Niu pāpū

Te pe’ape’a nō te ’ahu

Fa’ahōho’ara’a nā Alyssa Gonzalez

I tō’u haerera’a i te ha’api’ira’a tuarua, ’ua mā’itihia vau nō te ’āmui atu i roto i te hō’ē fa’a’ite’itera’a ’ahu nō te hō’ē ’ōro’a matahiti a te fare ha’api’ira’a. Nō te mea ’ua ’ite au ē, e mā’iti te ta’ata fa’atere i te tahi mau fāito ’ahu tano ’ore, ’ua parau vau iāna ē, e’ita vau e ’āmui i roto mai te mea e ’ere i te mea tano te ’ahu tā’u e ’ō’omo. ’Ua parau mai ’oia ē, ’aita e fifi.

I te haerera’a mātou tō’u mau hoa e hi’o i te mau ’ahu, ’ua huru ’ē roa vau. Noa atu te parau tā te ta’ata fa’atere i parau iā’u, e mea ta’a ’ē roa te mau ’ahu i te mau ’ahu ’e i te ture nō te fa’anehenehera’a i roto i te buka iti ra Nō te Pūai o te Feiā ’Āpī. Nō te mea e au ra ē, ’aita iho ā e rāve’a, ’ua tāmata vau i te hō’ē o te mau ’ahu tano ’ore. ’Ua hina’aro vau ’ia hi’ohia mai e mea nehenehe, terā rā, i tō’u ’ō’omora’a i te reira ’ahu, mai te huru ra ē, e ’ere o vau terā. ’Ua uiui au : « E aha tō’u huru i mua i te aro o te Fatu i roto i teie huru ’ahu ? »

’Ua feruri au e nāhea vau i te matara mai i teie huru ’ohipa. I te pae hope’a, ’ua ’itehia mai iā’u te ’ahu orira’a hope’a matahiti o tō’u tua’ana tuahine, tei tano maita’i i te mau fa’aturera’a a te Fatu. I tō’u paraura’a i tō’u mau hoa ē, e rave au i tō’u iho ’ahu, ’ua ’ite roa vau i ni’a i tō rātou hōho’a mata i te mana’o ē, e mea maita’i a’e au i roto i te ’ahu tano ’ore. ’Aua’a a’e rā, ’ua parau mai te ta’ata fa’atere ē, e fāri’ihia ’ia ’ō’omo vau i te ’ahu tano maita’i.

Topa a’era te hau, ’ua marū tō’u ’ā’au. ’Aita vau i tāu’a i te mana’o o tō’u mau hoa. ’Ua ’itehia iā’u te rāve’a nō te ’āmui ma te ’ahu nehenehe ’e te tano maita’i. ’Ua ’oa’oa vau nō tō’u itoito i te tāpe’ara’a i tā’u mau ture teitei, i te taime iho ā rā e ’ere i te mea ’ōhie ’aore rā, ’aita te ta’ata e au mai.

Jessika S., Inidonesia