« Patu i tō ’outou huru maita’i roa a’e », Nō te Pūai o te Feiā ’Āpī, Tetepa 2021, 6–7.
Mai, pe’e mai
Patu i tō ’outou huru maita’i roa a’e
E pae rāve’a nō te patu i te hō’ē orara’a poupou ’e te ’oa’oa.
Fa’ahōho’ara’a nā Juliet Percival
I te fa’auera’a te Fatu ia Iosepha Semita ’ia patu i te hiero nō Kirtland, ’aita ’oia i vaiiho iāna ’ia feruri e nāhea ’ia rave i te mau mea ato’a ’oia ana’e. ’Ua heheu mai ’oia i te hō’ē fa’anahora’a ’o tē arata’i atu i te manuiara’a.
« ’A tu’u atu ’ia fa’ati’ahia te fare, ’eiaha mai te au i tā tō te ao nei e hāmani ra », ’ua parau te Fatu. « ’A tu’u atu ’ia fa’ati’ahia te reira mai te au i tā’u e fa’a’ite atu » (Te Parau Ha’api’ira’a ’e te mau Parau Fafau 95:13–14). I muri iho, ’ua hōro’a mai te Fatu i te mau arata’ira’a nō te patura’a i te hiero (hi’o Te Parau Ha’api’ira’a ’e te mau Parau Fafau 95:15–17).
’Aua’a a’e rā, e rahi a’e tā te Fatu i fa’a’ite mai i te patu-noa-ra’a i te mau hiero. ’Ua hōro’a ato’a mai ’oia ia tātou i te mau arata’ira’a nō te tauturu ia tātou ’ia riro ’ei ta’ata maita’i roa a’e e noa’a ia tātou ’ia riro. Mai te mea e ha’apa’o tātou i te reira, e patu ïa tātou i tō tātou orara’a « ’eiaha mai te au i tā tō ao nei » mai te au rā i tā te Fatu i fa’ata’a.
Teie e pae rāve’a nō te patu i te hō’ē orara’a poupou ’e te ’oa’oa fa’atumuhia i ni’a ia Iesu Mesia.
Patu i te hō’ē niu pāpū
E parau mai te tahu’a nino’a fare ’e te tāmuta ē, e mea faufa’a te hō’ē niu pa’ari nō te mau huru fare ato’a. ’Ua ha’api’i mai ’o Helamana ē, te niu maita’i roa a’e nō tō tātou orara’a, ’o « te papa o tō tātou Ora, ’o te Mesia ïa, ’o te Tamaiti a te Atua » (Helamana 5:12). E nehenehe tātou e fa’ariro i te Mesia ’ei niu nō tātou nā roto i te haerera’a iāna ra ’e te pe’era’a i tāna mau ha’api’ira’a. ’Ia mana’o ’oe, e aha tā ’oe e rave nei nō te fa’ariro i te Mesia ’ei niu nō tō ’oe orara’a ?
Tāvini ia vetahi ’ē
Te tahi atu rāve’a rahi nō te patu i tō tātou orara’a, ’ia au i te peresideni Dieter F. Uchtdorf, e tauturu piti i roto i te Peresidenira’a Mātāmua i terā ra tau, ’o te taime ïa « ’a ti’a ai tātou ma te tāvini i te Fatu ’e te feiā nā pīha’i iho ia tātou ».1 ’Ia tāvini ana’e ’outou ia vetahi ’ē, tē rave ra ïa ’outou i te ’ohipa tā Iesu i rave ’e tē ha’api’i ra ïa ’ia riro hau atu mai iāna te huru. ’E e’ita ’outou e ha’amaita’i noa i te orara’a o te ta’ata tā ’outou e tāvini ra, e ha’amaita’i-ato’a-hia rā ’outou.
Ha’amau i te hō’ē peu tāmau nō te pure ’e te tuatāpapara’a pāpa’ira’a mo’a
Te tahi atu rāve’a nō te patu i te hō’ē orara’a ’oa’oa ’o te patura’a ïa i te hō’ē aura’a ’e te Metua i te ao ra ’e ’o Iesu Mesia. Hō’ē rāve’a rahi nō te rave i te reira nā roto ïa i te pure ’e te tuatāpapara’a pāpa’ira’a mo’a.
’Ua parau te peresideni Uchtdorf : « Nō te ha’apūai i tō tātou aura’a ’e te Atua, tītauhia ia tātou te tahi taime pāpū ’o tātou ana’e ’e ’ōna. ’Ia rōtahi ma te hau i ni’a i te pure a te ta’ata iho ’e te tai’ora’a i te pāpa’ira’a mo’a […] teie te tahi mau fa’a’ohipara’a pa’ari o tō tātou taime ’e tā tātou mau tauto’ora’a nō te ha’afātata ia tātou iho i pīha’i iho i tō tātou Metua i te ao ra. »2
Te pure ’o te hō’ē ïa rāve’a nō te paraparau i tō tātou Metua i te ao ra. ’Ua ’ite ’oia ia tātou, ’ua here ’oia ia tātou, ’e tē hina’aro nei ’oia ’ia fa’aro’o ia tātou ! ’Ia pure ana’e tātou ma te ’ā’au tae, ’ia pūpū i tā tātou mau ha’amāuruurura’a, ’e ’ia ani i te mau mea tā tātou e hina’aro, e fa’aro’o ’oia ’e e pāhono mai i te mau taime ato’a, mai tāna iho rāve’a ’e i tōna taime.
Nō ni’a i te tuatāpapara’a i te mau pāpa’ira’a mo’a, e ’ere hō’ē ana’e rāve’a nō te rave i te reira. Te mea faufa’a ’o tō ’outou ïa ravera’a i te reira ! ’Ua ha’api’i mai te peresideni Russell M. Nelson : « E mea faufa’a rahi te utuhira’a i roto i te parau a te Atua i te mau mahana ato’a nō te oraora pae vārua ».3 Te hōro’ara’a i te taime i te mau mahana ato’a i roto i te pāpa’ira’a mo’a, e tauturu pāpū ïa te reira ’ia patu i te hō’ē orara’a fa’aro’o ’e te pūai.
Fa’a’ati ia ’outou iho i te feiā e fa’aitoito ia ’outou ’ia rave i te maita’i
Tē hina’aro nei te Metua i te ao ra ’ia fa’atū’ati ia vetahi ’ē ’e ’ia patu i te mau aura’a ’e ’o rātou—te ’utuāfare iho ā rā ’e te mau hoa. Pinepine tātou i te taraihia e te ta’ata tā tātou e ti’a noa i pīha’i iho. E melo ānei rātou nō te ’Ēkālesia ’aore rā ’aita, e mea ti’a ia ’outou ’ia fa’a’ati ia ’outou i te mau ta’ata ’o tē tauturu ia ’outou ’ia ora i te ’evanelia, ’ia ha’apa’o i te mau fa’aturera’a a te Fatu, ’e ’ia riro mai ’ei ta’ata maita’i a’e. E nehenehe ato’a ’outou e tauturu i te feiā ’ati a’e ia ’outou ’ia nā reira ato’a. ’O vai tō ’outou mau hoa e tauturu nei ia ’outou ’ia patu i tō ’outou niu i ni’a i te parauti’a ?
’A ’imi i te ’oa’oa i roto i te patura’a i tō ’outou niu
E rave rahi atu ā rāve’a e nehenehe ai ’outou e patu i tō ’outou orara’a ’ia riro ’ei mea pa’ari i te pae vārua ’e ’ia ’oa’oa, mai te haerera’a i te purera’a ’e te ’amura’a i te ’ōro’a mo’a, te ravera’a ’e te ha’apa’ora’a i te mau fafaura’a, ’e te pe’era’a i te a’ora’a a te mau peropheta ora.
E mea faufa’a ’ia ha’amana’o ē, e tītau teie mau mea tā’āto’a i te ’ohipa ’e i te taime. Tē vai ra te patura’a ’e te ha’api’ira’a ’ia ravehia i te mau taime ato’a, ’aita rā e tītauhia ia ’outou ’ia rave i te reira ’o ’outou ana’e. E tauturu mai te Fatu ia ’outou i te mau mahana ato’a ’a tāmata ai ’outou ma tō ’outou maita’i ato’a ’ia patu i te hō’ē orara’a ’o tā ’outou ’e tāna e fa’ahiahia ’e ’o tē hōro’a mai ia ’outou i te ’oa’oa.