“Lakova na Rarama,” Me iSakisaki ni iTabagone, Janu. 2024.
Lako Mai, Mo Muri Au
iVola i Momani, tabana ni ulutaga; iVola i Momani, ivakamacala taumada
Lakova na Rarama!
Na iVola i Momani e kauta mai na rarama kei na kaukauwa ki na nomu bula me dusimaki iko ena veisiga dredre ka taleitaki sa tu mai liu.
Droini mai vei Gabriele Cracolici
Ni‘u a se gonetagane gone au a dau taleitaka na italanoa kei taci Jereti ena iVola i Momani. Au a rawa ni raica na veika e a sotava me vaka e dua na iyaloyalo ena noqu vakasama. E vaka sara ga meu raica tiko na veika e yaco tiko ni‘u wiliwili tiko.
A vakaroti tu na taci Jereti mai vua na Turaga me tara na waqamusu me rawa kina vei koya kei na nona matavuvale me ratou kosova na wasaliwa ka tadu yani ki na “dua na vanua yalataki” (Ica 2:9). Ia na waqamusu e a butobuto sara. Me vaka ni a sega ni vinakata me ratou lako tiko ena butobuto, e a kerea na taci Jereti na veivuke ni Turaga. A tarogi koya na Turaga, “A cava ko vinakata me‘u kitaka?” (Ica 2:23).
Ena yalo ni vakabauta levu, a kauta na taci Jereti e 16 na vatu ki na dela ni dua na ulunivanua ka masu. E a kerea na Turaga me tara na vatu “me serau mai ena butobuto” (Ica 3:4). A qai dodoka yani na Ligana na Turaga ka tara na vatu yadudua ena iqaqalo ni ligana, ka solia kina na rarama. Ena noqu bula taucoko, au sa dau raitayaloyalotaka tu ga na Turaga ni tara tiko na vei vatu oqori.
Me vaka ga na Nona solia vua na taci Jereti na rarama, na Turaga o Jisu Karisito ena kauta mai na rarama vei iko. Sa iKoya “na rarama kei na vu-ni-bula kei vuravura” (3 Nifai 11:11 Au sureti kemuni mo ni lakova na Rarama! Na vulici ni iVola i Momani ena vakaqaqacotaka na nomu vakabauti Jisu Karisito ka na vukei iko mo sema tikoga ki na Nona Rarama.
Dua na iDusidusi kei na Dua na Rarama
Au sa wilika na iVola i Momani ka‘u vakadinadinataka ena vuqa na gauna ni sa ka dina. Au sega vakadua ni vakatitiqataka. Ni‘u sega ni vakila na Yalo, ni‘u dau gole tani vakayalo, au dau vakila e dua na yalo butobuto. Ia ni‘u wilika na iVola i Momani, e sa dau lesu mai na rarama. Ena so na gauna e dau taura na kena wiliki e dua ga na tikina me‘u vakila tale kina na rarama, ia au dau vakila na rarama ni‘u wilika.
Na kena ulabaleta na butobuto na rarama e sa ka dina saraga vei au. Sa yalataka o Peresitedi Russell M. Nelson: “Ena nomuni vulica ena masumasu na iVola i Momani e na veisiga, o ni na dau vakatulewa vinaka cake—e veisiga..”1 Oqo e baleta ni iVola i Momani e vakalevutaka na nomu vakabauti Jisu Karisito. E kauta mai na rarama kei na kaukauwa. Na kena ivakavuvuli ena dusimaki iko ena veisiga dredre kei na siga taleitaki sa tu mai liu.
Vakasaqara na Rarama
Sa noqu na veivakalougatataki ni‘u veiqaravi ena yasai Peresitedi Nelson. Ni curu yani na parofita ki na dua na rumu, sa vakilai na mamada e na rumu oya. E kauta voli vata kei koya na Rarama i Karisito.
Ena so na gauna e dau dredre mo vakadeitaka ni o sa vakila tiko na Rarama i Karisito. O sega ni raica ena matamu vakayago. E yaco mai me vaka na veika vakilai vakayalo. Oya sa ikoya na kena vakilai na cava e donu kei na cava e cala kei na ka e vakaidina kei na ka e vakailasu (raica na Moronai 7:13–19).
Na gauna cava ga o digitaka kina mo vakataki Jisu Karisito vakalevu cake, o na lako ena Rarama i Karisito. Na wiliki ni iVola i Momani e vakaqaqacotaka na Rarama oya.
“Io, e sa ka Dina!”
Au vakabauta vakaidina ni gauna e kaya kina na ivolanikalou, “Nanuma, nanuma tiko” (Ilamani 5:12), e kena ibalebale ni sega ni dodonu me da nanumi Jisu Karisito walega se nanuma tiko ni da a vakila na Nona Rarama ena dua na gauna. Sa dodonu me da vakila na Nona Rarama ena gauna oqo kei na veigauna kece ga. Oqori na ka e a kunea e dua na cauravou, o Eric, ena imatai ni gauna e a wilika kina na iVola i Momani.
Ni oti na nona toki ki na dua na vanua vou ka tekivutaka na nona vuli torocake, a dredre sara vei Eric na vuli ka kunea ni dredre me veisemati yani. Sa tekivu me vakataroga talega se sa tiko dina e dua na nona ivakadinadina.
“Au sa qai tekivu me‘u wilika sara vakabibi na iVola i Momani ena imatai ni gauna e na noqu bula, ”a kaya o Eric. “Au dau wiliwili ka masu e veisiga.”
A masu o Eric ka taroga vua na Tamada Vakalomalagi ke sa dina na iVola i Momani, a vakadeitaka e lomana ni na saumi mai na nona taro, ia a sega ni dua na ka e a yaco.
Ena dua na gauna e muri, ni a lako curuma voli na loga ni veivunikau e daku ni nona vale, a taro tale o Eric. Ena gauna oqo, sa qai vakila o koya e dua na veivakauqeti, me vaka sara ga e sa tarogi koya na Tamada Vakalomalagi, “Eric, na cava e sa yaco ena nomu bula mai na gauna o a tekivu wilika kina na iVola i Momani ka masu e veisiga?”
A vakasamataka o Eric ni sa yaco me sa veitokani vinaka sara ka sa vinaka cake tiko mai na nona vuli. E a sega ni vakila, ia sa kauta mai na iVola i Momani na rarama kei na kaukauwa ki na nona bula.
A sa qai yaco.
“Au a sega ni rogoca e dua na domo,” a kaya o Eric, “ia a vakasinaita na yaloqu na Yalo ka votu mai na noqu vakasama na veivosa oqo: ‘Io, e dina!’ Au a vakila na veiluvuci ni vakacegu, na reki, kei na veivakadeitaki. Au kila niu sa qai kunea na noqu isaunitaro.”2
Toso ki Liu ena Rarama
Mai na imatai ni draunipepa ki na kena iotioti, e vakadinadinataka na iVola i Momani ni “o Jisu na Karisito”3 ka vakavulica vei keda “na cava [me da] cakava me da rawata kina na vakacegu ena bula oqo kei na bula tawamudu ena bula sa bera mai.”4
Nio vulica na iVola i Momani, au nuitaka nio na vakila ni a volai me baleti iko. Na ivunau ena iVola i Momani kei na ivakaraitaki yaloqaqa i Nifai, Liai kei Seraia, Apinatai, Alama, Amuleki, Apisi, o ratou na luvei Mosaia, kei ira tale e vuqa era na laveti, dusimaki, ka vakaukauwataki iko mo tisaipeli vinaka cake i Jisu Karisito ka liutaki iko mo lako ena yalodei ena Nona Rarama.
Au vakadinadinataka ni iVola i Momani e sa dua na ivakadinadina talei ka veivakadeitaki ni bula tiko o Jisu Karisito ka sa noda ivurevure ni vakacegu, inuinui, sautu, reki, kei na rarama. Sa noqu masu mai vuniyaloqu moni na lakova na Rarama e kunei ena iVola i Momani, toso voleka yani vei Jisu Karisito, ka vakila na tunutunu ni Nona rarama kei na loloma e levu cake sara mai na veigauna sa oti.