“Vuqa na Sala ni Vuli,” Me iSakisaki ni iTabagone, Janu. 2024.

Vuqa na Sala ni Vuli

Mai vei David Dickson

Mekasini ni Lotu

Via vakavinakataka cake vakalailai na vuravura? E tekivutaki taucoko ena kena vulici me caka vakacava.

E veisemati vakacava na vulici ni koti ulu ki na tuvai ni cina ni vakatasuasua?

“E tiki taucoko ni noqu ituvatuva,” e kaya o Lisa, e dua na itabagone qase cake ena imatai ni nona yabaki ni vuli torocake.

A tekivu o Lisa ena koronivuli ni sasauni ni se qai yabaki 16. A kunea sara ga e dua na parokaramu ka vakatara me lekaleka na nona vuli ena koronivuli me rawa ni lako i tuberi ena koronivuli ni sasauni ena veiyakavi. Na kena dina ni sa vuli tiko ena koliji e sega ni kena ibalebale ni sega ni tini vinaka na vuli sasauni taucoko. Na ka dina, ni veika taucoko e sa tadolava sara ga na sala e a nuitaka tiko o koya.

“Au vinakata me tiko vei au e dua na kila-yaga au rawa ni vakayagataka me‘u sauma kina na koliji,” e kaya o Lisa. “Kenai kuri, e vakatara vei au me‘u qaravi ira na tamata ka maroroya na ilavo ena kotivi ni ulu ni matavuvale ena vo ni noqu bula!”

Na Cava Me Da Vuli kina

“Na Tamada Vakalomalagi e vinakati ira na luvena tagane kei na yalewa me ra vuli tikoga.”¹ Oqo e vica walega na sala e kauta mai na veivakalougata levu ni da vuli-ka:

E rawa nio veivuke vakavinaka cake ka vakavulici ira na nomu itokani, matavuvale, kei ira tale eso.
E rawa nio veiqaravi vakavinaka cake ena Lotu kei na nomu itikotiko.
Ena levu cake na nomu kila vakacakacaka ni bula rawati-iko.
O na rawa ni kauta vata kei iko na nomu kila-ka ni ko sa mate.
Nio yavalata ka cakacakataka na nomu mona, ena rawa ni bulabula cake.

E da Vuli Vakacava

Mai na ivolanikalou eda vulica kina me, “Dou vakasaqara na kila ka, io ena vuli kei na vakabauta” (Vunau kei na Veiyalayalati 88:118; raica talega na 130:18) Nikua sa levu cake sara na madigi ni vuli mai na kena e liu, me vaka na:

Vuli vakaivolataki, oka kina na koronivuli torocake, univesiti, kei na vei koronivuli ni cakacaka.
Vakasaqara na kila-ka “mai na ivola uasivi duadua” (Vunau kei naVeiyalayalati 88:118). E rawa talega nio vakuria, “na ivurevure vakalivaliva vinaka duadua.”
Vuli saraga mai vei ira na itokani kei na lewe ni matavuvale.

Vakasama ni itaviqaravi! Tuva e dua na itaviqaravi ni “veisau kila-ka” ni veivakavulici ena nomu tabana se tabanalevu. Me ra tu vakarau o ira na basika yani me ra vakatavulica e dua na ka era kila na cakava.
Masu kei na vuli ivolanikalou
Na bula ena yalodina ka mo kilikili kaya ena veitokoni tudei ni Yalo Tabu, o koya “ena vakavulici kemudou ena ka kecega” (Joni14:26).
Vakatovotovotaki, vakasama vovou, kei na sasaga. Na ka cecere me baleta na kilaka sa ikoya ni sa levu na ka e sa vulici e veisiga. E rawa nio vakuria ki na sitoa ni kilaka e vuravura.

Ni Da Vuli-ka

Me kena ilutua, kevaka o vulica tiko mo koti ulu me vakataki Lisa se o vulica tiko na ivakarau me tarai cake kina na tekinolaji ni itabatamata e tarava, e vakananuma vei keda o Peresitedi Nelson ni sa dau tiko ga na gauna vinaka duadua me baleta na itavi vakaoqo:

“Io, e dodonu meda vuli mai na veika sa oti, io, me da vakavakarau ki na veisiga ni mataka,” e vakatavulica okoya. “Ia e na gauna ga oqo sa rawa nida cakava. Oqo na gauna e rawa nida vuli kina. Oqo na gauna e rawa nida vakalougatataki ira kina na tani.”²

Gauna oqo, sa na qai vakacava. Na cava o vinakata mo vulica nikua?