’Aita vau i ō i roto i te pupu ’ori

Nā Emily Joy Thompson

Mau ve’a a te ’Ēkālesia

’Aita tō’u i’oa i ni’a i te tāpura. ’Ua rahi roa tō’u ’oto. ’Ua ha’api’i mai rā te Fatu iā’u i te tahi mea.

Fa’ahōho’ara’a nā Gabriele Cracolici

E mea au roa nā’u ’ia ’ori mai te torura’a o tō’u matahiti. Nō reira, i te tau tei roto vau i te ha’api’ira’a tuarua, ’ua ’oa’oa vau i te taera’a mai te mau tata’ura’a nō te pupu ’ori. ’Ua mana’o pāpū roa vau ē, nō tō’u tārēni ’e tō’u ’ite, e mea ’ōhie nō’u ’ia tomo i roto i te pupu.

Tau mahana i muri mai i te tata’ura’a, ’ua piahia te mau i’oa o te pupu ’ori. Ma te hepohepo rahi, ’aita tō’u i’oa i ni’a i te tāpura. ’Ua ’oto roa vau. ’Ua ho’i au i te fare ’e ’ua ta’i au i ni’a i tō’u ro’i. ’Ua riri roa vau i te ’orometua ha’api’i ’ori ’e ’ua ’ino’ino vau i te mea ē, ’aita i rava’i tō’u ’aravihi nō te tomo i roto i te pupu. ’Ua tomo marū noa mai tō’u māmā i roto i tō’u piha ’e ’ua parau mai ē, ’ia ani au i te Metua i te ao ra i te pūai nō te fa’aruru i te reira « pu’u » i roto i tō’u orara’a. ’Ua fāri’i au noa atu te ’ā’au tae ’ore ’e ’ua fa’aoti a’era i te hō’ē pure poto. I muri a’e i te pure ’aita tō’u ferurira’a i taui a’e, nō reira ’ua tāmau noa vau i te mana’o ’ino ’e te ’oto. ’Aita roa atu vau i ta’oto maita’i i taua pō ra.

I te po’ipo’i a’e, ’ua ti’a mai au i ni’a. E mea pūai noa ā te ha’amana’ora’a o tō’u manuia ’ore i roto i tō’u ferurira’a, ’e ’ua hina’aro vau e ta’oto fa’ahou i raro a’e i te ’ahu ta’oto. Terā rā, hou ’a nā reira ai au, ’ua ha’amana’o a’era vau i te hō’ē parau fafau tā tō’u ’episekōpo i parau. ’Ua parau ’oia ē, mai te mea e tai’o vau i tā’u mau pāpa’ira’a mo’a i te mau mahana ato’a, noa atu 15 minuti noa a’e, e ha’amaita’ihia vau. Mai te mea tē tītau ra vau i te hō’ē ha’amaita’ira’a, ’o teie ïa te taime.

’A tai’o ai au, ’ua ’itehia iā’u teie ’īrava i roto i Te Parau Ha’api’ira’a ’e te mau Parau Fafau :

« ’Oia mau tē parau atu nei au ia ’outou ta’u mau hoa, ’eiaha e mata’u, ’ia tāmāhanahanahia tō ’outou mau ’ā’au ; ’oia ïa, ’a ’oa’oa noa atu ā, e fa’a’ite mai i te māuruuru i roto i te mau mea ato’a ra ».

« Mai te tīa’i māite i te Fatu, nō te mea ’ua tomo tā ’outou mau pure i roto i te tari’a o te Fatu Sabaota, ’e ’ua pāpa’ihia ho’i ma teie tā’atira’a ’e te parau fa’a’ite ho’i—’ua tapu ’e ’ua fa’aue mana mai te Fatu ’ia fa’ati’ahia te reira.

« Nō reira, tē hōro’a mai ra ’oia i teie fafaura’a ia ’outou, mai te hō’ē fafaura’a ’o tē ’ore roa e fa’ahuru-’ē-hia ’e e fa’atupu-mau-hia te reira, ’e te mau mea ato’a i ha’amamaehia ai ’outou ra e fa’ariro-’amui-hia ïa ’ei maita’i nō ’outou, ’e i te hanahana ho’i nō tō’u nei i’oa, tē nā reira mai nei te Fatu » (Te Parau Ha’api’ira’a ’e te mau Parau Fafau 98:1–3).

’Ua hitimahuta roa vau. ’Ua pārahi au ’e tō’u ’ahu ta’otora’a ’e tō’u rouru pūhararā, ’e ’ua māere au ’ia ’ite ē, e hina’aro rahi mau tō’u i teie mau pāpa’ira’a mo’a. ’Ua hōpoi-’ē-hia te mau mana’o riri ’e te ’oto i roto i teie nā ’īrava e toru. ’Ua fāri’i au i te here o tō’u Metua i te ao ra ’e ’ua ’ite au ē, ’ua ’ite ’oia i te mea tā’u e fa’aruru nei. Nā roto i teie hi’ora’a ’āpī ’ua ti’a iā’u ’ia ’ite ē, te ’orera’a vau i mā’itihia i roto i te pupu ’ori, ’ua riro mau ïa ’ei pu’u na’ina’i i ni’a i te ’ē’a o tō’u orara’a. ’Ua topa vau i ni’a i tō’u nā turi ma te māuruuru ’e ’ua ha’amāuruuru vau i te Metua i te Ao ra.

Nō te toe’a o te mahana, ’ua ti’a iā’u ’ia tāpe’a i te Vārua i roto iā’u, ’e ’ia hi’o i tō’u mau tāmatara’a ’ei mau rāve’a nō te tupura’a i te rahi. E tāpe’a noa vau i teie mau ’īrava i pīha’i iho i tō’u ’ā’au. ’E e ha’amana’o vau i te parau fafau a tō’u ’episekōpo nō ni’a i te mau ha’amaita’ira’a nō te fāriura’a i ni’a i te mau pāpa’ira’a mo’a. Tē māuruuru roa nei au, e nehenehe au e riro ’ei tuha’a nō teie ’Ēkālesia ’e ’ia fāri’i i te hō’ē ’itera’a nō te ’evanelia. ’Ua ’ite au ē, te fa’anahora’a a te Metua i te ao ra nō tātou, e fa’anahora’a mau ïa nō te ’oa’oa.

E maita’i te mau mea ato’a

« ’Ua ’ite tātou ē, te mau tāmatara’a, te mau ’ino’inora’a, ’e te mau ’otora’a, e tae mai te reira i roto ia tātou tāta’itahi nā roto i te mau huru e rave rahi, ’ua ’ite ato’a rā tātou ē, i te hope’a, maoti tō tātou Pāruru hanahana, e fa’arirohia te mau mea ato’a ’ei maita’i nō tātou [hi’o Te Parau Ha’api’ira’a ’e te mau Parau Fafau 90:24 ; 98:3]. ’O te fa’aro’o ïa tei fa’ahiti-’ōhie-hia e te peresideni Gordon B. Hinckley (1910–2008) ’a parau ai ’oia, ‘e maita’i te mau mea ato’a’. ’Ia ha’amana’o noa ana’e tātou i te Fa’aora, e nehenehe tātou e ‘rave […] i te mau mea ato’a i roto i tō tātou mana’ [hi’o Te Parau Ha’api’ira’a ’e te mau Parau Fafau 123:16–17], ma te ti’aturi ē, nā tōna mana ’e tōna here ia tātou e tauturu ia tātou ’ia manuia ».

Elder D. Todd Christofferson nō te pupu nō te Tino ’Ahuru ma Piti ’āpōsetolo, « To Always Remember Him [’Ia ha’amana’o noa iāna i te mau taime ato’a] », Ensign, ’Ēperēra 2011, 55.

’A ha’amata i te hō’ē fa’ahorora’a nō te fa’aurura’a

’Ia ’imi ana’e tātou i te tauturu i roto i te mau pāpa’ira’a mo’a, e mea pinepine e ’ite-’oi’oi-hia te hō’ē ’īrava mai te huru ra ē, ’ua pāpa’ihia te reira nō tātou. I te tahi atu taime, e maoro ri’i a’e e ’itehia mai ai te hō’ē pāpa’ira’a mo’a e parau nei ia tātou mai te reira te huru. Te hō’ē rāve’a e ’itehia ai te tauturu e hina’arohia i te taime e hina’arohia, ’o te hāmanira’a ïa i te hō’ē « fa’ahorora’a nō te fa’aurura’a ».

’Ia tuatāpapa ana’e ’outou i te mau pāpa’ira’a mo’a, ’a hi’o maita’i i te mau ’īrava tei roto te mau parau fafau ’aore rā te fa’aitoitora’a ’o tē nehenehe e tauturu ia ’outou ’aore rā ia vetahi ’ē i roto i te mau tāmatara’a ’aore rā te mau tūtavara’a nō a muri a’e. Nā roto i te tāpa’ora’a i te reira mau pāpa’ira’a mo’a ’e te tāpe’ara’a i te hō’ē tāpura, e nehenehe te reira e hōro’a mai ia ’outou i te pūai ’o tā ’outou e hina’aro ra i te taime e fifi ai ’outou. Nō te tauturu hau atu, ’a tīti’a i te mau ’īrava pāpa’ira’a mo’a i roto i te mau tuha’a ta’a ’ē mai te au i te mau fifi tā te reira e fa’ahiti. Nā roto i te reira, e ineine noa te mau parau fafau ’e te mau ha’amaita’ira’a o te mau pāpa’ira’a mo’a nō te tai’o i te taime e hina’aro ’outou.