“Wan Paelot insaed long Ami blong Lod,” Blong Ol Yut Oli Kam Strong, Jenuware 2024.
Wan Pilot insaed long Ami blong Lod
Lamar F. blong Is Midlands blong Inglan i gat ol bigfala gol we i mekem hem i stap flae hae, iven taem ol ting oli no go stret.
Ol foto oli kam long Satomi Folkett
Lamar F, we i gat 17 yia i talem se “Mi bin wantem blong flae long ol plen longtaem finis.” Taem wan fren blong hem long ol dei we oli bin stap resis long wiljea, i bin talem long hem abaot wan jareti oganaesesen blong ol Man Briten we oli stap helpem ol pipol wetem disabiliti blong laenem blong flae, Lamar i wantem tumas blong traem.
Drim blong Flae Antap
Hem i saen blong joen long tu long ol jareti program. Wan long tufala i, Junior Aspiring Pilots Program (JAPP), we oli krietem speseli blong ol yut bitwin ol yia blong 12 mo 18 yia. Ol program ia mo ol nara solo lesen evriwan oli pusum hem wan step i go moa kolosap long bigfala gol blong hem—blong kasem Praevet Pilot Laesens blong hem.
Pat blong insperesen blong hem i kam long famli blong hem. Papa blong Lamar we i adoptem hem i fas man blong mekem hem i gat moa intres blong flae, we i stap tekem hem i go long ol lafet blong plen evri yia. Afta, oli adoptem hem i go long nara famli taem hem i gat fo yia, Lamar i intres moa long ol plen taem hem i wajem papa blong hem we i adoptem hem i wokhad from pilot laesens blong hem. “Hem i insperesen blong mi blong wantem blong kam wan pilot,” Lamar i talem. Naoia papa blong Lamar i save flae wetem hem long ol plen we i gat wan propela mo faef jea long plen, Lamar i stap lanem blong flae.
Papa mo mama blong Lamar (pikja long tugeta saed blong hem) hem i sam long ol bigfala sapot blong hem.
Long fas flaet blong Lamar long wan ril plen, hem i bin fraet blong tingbaot evri samting. “Mi talem wan kwik prea bifo mi go antap, mo mi bin oraet,” hem i talem. Nao taem hem i gat hadtaem blong tingbaot evri samting antap long skae, ol smol kwaet prea oli helpem hem blong mekem wanem we hem i nidim blong mekem. Iven taem papa blong hem i no sidaon long jea biaen, Lamar i save se oltaem hem i gat Papa blong Hem long Heven i stap wetem Hem.
Ami Blong Lod
Blong stap flae i no wan samting ia nomo we i leftemap spirit blong Lamar. “Mi mi oltaem wan bigfala sapota blong militeri blong ol Man Briten, evri samting stat long seremoni blong famli blong king kasem wan ded seremoni ,” hem i talem.
“From disabiliti blong mi, mi no save joenem militeri miwan,” Lamar i talem. Be wan long ol Yang Man lida blong hem bifo we i bin wan soldia i leftemap tingting blong Lamar. “Oltaem hem i mekem mi tingbaot se mi no nid blong stap long militeri blong wol from mi mi stap finis insaed long ami blong Lod,” Lamar i talem. “Blong stap insaed long ami blong Lod i mekem mi filim se nomata wanem laef i givim long mi, nomata wanem wan i mekem long mi, mi gat Jisas Kraes long saed blong mi.”
Brata Bayliss, Yang Man lida blong Lamar, i givim insperesen long hem blong joenem “Ami blong Lod.”
Long spesel nid kolej we hem i go long hem, Lamar i traem blong helpem ol narafala pipol wetem semmak yia olsem hem blong joenem ami blong Lod taem hem i serem gospel wetem olgeta. “Plante taem, man i no intres long mi,” hem i talem, “be samtaem, oli gat intres long mi. Folem sam long ol nid blong mi long taem ia, blong givim seves olsem wan fultaem misinari i nomo wan samting blong mi save jusum. Be mi lukim olsem ia: Mi no nidim wan nem tag blong stap olsem wan misinari.”
Wetem smol namba blong yut long wod blong hem, plante long ol fren blong Lamar oli no ol memba blong Jos Ia blong Jisas Kraes blong Ol Lata-dei Sent. Hemia i no isi oltaem long skul, speseli taem, olsem we Lamar i talem, i gat “ol bigfala hevi” temtesen. “I gat plante studen we oli stap tokbaot nogud samting mo lisin long ol miusik we i no stret. Plante taem, taem wan samting olsem i hapen, mi aot mo go long wan rum we i longwe long olgeta.”’
Stap Strong
Taem ol temtesen oli kam o ol narafala man i no intres blong harem abaot gospel, Lamar i holem fevret skripja blong hem i go antap : “Be mi, wetem ol famli blong mi, bambae mifala i biaen long Hae God nomo” (Josua 24:15).
“Skripja ia i bin helpem mi blong stap strong long fet long Jisas Kraes,” hem i talem. Speseli hemia i impoten long Lamar insaed long famli blong hem. Taem Lamar i bin gat 10 yia, papa blong hem i bin stop blong stap kam long Jos. “Mi bin yang tumas long taem ia, so mi no bin andastanem fulwan” hem i talem. “Mi traem blong winim hem blong i kambak. Be mi bin lanem se i no abaot hemia. Yu givim olgeta taem.”
Lamar i stil gat wan strong rilesensip wetem papa blong hem mo i soem hem lav evri dei long evri samting, olsem talem long hem wanem i bin hapen long Jos o stap spendem taem wetem hem. “Hem i tijim mi oltaem se nomata wanem yu go tru long hem, yu mas stanap strong.” I go long eni yut wetem ol famli memba we oli no aktiv long Jos, hem i ademap, “Stap strong. Hang strong long fet blong yu. No givap, no mata wanem i hapen.”
Lukaotem Kraes Taem Ol Samting Ol Kam Had
Lamar i faenem strong paoa long tingting tu long Kraes long ol nara wei we i blong hemwan. “Mi safa wetem nogud wari samtaem,” Lamar i talem. “Mi ting se nambawan man blong givim mi strong paoa long tingting blong lukluk fored hem i Jisas Kraes Hemwan. Hem i go tru long plante hadtaem, be Hem i gohed wetem misin blong Hem.”
Taem Lamar i gat wan nogud dei, plante taem hem i pikjarem Sevya i stap leftemap tingting blong hem wetem toktok ia, “Yu save mekem hemia. Yu save go tru long eni samting.”
Hem i stap strong tru tu long papa mo mama blong hem, ol fren blong hem, mo ol narafala man we oli kolosap long hem. “I bin gat wan taem we mi bin go long wan rong rod,” Lamar i talem. Be tangkyu from wan gud sapot sistem, Lamar i bin save stretem situesen ia mo mekem testemoni blong hem long Kraes i kam strong.
“Mi stap divelopmen testemoni blong mi yet ,” hem i talem, “be hem i naes blong stap pat long ami blong Lod mo insaed long Jos Ia blong Jisas Kraes blong Ol Lata-dei Sent. Hem i wan samting we mi laekem.”
Rod blong hem i go antap mo go daon, be Lamar i save wanem i mekem hem i stap flae antap. “Nomata wanem ol hadtaem o problem we yu go tru long hem, Papa long Heven bae i stap long saed blong yu from Hem i kea long yu mo lavem yu.”