Muataka na Ka Vou

Mai vei Brynn Wengler

Mekasini ni Lotu

Oqo e dua na lesoni lasa e rawa ni o vakavulica kina na nomu matavuvale se kalasi ena gauna ni Vuli ni Lako Mai, Mo Muri Au ena vula oqo.

Nio tovolea e dua na ka vou, ona rairai via vakataki Nifai ni vakasaqara tiko na peleti parasa, “ni o sega tiko ni kila rawa yani na ka [mo] cakava” (1 Nifai 4:6). Ia nanuma tiko, o sega ni tu duadua, vakabibi nio cakava tiko e dua na ka e sa vakarota na Kalou.

1. Sega ni Kilai Taumada

Solia vei ira yadua na tamata e dua na tikinipepa. Kakua ni tukuna vei ira na cava me na caka kina. Ia, vakaraitaka na sala eda dau ciqoma kina vakawasoma na ivakatakila mai vua na Kalou dua na ikalawa ena dua na gauna, me vakataki Nifai ena kena solia vua na peleti parasa (raica na 1 Nifai 3–4) se taya e dua na waqa (raica na 1 Nifai 17–18).

2. Vosa e na Vosa

Oqo sa na qai yaco mai na tikina lasa! Wilika vakayadudua na idusidusi oqo me vukea na nomu ilawalawa me ra lobika na nodra dui iyautalei vuni. (E dredre ni sega na iyaloyalo! Kevaka era gadreva eso tale na veivuke, laiva me ra irova dua na ikalawa ena dua na gauna.)

3. iVakatakila: Liutaki mai na Yalo

Sa dodonu me tiko ena gauna oqo ena nomu matavuvale se kalasi e dua na mata waqa pepa carosa vou! Solia e vica na miniti mo ni veitalanoataka kina na vei gauna e so o ni sa gadreva taucoko kina na veidusimaki ni Kalou “vosa ena vosa.” E rawa sara mada ga ni o vola se droinitaka e dua na ka ena nomu waqa mo nanuma tiko kina na veigauna oya.

Oqo ni sa viriki iko mai na bula ena veika vovou, kakua ni guilecava mo vakasaqara na ivakatakila mai vua na Kalou. Nanuma tiko, ena dau vakarautaka o Koya e dua na sala mo vakayacora kina na veika e sa kerea o Koya (raica na 1 Nifai 3:7).

iDusidusi

Taura toka na tiki ni pepa ena tutuna lekaleka e cake. Lobika veimama, mai cake ki ra.
Lobika veimama tale mai na imawi ki na imatau, qai tevuka na ilobi o se qai cakava ga.
Ni sa toka na ilobi e delana, taura na tutu e rua e cake ka lobika sobu ki na ilobi ena lomadonu. E dodonu me vaka e dua na yasaitolu kei na dua na rekatequla e botona.
Taura na meme ni pepa lailai ena boto ni nomu yatutolu ka lobika na iubi e cake. Vukica ka tokaruataka ena tikina e yasana kadua.
Dreta me tadola na tikina e ra me vaka e dua na isala.
Dreta tikoga me yacova ni rau sa sota na mua ruarua ka dedeka yani me dua na ibulibuli daimani.
Ni sa tadola tu na muana e ra, lobika na imatai ni taba ki na ulu ni daimani. Vukica ka tokaruataka ena yasana kadua. E dodonu me vaka e dua na yasaitolu.
Dreta tadola na kena iwase e ra ka dedeka me vaka o a cakava ena ikalawa 5 kei na 6 ki na dua na ibulibuli daimani.
Na dela ni nomu daimani e dodonu me tiko kina e rua na taqana tututolu ena imawi kei na imatau. Dreta na veitikina oqori e tautuba ka dedeki ira me rawa ni dua na yasa va tabeirua vakatobuicu. Qai biliga tani na yasana me vukea na kena tucake vakataki koya.