Perisitua Arona: Tulai ma Faaaoga le Mana o le Atua

Saunia e Adrián Ochoa

Fesoasoani Lua i le Au Peresitene Aoao o Alii Talavou

E tatau ona faaaogaina le perisitua e faataunuu ai soo se mea e lelei. Ua valaauina outou e “tutulai ma susulu atu,” aua le nanaina lou malamalama i le pogisa.

E lei leva talu ai sa ou i ai i Aferika i Saute ma sa ou asiasi ai i le aiga o Tapiso, o le fesoasoani muamua i le korama a ositaulaga i le Uarota a Kagiso. Sa tatalo Tapiso ma lona epikopo, o le o loo pulefaamalumalu ma umia ki mo le korama, mo uso o le korama ua le toaaga mai, ma sailia ni musumusuga po o ai e asiasi i ai ma pe faapefea ona fesoasoani ia i latou. Sa uunaia i la’ua e asiasi i le aiga o Tebello, ma sa la’ua valaaulia a’u matou te o.

Ina ua matou pasia se taifau leoleo taufe’ai, sa matou i ai i le potu malolo ma Tebello, o se alii talavou tauagafau ua le toe lotu ona sa pisi i le faia o isi mea i Aso Sa. Sa popolevale o ia ae sa fiafia e talia i matou, ma sa ia valaaulia foi lona aiga e faatasi ai ma ia. Sa faailoa atu e le epikopo lona alofa i le aiga, ma lona faanaunauga e fesoasoani ia i latou ia avea o se aiga e faavavau e ala i le faamauina i le malumalu. Sa ootia o latou loto, ma sa mafai ona matou taufai lagonaina uma le i ai o le Agaga Paia e ta’ialaina upu ma lagona uma.

Peitai o upu a Tamiso na faia ai le eseesega i le asiasiga. Sa foliga mai ia te au, sa tautala lenei ositaulaga talavou i le gagana a agelu—o upu alofa sa mafai ona matou malamalama uma ai ae sa faapitoa ona pa’i atu ai i lana uo. “E ese lo’u fiafia e talanoa atu ia te oe i taimi uma i le lotu,” na ia fai atu ai. “O upu alofa lava au upu ia te au i taimi uma. Ma e te iloa la, ua le o toe i ai se tatou au soka ona ua e le i ai. E ese lou lelei i le taaloga.”

“Faamalie atu,” na tali mai ai Tebello. “O le a ou toe alu atu.”

“Manaia tele,” o le tala lea a Tapiso. “E te manatua foi lo tatou sauniuni e avea ma faifeautalai? Mata e mafai ona tatou toe faia lena mea?”

“Ioe,” na toe tali mai ai Tebello, “Ua ou manao e toe foi atu.”

Atonu o le olioliga aupito sili ua ou iloa i le avea ai o se fesoasoani i le au peresitene aoao o Alii Talavou, o le vaaia lea o i latou e umia le Perisitua Arona i le salafa o le lalolagi o latou faaaogaina le mana o le Perisitua Arona. Peitai, o nisi taimi ua ou molimauina foi, ma se loto faanoanoa, pe toafia ni alii talavou e le o malamalama i le tele o mea lelei e mafai ona latou faia i le mana o loo latou umia.

O le perisitua o le mana ma le pule a le Atua lava Ia e faatino ai le auaunaga i Lana fanau. Oi, maimau e pe ana mafai e alii talavou uma, i latou uma o umia le Perisitua Arona, ona malamalama atoatoa o lona perisitua o loo i ai ki o le auaunaga a agelu. Maimau e pe ana mafai ona latou malamalama, ua ia te i latou le tiute paia e fesoasoani ai i a latou uo ia maua le ala e tau atu ai i le Faaola. Maimau e pe ana latou iloaina o le a tuu atu e le Tama Faalelagi ia te i latou le mana e faamatala ai upumoni o le talalelei toefuataiina i le manino ma le loto faamaoni, e lagonaina ai e isi le moni e le mafaafitia o afioga a Keriso.

Alii talavou pele o le Ekalesia, sei ou fai atu se fesili ou te faamoemoe o le a e tauaveina i lou loto i aso uma o totoe o lou ola. O le a se isi mana e sili atu e mafai ona e mauaina i le lalolagi nai lo le perisitua a le Atua? O le a se mana e ono mafai ona sili atu nai le mana e fesoasoani ai i lo tatou Tama Faalelagi i le suiga o olaga o o tatou uso a tagata, e fesoasoani ai ia i latou i le ala o le fiafia e faavavau e ala i le faamamaina mai agasala ma le faia o mea sese?

E pei lava foi o se isi lava mana, e tatau ona faaaogaina le perisitua e faataunuu ai soo se mea e lelei. Ua valaauina outou e “tutulai ma susulu atu” (MF&F 115:5), aua le nanaina lou malamalama i le pogisa. E na o i latou e lotototoa o le a faitaulia i e ua filifilia. A e faaaogaina le mana o lou perisitua paia, o le a faateleina lou lototoa ma le mautinoa. Alii talavou, tou te iloa ua outou faia le mea silisili pe afai tou te i ai i le galuega a le Atua. Tou te iloa e sili lo outou fiafia pe a outou punouai i se galuega lelei. Faalautele le mana o lou perisitua e ala i lou mamā ma lou agavaa.

Ou te faaopoopo atu lo’u leo i le valaau na tuu atu e Elder Jeffrey R. Holland ia te outou i le ono masina talu ai mai lenei pulelaa, “O loo ou sailia ,” na ia saunoa ai, “ni alii talavou ma matutua o e popole tele i lenei taua i le va o le lelei ma le leaga ina ia auai ma tautatala atu. O loo tatou i ai i le taua.” Sa ia faaauau, “… Ou te talosagaina se leo e malosi atu ma sili atu ona tuuto, se leo e le gata e faasagatau i le leaga … , ae o se molimau foi mo le lelei, se molimau mo le talalelei, se molimau mo le Atua” (“Ua Tauto i Tatou Uma,” Liahona, Nov. 2011, 44, 47).

Ioe, outou o umia le Perisitua Arona, o loo tatou i ai i se taua. Ma i lenei taua, o le ala sili e puipuia ai mai le leaga o le punouai lea e siitia le amiotonu. E le mafai ona e faalogologo i upu masoa ma faatagā faapea e te le o lagonaina. E le mafai ona e matamata na o oe pe ma nisi, i ata e te iloa e mataga ma faatagā faapea e te le o iloa. E le mafai ona e pa’i i se mea eleelea ma faatagā faapea e le o afaina! E le mafai ona e nofoa’i pe a saili Satani e faaumatia le mea lelei ma mama atoatoa. Nai lo lena, ia e puipuia le mea ua e iloa e moni! A e faalogo pe vaai i se mea e solia ai tulaga faatonuina a le Alii, ia e manatua lou faasinomaga—o se fitafita i le autau a le Atua lava Ia, ua faamanaina oe i Lana perisitua paia. E leai lava se isi auupega e sili atu e faasagatau ai i le fili, o le tamā o pepelo uma, nai lo le upumoni o le a sau mai lou gutu a o e faaaogaina le mana o le perisitua. O le toatele o au taaga o le a faaaloalo ia te oe i lou lototoa ma lou amiosa’o. O nisi o le a le amanaiaina. Ae e le afaina lena mea. O le a e mauaina le faaaloalo ma le faatuatuaga a le Tama Faalelagi aua ua e faaaogaina Lona mana e faataunuu ai Ona faamoemoega.

Ou te valaau atu i au peresitene uma o korama a le Perisitua Arona, e toe sisi tasi a’e i luga le tagavai o le saolotoga, ma faatulaga ma taitai la tatou autau. Faaaoga le mana o lou perisitua e ala i le valaaulia o i latou o loo siomia ai oe e o mai ia Keriso e ala i le salamo ma le papatisoga. Ua ia te oe le poloaiga ma le mana o le Tama Faalelagi e faia ai.

I le lua tausaga talu ai, a o ou asiasi atu i Santiago, Chile, sa matua faagaeetia lava au e Tanielu Olate, o se alii talavou e tele lava ina o faatasi ma faifeautalai. Sa ou talosagaina o ia e tusi mai ia te au, ma ua ia faataga mai au e faitauina atu se vaega o lana i-meli talu ai nei: “Faatoa atoa lo’u 16 tausaga, ma o le Aso Sa sa faauu ai au i le tofi o se ositaulaga. O le aso lava lena na ou papatisoina ai sa’u uo; o lona igoa o Karolina. Sa ou aoao atu ia te ia le talalelei, ma e sau o ia i le lotu e le aunoa ma ua maua foi lana taui o le Alualu i Luma o le Tagata Lava Ia, ae sa mumusu ona matua e papatiso o ia seia oo ina ua la iloaina ma faatuatuaina a’u. Sa manao o ia ou te papatisoina o ia, ma o lea sa matou faatalitali ai mo se masina seia aulia le Aso Sa na atoa ai lo’u 16. Ua ou lagonaina lava le fiafia ina ua ou fesoasoani atu i se tagata lelei ia papatisoina, ma ua ou fiafia foi aua sa ou papatisoina o ia.”

O Tanielu ua na o ia o se toatasi o le toatele o alii talavou i le lalolagi atoa, o loo ola e tusa ai ma le mana ua tuuina atu e le Atua ia te i latou. O se tasi o Lui Fenato, mai Honduras, sa ia matauina sana uo ua savalia se ala matautia o filifiliga lē lelei, ma sa ia tuuina atu i ai lana molimau, ma ia laveaiina moni ai lona ola (tagai “A Change of Heart,” lds.org/youth/video). O Olavo, mai Pasila, o se isi lea faataitaiga. O se auauna nofomau i lona aiga (tagai i le MF&F 84:111), na musuia e Olavo lona tina ia toe toaga atoatoa i le Lotu (tagai i le “Reunited by Faith,” lds.org/youth/video). E mafai ona e mauaina nisi o nei tala ma le tele o isi i le uepisaite a le autalavou a le Ekalesia, youth.lds.org. Manatua, o le Initoneti, le ala faasalalau lautele, ma isi tekinolosi, o ni meafaigaluega ua tuu atu e le Alii i ou lima e faaaoga ai ou tiute faaleperisitua ma tuuina atu le uunaiga o le upumoni ma le amioatua.

Alii talavou pele, a outou faaaogaina le Perisitua Arona i le ala ua ou faamatalaina atu, ua outou sauniaina outou lava mo tiutetauave i le lumanai. Peitai o loo tele atu isi mea o loo outou faia nai lo lena. E pei o Ioane le Papatiso, lena faataitaiga lelei o sē na umia le Perisitua Arona, o loo outou sauniaina foi le ala o le Alii ma faia ia sa’o Ona ala. A e folafola atu ma le lototoa le talalelei o le salamo ma le papatisoga, e pei ona sa faia ai e Ioane, ua e sauniaina tagata mo le afio mai o le Alii (tagai i le Mataio 3:3; MF&F 65:1–3; 84:26–28). E tele taimi e ta’u atu ai ia te oe le tele o lou gafatia. Ia, o le taimi lenei e faatino ai lena gafatia, e faaaoga ai tomai ua tuuina atu ia te oe e faamanuiaina ai isi, aumaia i latou mai le pogisa i le malamalama, ma ia saunia le ala o le Alii.

Ua tuuina atu e le Ekalesia ia te oe le tusi o le Tiute i le Atua, e fai ma se punaoa e fesoasoani e te aoao ai ma faataunuu ou tiute. Suesue soo i ai. Alu ifo i ou tulivae, alu ese mai tekinolosi, ma saili atu i le taitaiga a le Alii. Ona e tulai ai lea ma faaaoga le mana o le Atua. Ou te folafola atu o le a e maua tali mai le Tama Faalelagi i le ala e faafoe ai lou lava olaga ma fesoasoani ai i isi.

Ou te sii maia upu a Peresitene Thomas S. Monson: “Aua lava nei e manatu faatauvaa i le mamao e oo atu i ai le aafiaga o lau molimau. … Ua ia te oe le mana e te iloa ai mea e le o vaaia. A ia te oe mata e vaai ai, taliga e faalogo ai, ma le loto e lagonaina ai, e mafai ona e aapa atu ma laveai mai isi” (“Ia Avea Oe ma Faaa’oa’o,” Liahona, Me 2005, 115).

Ou te molimau atu ia te outou e moni le mana o le perisitua. Sa ou mauaina la’u molimau e faaaoga ai le perisitua e au lava ia. Ua ou vaai i lea vavega ma lea vavega o faia e i latou e i ai le mana o le Perisitua Arona. Ua ou molimauina le mana o le auaunaga a agelu a o tautala i latou o umia le Perisitua Arona i upu e faatumulia i le Agaga o le faamoemoe, ma tatalaina ai se loto o se tasi e manaomia le malamalama ma le alofa. I le suafa o Iesu Keriso, lo tatou Alii, lo tatou taitai, ma lo tatou Faaola, amene.