« E ’aro te Atua i tā ’outou mau ’arora’a—mai te au i tāna ravera’a », Nō te Pūai o te Feiā ’Āpī, Tetepa 2021, 15–17.
Mai, pe’e mai
E ’aro te Atua i tā ’outou mau ’arora’a—mai te au i tāna ravera’a
’Ua ha’api’i mai te feiā mo’a mātāmua i te hō’ē ’aore rā e piti mea nō ni’a i te ravera’a a te Atua.
Zion’s Camp [Te pūhapa o Ziona] nā Judith Mehr
Ma te naho’a ta’ata riri hau atu i te 300 tei fafau e ha’amou i te feiā mo’a i te po’ipo’i, ’ua tīa’i ’e ’ua pure te feiā mo’a nō te pūhapa o Ziona nō te hō’ē temeio.
I raro a’e i te fa’aterera’a a Iosepha Semita, ’ua rātere te pūhapa o Ziona e rave rahi hepetoma mai Ohio haere atu i Missouri. ’Ua hina’aro teie mau melo nō te ’Ēkālesia e tauturu i te feiā mo’a tei ti’avaruhia i rāpae i te mata’eina’a nō Jackson i Missouri (Fenua Marite), ’ia roa’a fa’ahou mai tō rātou mau fenua. Terā rā, ’ua fa’aruru rātou i te mau fa’ari’ari’ara’a ’e te pāto’ira’a i roto i tō rātou tere. ’E teienei, teie te tahi atu naho’a ta’ata e fa’ari’ari’a nei ia rātou.
’Aita i maoro, ’ua tae mai te temeio tā te pūhapa o Ziona i pure. ’Ua tae mai te reira nā roto i te mau ata pōiri i te ha’aputuputura’a i te ātea. ’Ua tupu mai te hō’ē vero ’ū’ana nā te mau vāhi ato’a ’e ’ua farara mai te ua pa’ari to’eto’e. ’Ua tāpe’a te vero i te naho’a ta’ata.
« Mai te huru ra ē, nā te Atua i fa’ahaere i te fa’auera’a tāho’o nō te pāruru i tōna mau tāvini i te ha’amoura’a a tō rātou mau ’enemi », tē fa’ata’a nei te ’ā’amu o Iosepha Semita. « ’Ua ma’iri mai ra te ua pa’ari to’eto’e i ni’a iho ia rātou, ’aita i ni’a ia mātou, ’e ’aita mātou i fifi noa a’e, te tahi noa mau fare ’ie tō mātou tei topa i raro ’e ’ua rarirari ri’i, ’āre’a tō mātou mau ’enemi, ’ua puta tō rātou mau tāupo’o, ’e ’ua fifi rātou, mai tā rātou mau pupuhi tei fatifati ’e tā rātou mau pua’ahorofenua tei horo ’ē ».1
Te ua pa’ari to’eto’e, ’o te tahi noa ïa tuha’a o te vero. ’Ua ma’iri mai te ua rahi, ’e ’ua mara’a te pape i roto i te ’ānāvai e fa’ata’a ’ē nei i nā pupu to’opiti fātata 12 mētera te hōhonu. Tei ni’a noa i te fatira’a ’āvae i te po’ipo’i ra.
’Ua parau fafau te Fatu i te mau melo o te pūhapa o Ziona : « E ’aro atu vau i tā ’outou mau ’arora’a » (Te Parau Ha’api’ira’a ’e te mau Parau Fafau 105:14).). ’Ia tupu ana’e te reira, e mea pāpū maita’i ē, tei hea pae te upo’oti’a.
Te mau temeio o teie ’anotau
I te tahi taime, ’ia tai’o ana’e ’outou i te mau ’ā’amu mai teie te huru, e uiui paha ’outou ē, nō te aha teie huru temeio rahi ’aita e tupu nei i ni’a ia ’outou i roto i tā ’outou mau ’arora’a.
’Aita i maoro a’e nei, ’ua fa’a’ite mai ’o Elder Jeffrey R. Holland, nō te pupu nō te Tino ’Ahuru ma Piti ’āpōsetolo i te tahi mau mana’o ’o tē nehenehe e tauturu. ’Ua parau ’oia ē : « ’Ia māramarama ’outou ē, terā ta’ata e’ita roa atu e ta’oto nei ’aore rā e ti’aruhe, tē aupuru nei ’oia i te ’oa’oa ’e te fa’ateiteira’a hope’a o tāna mau tamari’i, nā ni’a roa i te tahi atu mau mea tā te hō’ē ta’ata hanahana e rave. ’O te here mau ’oia ’e te hanahana i roto i te hō’ē ta’ata, ’e ’o te Metua aroha tōna i’oa.
« ’Ē pa’i, mai te peu ’o te reira iho ā », e parau mai paha ’outou ē, ‘e’ita ānei ïa tōna here ’e tōna aroha e nehenehe e fa’ata’a ’ē i tā tātou iho mau miti ’Ute’ute, ’ia rātere atu tātou i tō tātou mau fifi nā ni’a noa i te repo marō ?’ »
E nehenehe ato’a e parau ē, mai te mea ’ua ’aro te Atua i te reira mau huru ’arora’a nō tāna mau tamari’i i tahito ra, nō te aha ’aita ’oia e nā reira i teienei ? Nō te aha ’aita ’oia e fa’a’ore i te mau ma’i ato’a ? Nō te aha ’aita ’oia e tāpe’a i te tama’i ’e te po’ia ’e te māuiui ’ati a’e te ao nei ?
’Aore rā, nō te aha ’aita ’oia e tāpe’a noa a’e i terā ta’ata ha’amata’u ’o tē ’ore e vaiiho ia ’outou ? ’Aore rā e tauturu i tō ’outou ’utuāfare ’ia maita’i a’e ?
’Ua ha’api’i mai ’o Elder Holland i muri a’e ē : « Te pāhonora’a i teie mau uira’a : ‘Oia, e nehenehe te Atua e rave ’oi’oi i teie mau temeio, terā rā, i teienei ’aore rā ’araua’e, e ha’api’i mai tātou ē, nāna ’e nāna ana’e iho e fa’atere i te taime ’e te mau pu’e tau o tō tātou tere tāhuti nei.’ Tē fa’atere nei ’oia i te reira tārena nō tātou pā’āto’a, hō’ē hō’ē ».2
’Ia pe’e ana’e ’outou i te mau fa’auera’a a te Atua, e fāri’i ’outou i te tauturu a te Atua. ’Aita rā hō’ē o tātou e nehenehe e mā’iti nāhea ’e ahea te reira tauturu e tae mai ai.
Te mau ha’amaita’ira’a mana’o-’ore-hia
E ho’i na tātou i te puhapa o Ziona ma’a taime iti. Mea pāpū maita’i ē, te temeio tei tupu i te ’ānāvai Fishing e temeio rahi mau. ’E e ’ere te reira ana’e te temeio tā te mau melo nō te pūhapa o Ziona i ’ite i roto i tō rātou tere. Terā rā ’ia tai’o ana’e ’outou i roto i te Mai, pe’e mai ’e ’ia ha’api’i mai i te seminaire i teie ’āva’e, ’aita te mau ’ohipa i tupu mai tei fa’anahohia e te feiā mo’a.
’Ua mana’o rātou ē, te hina’aro o te pūhapa o Ziona ’o te tauturura’a ïa ’ia roa’a fa’ahou mai te mau fenua i te mata’eina’a nō Jackson tei ’eiāhia i te feiā mo’a nā te naho’a ta’ata riri.
’Ua roa’a fa’ahou mai ānei i te feiā mo’a tō rātou mau fenua ? ’Aita.
’Ua māuiui ānei te feiā mo’a i roto i tō rātou tere i Missouri fātata 1448 kirometera te ātea ? ’Oia mau. E māuiui rahi roa i te tahi taime. Te mea ’ino roa atu, ’ua tā’irihia rātou i te ma’i pe’e cholera tei taparahi pohe 13 ta’ata.
I te hi’ora’a mātāmua, e au ē, ’aita i manuia te tauto’ora’a tā’āto’a. Terā rā e ’ere mai te reira te hi’ora’a a te mau ta’ata e rave rahi tei haere nā roto i te pūhapa. ’Ua parau ’o Brigham Young nō ni’a i te reira ’ohipa i tupu, « ’Ua ’aufau-maita’i-hia vau—’aufauhia ma te ’āpī rahi—oia ïa […] ’ua ’ī roa tā’u fa’ari’i i te ’ite ’o tā’u i fāri’i nā roto i te rāterera’a ’e te peropheta Iosepha Semita ».2
E rave rahi atu mau melo o te pūhapa o Ziona tei parau ato’a nō ni’a i te mau ha’api’ira’a tā rātou i ha’api’i mai, ’e i te faufa’a o te tere. ’Ua parau te perophete Iosepha Semita iho : « E te mau taea’e, tē vai nei vetahi o ’outou tei riri iā’u nō te ’orera’a tātou i ’aro atu i Missouri ; tē parau nei rā vau ia ’outou ē, ’aita te Atua i hina’aro ’ia ’aro ’outou. E’ita tāna e nehenehe e fa’anahonaho i tōna bāsileia […] maori rā e rave ’oia i [tōna feiā fa’atere] mai roto mai i te hō’ē pupu ta’ata tei pūpū i tō rātou ora, ’e tei rave i te hō’ē tusia rahi mai tā Aberahama i rave ».4
Zion’s Camp [Te pūhapa o Ziona] nā C.C.A. Christensen
’Aita paha tō rātou ha’apa’o maita’i i fa’atupu i te fa’aho’ira’a mai o tō rātou mau fenua. Terā rā, ’ua ha’amaita’i-rahi-hia rātou i te tahi atu mau rāve’a. Terā te hō’ē hōho’a e ti’a ia ’outou ’ia ’ite ato’a i roto i tō ’outou orara’a. ’E te mea tā te Atua e tauturu ia tātou ’ia riro mai, nā roto i tō tātou mau tāmatara’a, pinepine te reira i te riro ’ei temeio rahi a’e, hau atu i te fa’aorara’a ia tātou i tō tātou mau tāmatara’a.
Te rē pāpū a te Atua
’Ia tuatāpapa ana’e ’outou i te orara’a o te feiā mo’a mātāmua, e nehenehe ’outou e ’ite i te fa’aurura’a a te Atua e rave rahi taime. Tē tai’o nei ’outou nō ni’a i te mau ha’amaita’ira’a hōhonu. E ’ite ato’a ’outou i te mau taime fifi rahi. Terā rā, nō rātou tei ti’aturi i te Atua ē hope noa atu, e mea pāpū maita’i tā rātou utu’a mure ’ore.
’Ia pe’e ana’e ’outou i te Atua ’e ’ia ti’aturi iāna, e ’aro ’oia i tā ’outou ’arora’a ’e e fa’atupu ’oia i te mau temeio tā ’outou e tītau nei ! E tae mai teie mau temeio nā roto i tāna iho ravera’a ’e i tōna taime, e mea pāpū rā te hope’ara’a. E fa’atītī’aifarohia te mau huru fifi ato’a i te hope’a—i roto ānei i teie orara’a ’aore rā, a muri a’e. ’E te mea faufa’a ato’a, mai te mea e pe’e ’outou iāna, e’ita roa e tītauhia ia ’outou ’ia haere ’o ’outou ana’e. « Nō reira, ’a ha’apa’o maita’i ; ’e inaha, ’e ’a hi’o na, tei pīha’i iho ïa vau ia ’outou ē tae noa atu i te hope’a ra » (Te Parau Ha’api’ira’a ’e te mau Parau Fafau 105:41).