’i ana’e mai te Atua ia tātou ’ia patu ia Ziona, tē pi’i mai ra ’oia ia tātou ’ia ti’a i ni’a nō tāna mau ha’api’ira’a ’e ’ia vai pāpū i roto i tō tātou fa’aro’o. E’ita te reira e riro ’ei mea ’ōhie ’aore rā ’ei mea au māite ’ia rave, terā rā e mea ti’a ia tātou ’ia rave—ma te aroha, te ha’eha’a, te hāro’aro’a, ’e te aroha ’āueue ’ore nō vetahi ’ē. I roto i tā tātou ’imira’a ’ia ha’amau ia Ziona, e mea pāpū ē, e fārerei tātou i te feiā e ’ere te hi’ora’a i te mea tano ’aore rā, te ’ahu i te mea tano ’aore rā te peu i te mea tano. ’Ia fārerei ana’e tātou i te reira huru ta’ata, e mea ti’a ia tātou ’ia ha’apa’o maita’i ’ia pāhono ma te parauti’a, ’eiaha rā ma te fa’ahapa. I te reira vaira’a, te ’ohipa maita’i roa a’e tā tātou e nehenehe e rave, ’o te ravera’a ïa i te mea tano tātou iho ’e te fa’a’itera’a i « te here mau » ia rātou (hi’o Te Parau Ha’api’ira’a ’e te mau Parau Fafau 121:41).
Tē hina’aro nei au ’ia fana’o vetahi ’ē i te mau ha’amaita’ira’a tā’u i fāri’i, terā rā, i te tahi taime e uiui au ē, nāhea ’ia fa’a’ite i te reira ma te fa’atupu ’ore i te ’ino’ino ’aore rā, i te ta’a ’ore. ’Ua tauturu teie pāpa’ira’a mo’a iā’u i roto i tō’u mau pi’ira’a ato’a nō te ’Ēkālesia ’e tā’u iho mau hōpoi’a ’ei pipi nā te Mesia :
« Nō reira, ’oia mau tē parau atu nei au ia ’ōrua, ’a fa’ateitei mai na ’ōrua i tō ’ōrua na reo i teie nei feiā ; ’a parau atu i te mau mana’o tā’u e tu’u atu i roto i tō ’ōrua na ’ā’au, ’e e ’ore roa ’ōrua e fa’aha’amāhia i mua i te ta’ata nei ;
« Nō te mea e hōro’ahia ïa ia ’ōrua i te hora mau iho ā, ’oia ïa i te taime mau iho ā, i te mea tā ’ōrua e parau ra.
« Terā rā tē hōro’a atu nei au i te hō’ē fa’auera’a ia ’ōrua ; ’ia poro atu ’ōrua i te mau mea ato’a tā ’ōrua e poro ra nā roto i tō’u nei i’oa, nā roto i te ’ā’au ferurira’a hōhonu, nā roto ho’i i te vārua ha’eha’a, i roto i te mau mea ato’a ra.
« ’E tē hōro’a atu nei au ia ’ōrua i teie nei fafaura’a mai te mea e rave ’ōrua i teie mau mea nei e nīni’ihia mai te Vārua Maita’i i te fa’a’itera’a mai i te mau mea ato’a tā ’ōrua e parau ra » (Te Parau Ha’api’ira’a ’e te mau Parau Fafau 100:5–8).
E ha’amaita’ira’a ’ia haere i mua
E au mau hoa taure’are’a here ē, tē vai nei te mau mahana fifi i mua nei, terā rā, i te pae hope’a, e riro tō ’outou orara’a ’ei mea nehenehe, ’a hōro’a ai ’outou i tō ’outou ’ā’au i te Atua ra, ’a here ai i te Fatu ia Iesu Mesia, ’e ’a rave ai ma te maita’i roa nō te ora i te ’evanelia. Mai te mea e ha’apa’o maita’i ’outou, e vai ïa Ziona i te mau vāhi ato’a tei reira ’outou. Tē ha’amaita’i nei au ia ’outou ’ia tauahi ’outou i te reira ma te ’oa’oa. E rave rahi ’ohipa tā te Fatu i fa’ata’a nā ’outou !