“Muduka na Veivakatautauvatataki! “O sa Rauta Vinaka o iKo,” Me iSakisaki ni iTabagone, Janu. 2024.
Lako Mai, Mo Muri Au
Muduka na Veivakatautauvatataki! O sa Rauta Vinaka o iKo
Oqo e va na ka eda vulica mai vua e dua na tuakai Nifai.
Droini mai vei Corey Egbert
E tiko e dua na gonevuli ena kalasi ka dau kila tu ga na isaunitaro dodonu. Na gone ena timi ni basiketepolo ka dau levu na kena kai mai vei iko. E dua ka ra vinakata na tamata kecega me ra veitokani kaya. Ena vuravura ni veivakatauvatani, e vaka me dau tiko ga e dua e vinaka cake.
Na veivakatauvatani e rawa ni dredre sara vakabibi ni da bulataka na kosipeli. O nanuma beka nira sa tamata yalododonu cake, kaukauwa cake na nodra ivakadinadina, se vakila vakamatata cake na Yalo mai vei iko. Ia na nomu vakatauvatani iko vakaoqo e sega ni veivuke.
Mai na iVola i Momani, o kila beka kina nio Nifai e a dua na iliuliu levu ka parofita. Ia e vica beka na ka o kila me baleta na tuakai Nifai yalodina, o Semi? E a sega ni iliuliu se parofita me vakataki Nifai, ia e sega ni gadrevi me vakataki Nifai me vinaka kina.
1. A Vakadinata tiko o Semi
A masu o Nifai ka yaco mai na kena isau vua ni a vakarota na Turaga ki na nodratou matavuvale me ratou lako yani ki na lekutu. Ka ko Semi e a “vakabauta na vosa i Nifai” (raica na 1 Nifai 2:16–17). A sega beka tiko na ivakadinadina uasivi sara nei Semi. A rairai tu beka vua eso na vakatataro. Ia a digitaka me vakabauta na vosa i tacina, ka qai cakacakataka na nona vakabauta. Kakua ni vakatautauvatataka na nomu vakabauta se ivakadinadina ki na nodra na tamata tale eso. Ni o cakacaka ena vakabauta me vakataki Semi, ena tubu vakamalua na nomu ivakadinadina me baleta na iVakabula. (Raica talega na Vunau kei na Veiyalayalati 46:13–14; Alama 32.)
2. A Yalomalua o Semi
O Leimani kei Lemueli e rau a sega ni marautaka ni sa tekivu dau liutaki rau o Nifai, na tacidrau. Ia o Semi, o koya talega na tuakai Nifai, a rairai dau yalomalumalumu. A vakarorogo vei Nifai ka muria na nona ivakasala (raica na 2 Nifai 5:3–6). Kevaka era sa kerei na tamata era tu wavoliti iko me ra veiliutaki ka sega ni o iko, yalomalumalumu, ka kakua ni vakatauvatana. Tokoni ira, vuli mai vei ira, ka solia na nomu vinaka duadua mo digitaka na dodonu.
3. A Dau Vosota o Semi
Ena rairai ni ra bulataka tiko na tamata kecega na bula sa uasivi sara, ia na tamata kece ga e lako curuma na veigauna dredre. A sega ni vakavo kina o Semi. E rau saqati Semi o Leimani kei Lemueli, me vaka ga na nodrau saqati Nifai. E rau a mokuti Semi sara ena ititoko, me vaka ga na nodrau a mokuti Nifai! (Raica na 1 Nifai 3:28; 1 Nifai 7:6.) Ia a vosota tu vakamalua o Semi na nona vakatovolei. Na lako curumi ni veigauna dredre e sega ni kena ibalebale nio sa vakayacora tiko e dua na cala. Kakua ni vakatauvatana na nomu vakatovolei ki na nodra eso tale na tamata. Mo yalomalua, ka vakararavi vua na Turaga. Ena vukei iko o Koya mo lako curuma.
4. A Vakalougatataki o Semi
Na tamai Semi, o Liai, a kaya vei Semi, “Ko na kalougata ena nomu bula taucoko” (2 Nifai 4:11). A sega beka ni dua na iliuliu se parofita o Semi, ia a muri Jisu Karisito tikoga ena yalodina, ka a vakalougatataki kina. Ena veivuke ni iVakabula, sa rauta vinaka o koya. Ka na rawa talega ni vakakina o iko.