“Go from Laet ia!,” Blong Ol Yut Oli Kam Strong, Jenuware 2024.
Kam Folem Mi
Buk blong Momon taetol pej; Buk blong Momon fas toktok
!Go from Laet ia!
Buk blong Momon i givim laet mo paoa long laef blong yu blong gaedem yu long ol taem blong jalenj mo ol had dei we i stap kam.
Ol pikja droing oli kam long Gabriele Cracolici
Taem mi wan smol boe, mi laekem stori blong brata blong Jared insaed long buk blong Momon. Mi save luk eksperiens blong hem olsem wan muvi insaed long maen blong mi. I olsem se i stap hapen taem mi stap ridim stori ia.
Lod i bin komandem brata blong Jared blong bildim ol sip blong hem mo famli blong hem oli save krosem solwota i go long “wan graon blong promes” (Ita 2:9). Be ol sip ia insaed i tudak tumas. Oli no wantem travel long tudak, mekem se brata blong Jared i askem help blong Lod. Lod i askem hem, “?Wanem nao yu wantem se mi mas mekem?” (Ita 2:23).
Wetem bigfala fet, Brata blong Jared i karem 16 ston i go antap long top blong wan hil mo i prea. Hem i askem Lod blong tajem ol ston ia “blong oli save saen long tudak” (Ita 3:4). Nao Lod i putumaot han blong Hem mo tajem wanwan ston ia wetem fingga blong Hem, we i givim laet long olgeta. Blong ful laef blong mi, mi stap pikjarem Lod i stap tajem ol ston ia.
Olsem brata blong Jared we Lod i givim laet long hem, Lod Jisas Kraes bae i givim laet long yu. Hem i “laet mo laef blong wol ia” (3 Nifae 11:11). Mi invaetem yu blong go from Laet! Stap stadi long Buk blong Momon bae i mekem fet blong yu long Jisas Kraes i kam strong mo helpem yu blong stap konek wetem Laet blong Hem.
Wan Gaed mo wan Laet
Mi bin ridim Buk blong Momon mo bin filim wan witnes plante taem se hem i tru. Mi neva gat tu tingting long hem. Taem mi no filim Spirit o taem mi stap longwe long saed blong spirit, mi filim wan filing blong tudak. Be taem mi ridim Buk blong Momon, laet ia i kambak. Samtaem i tekem mi blong ridim wan ves nomo blong mi filim laet bakegen, be oltaem mi filim laet taem mi ridim buk ia.
Laet we i stap winim tudak i ril long mi. Presiden Russell M. Nelson i bin talem se: “Taem yufala i stap prea mo stadi long Buk blong Momon, evri dei, bae yu mekem ol desisen we oli gud moa—evri dei.”1 Hemia from Buk blong Momon i mekem fet blong yufala long Jisas Kraes i kam antap. Hem i givim laet mo paoa. Ol tijing blong hem bae oli gaedem yu long ol jalenj mo ol gudfala dei we i stap kam yet.
Filim Laet
Mi gat blesing ia blong givim seves wetem Presiden Nelson long saed. Taem profet i wokbaot i kam insaed long rum, kwiktaem nomo rum i gat moa laet. Hem i karem Laet blong Kraes wetem hem.
Samtaem hem i had blong save talem stret se yu stap filim Laet blong Kraes. Yu no luk wetem neked ae blong yu. Hem i kam olsem ol filing long saed blong spirit. Hem i wan filing blong wanem we i raet mo rong, mo wanem we i tru mo giaman (luk long Moronae 7:13–19).
Enitaem yu jusum blong kam moa olsem Jisas Kraes, yu stap wokbaot long Laet blong Kraes. Stap Ridim Buk blong Momon i mekem Laet ia i stap laet olwe.
“Yes, !Hem i Tru!”
Mi bilivim fulwan se taem ol skripja oli talem, “Tingbaot, tingbaot” (Hileman 5:12), oli minim se yumi no mas tingbaot Jisas Kraes nomo o tingbaot se yumi bin long wantaem filim Laet blong Hem. Yumi mas filim Laet blong Hem naoia mo filim bakegen mo bakegen. Hemia i wanem we wan yang man, Eric, i faenemaot taem hem i stat blong ridim Buk blong Momon.
Afta we oli muv i go long wan niu ples mo statem sekendri skul, Eric i fesem had taem long ol klas blong hem, mo faenem i had blong pat wetem olgeta. Hem i stat tu blong tingting sapos hem i gat wan testemoni.
“Mi stat blong ridim Buk blong Momon wetem strong tingting blong fas taem long laef blong mi,” Eric i talem. “Mi rid mo prea evri dei.”
Taem Eric i bin prea mo askem Papa long Heven sapos Buk blong Momon i tru, hem i sua se bae hem i kasem wan ansa, be i nogat samting i hapen.
Samtaem afta, taem hem i stap wokbaot long bus biaen long haos blong hem, Eric i askem bakegen. Naoia, hem i gat wan strong filing olsem se Papa long Heven i askem hem, “Eric, wanem nao i bin hapen long laef blong yu taem yu statem blong ridim Buk blong Momon mo prea evri dei?”
Eric i tingting i gobak long olsem wanem hem i bin mekem plante gudfala fren, mo hem i bin kam oraet long skul. Hem i no bin luksave se, Buk blong Momon i bin givim laet mo paoa i kam insaed long laef blong hem.
Afta i hapen.
“Mi no bin harem wan voes,” Eric i talem, “be spirit i fulumap hat blong mi taem ol toktok ia oli kam long maen blong mi: ‘Yes, !hem i tru!’ Wan filing we i fulap long pis, glad, mo hop i kam long mi. Mi bin save se mi faenem ansa blong mi.”2
Stap Muv Fored long Laet
Stat long fas pej kasem las pej blong hem, Buk blong Momon i testifae se “Jisas hem i Kraes”3 mo hem i tijim yumi “wanem [yumi] mas mekem blong kasem pis long laef ia, mo fasin blong sevem man we i no save finis long laef we bae i kam.”.”4
Taem yu stadi Buk blong Momon, mi hop se bae yu filim se oli bin raetem blong yu. Ol doktrin insaed long Buk blong Momon mo ol gudgudfala eksampol blong Nifae, Lihae, mo Saraea, Abinadae, Alma, Amulek, Abis, ol pikinini boe blong Mosaea, mo plante narafala bae oli leftemap, gaedem, mo givim paoa long yu blong kam wan moa gud disaepol blong Jisas Kraes mo lidim yu blong wokabaot wetem strong tingting long Laet blong Hem.
Mi testifae se Buk blong Momon hem wan naesfala mo tru witnes se Jisas Kraes i stap laef mo i stamba blong kamfot, hop, pis, glad, mo laetblong yumi. Mi prea wetem ful hat blong mi se bae yu go from Laet we i stap insaed long Buk blong Momon, kam moa kolosap long Jisas Kraes, mo filim wom blong laet mo lav blong Hem moa bitim we yu bin gat bifo.