E Taitaiina Foi i Latou e le Tama Itiiti
Saunia e Peresitene Boyd K. Packer
Peresitene o le Korama a Aposetolo e Toasefululua
E tatau ona malamalama ia tane ma ava o lo latou valaauga muamua lava—lea e le mafai lava ona faamaloloina mai ai i latou—o le tiute lea o le tasi i le isi ma i a latou fanau.
I tausaga ua mavae, i se po malulu lava i se nofoaga o nofoaafi i Iapani, sa ou faalogo atu ai i se tuitui i le faamalama o le potu lea ou te moe ai i le nofoaafi. Sa tutu ai iina se tamaitiiti o loo ofuina se ofutino masaesae ma se ieie palapala o loo fusi faataamilo i lona auvae o loo fula. Sa lilofia lona ulu i le papala. Sa ia uuina se atigi apa elea ma se sipuni, o se faailoga o se tamaitiiti matuaoti aisi. A o ou taumafai e tatala le faitotoa e tuu atu ia te ia se tupe, sa alu ese atu le nofoaafi.
O le a le galo lava ia te au lena tamaitiiti fiaai sa tuua ai e tutu i le malulu, ma uu mai i luga se atigi apa e leai se mea o i ai. E le mafai foi ona galo ia te au o’u lagona o le le mafai ona fesoasoani atu a o sosolo malie ese atu le nofoaafi ma tuua ai o ia e tūtū i le fale faatali nofoaafi.
I nai tausaga mulimuli ane i Cusco, o se aai maualuga i Andes i Peru, sa ma faia ai ma Elder A. Theodore Tuttle se sauniga faamanatuga i se potu faalaumiumi vaiti sa matala le faitotoa e faasaga i le alatele. O se po, ma a o saunoa atu ia Elder Tuttle, sa tu mai se tamaitiiti, pe a ma le ono tausaga le matua, i le alasavali o le faitotoa. Sa na o se ofutino masaesae na ia ofuina e oo ifo i ona tuli.
I lo ma itu tauagavale sa i ai se tamai laulau na i ai se ipu falaoa mo le faamanatuga. Sa vaaia e lenei tamaitiiti fiaai ua matuaoti le falaoa ma soso lemu ane i le puipui e agai mai i ai. Sa toeitiiti lava oo o ia i le laulau ae iloa mai loa o ia e se fafine i le alasavali. I se geno ita atu o lona ulu, na ia tulia ai o ia i fafo i le po. Sa ou oi i totonu ia te au lava.
Mulimuli ane sa toe foi ane le tamaitiiti. Sa tolotolo ane o ia i tafatafa o le puipui, ma tilotilo mai ia te au ma le falaoa. Ina ua ia latalata atu i le vaega e toe iloa mai ai foi o ia e le fafine, sa faaloloa atu i ai ou lima, ma sa ia tamoe mai ia te au. Sa ou siiina o ia i luga o ou vae.
Ona, pei lea o se faatusa, sa ou faanofoina o ia i le nofoa o Elder Tuttle. Ina ua maea le tatalo faaiu, sa mou atu le tamaitiiti fiaai i le po.
Ina ua ou toe foi atu i le fale, sa ou faamatala atu ia Peresitene Spencer W. Kimball le mea sa ou oo i ai. Sa matua faagaeetia o ia ma fai mai ia te au, “Sa e siiina se mālo (nation) i ou vae.” Sa ia faatele ona fai mai ia te au, “O lena aafiaga e tele atu sona uiga nai lo le mea e te le’i iloaina.”
I le toeitiiti ai atoa le faaselau ona ou asiasi atu i atunuu i Amerika Latina, sa ou saili pea mo lena tamaitiiti i foliga o tagata. O lea la ua ou iloaina le uiga o le saunoaga a Peresitene Kimball.
Sa ou feiloai i se isi tamaitiiti sa tetete i le maalili i alatele o le Aai o Sate Leki. O le tuneva o le isi po malulu tele. Sa matou tuua se toonai o le afiafi o le Kerisimasi i se faletalimalo. Sa o mai ni tamaiti pisapisao e toaono pe toavalu mai le alatele. O i latou uma sa tatau ona i ai i le fale ona o le malulu.
O se tasi tamaitiiti sa leai sona pulupulu. Sa ia savali faataalise ina ia sola ese ai mai le malulu. Sa mou atu o ia i se alatele i tafaala, o le mea moni lava ua alu atu i se tamai potu mautotogi palapalā ma se moega e le o lava ni ieafu e faamafanafana ai o ia.
I po, pe a ou toso a’e ieafu ou te afu ai, ou te faia se tatalo mo i latou e le o i ai ni moega mafanafana e o i ai.
Sa ou faamautu i Osaka, Iapani, ina ua maea le Taua Lona Lua a le Lalolagi. Sa faaleagaina le aai, ma o alatele sa otāotā i poloka, o nutigāmea, ma mea na faaleagaina i pomu. E ui o le tele o laau sa tafiesea, ae sa tutu pea ni nai laau ma ni lala ma ogalaau ua gaui ma na maua pea le lototele e faatupu mai ni nai lala ma nai laulaau.
Sa pisi lava se teineitiiti laitiiti sa ofu i se kimona masaesae lanu, e ao ni laulaau sasama o le saikamoa e fai ai se teu. Sa foliga mai e le o nofouta le teineitiiti i le faafanoga lea na siomia ai o ia a o ia saeu soloina mea na faaleagaina ia faaopoopo ai ni laulaau fou i lana faaputuga. Sa ia maua le mea matagofie lava e tasi na totoe i lona lalolagi. Atonu e tatau ona ou faapea o ia o le vaega matagofie lea o lona lalolagi. Ae o lo’u mafaufau ia te ia na faateleina ai lo’u faatuatua. O lea teineitiiti o se faataitaiga o le faamoemoe.
Sa aoao mai Mamona e faapea “o fanau laiti ua ola ia Keriso”1 ma e le manaomia ona salamo.
Pe tusa o le seneturi talu ai, sa galulue ai ni faifeautalai se toalua i atumauga o le itusasae o le Iunaite Setete. O se tasi aso, mai se tumutumu mauga, sa la vaaia ai ni tagata o potopoto i se nofoaga taalaelae e mamao lava i lālō. Sa le i toatele ni tagata na masani ona aoaoina e faifeautalai, o lea na la o atu ai loa i le nofoaga taalaelae lea.
Sa malemo se tamaitiiti, ma e ao ona fai se sauniga o le maliu. Sa aami e matua le faifeau e “lauga” i le falelauasiga o le la tama. Sa tuumuli ia faifeautalai i tua a o faasaga atu le faifeau sa aami i le tama ma le tina faavauvau ma amata lana lauga. Afai sa faamoemoeina e matua ia maua se faamafanafanaga mai lenei faifeau, o le a le fiafia lava i la’ua.
Sa ia matua otegiaina lava i laua mo le le papatisoina o le la tama. Sa la tolopoina ona o nisi mea, ma o lea la ua tuai. Sa ia ta’u manino atu ia i laua ua alu atu nei le la tama i seoli. O lo la faatamala. E ao ona tuua’ia i laua mo le faanoanoa e le gata o lo la atalii.
Ina ua uma le lauga ma ufitai foi le tuugamau, sa faalatalata atu ia faifeautalai i matua faavauvau. “O i ma’ua o auauna a le Alii,” sa la ta’u atu ai i le tina, “ma ua ma o mai ma se savali mo oulua.” A o faafofoga atu ia matua sa tagitu’i, sa faitau atu e faifeautalai e toalua ni faaaliga ma tuu atu a la molimau i le toefuataiga mai o ki mo le togiolaina uma o ē ola ma ē oti.
E i ai sina ou tigaalofa mo lena faifeau. Sa ia faia le mea sili na te mafaia faatasi ma lena malamalama ma le iloa e pei ona ia te ia. Ae e tele atu mea sa tatau ona mafai ona ia tuuina atu. O loo i ai le atoaga o le talalelei.
Sa oo mai ia feaifeautalai o ni ē faamafanafana, o ni faiaoga, o ni auauna a le Alii, o ni faifeau ua faamaonia o le talalelei a Iesu Keriso.
O nei tamaiti ou te tautala atu ai ua fai ma sui o fanau uma a lo tatou Tama Faalelagi. “O le fanau o le tofi lea mai ia Ieova: ma … amuia le tagata ua tumu ai lana utu.”2
O le foafoaga o le ola o se tiutetauave sili lea mo se ulugalii faaipoipo. O le luitau lea o le olaga faaletino, ia avea ma se matua agavaa ma tauaveina le tiute. E le mafai e se alii po o se tamaitai ona tausia na o ia se fanau. E faamoemoe ia toalua matua o fanau—o se tama ma se tina. E leai lava se isi mamanu po o se faagasologa e mafai ona suitulaga i lenei tiutetauave.
I se taimi ua leva atu sa faamatala mai ai e se tamaitai ia te au ma le tagi a o a’oga i le kolisi, ma sa ia faia ai se mea sese matuia ma lana uo tama. Sa faatulaga e le uo tama e faapa’ū le la pepe. Sa oo mai le taimi na la faauu ai ma faaipoipo ma maua isi fanau e toatele. Sa ia ta’u mai ia te au lona mafatia tele o i ai i le vaavaai atu lea i lona aiga, lana fanau aulelei, ma vaaia i lona mafaufau le nofoaga ua avanoa nei, ua misi ai lena tamaitiiti.
Afai e malamalama lenei ulugalii ma faaaoga le Togiola, o le a la iloa o na aafiaga ma le tiga e fesootai ma i la’ua e mafai ona titinaese. E leai se tiga e tumau e faavavau. E le faigofie, ae e le i faapea sa fuafua le olaga ina ia faigofie pe lē faaitu’au. O le salamo ma le faamoemoe tumau lea e aumai e le faamagaloga o le a tauia ai pea ia taumafaiga.
Sa faamatala mai e se isi ulugalii talavou ia te au sa la faatoa o mai mai le fomai lea sa ta’u atu ai ia te i la’ua o le a le mafai ona maua sa laua lava fanau. Sa matua nutimomoia o la loto i le tala. Sa faateia i laua ina ua ou ta’u atu i ai e fai lava si faamanuiaina o i laua. Sa la manatu pe o le a le mea ua ou fai atu ai sea tala. Sa ou tau atu ia i laua ua sili naua lo la tulaga nai lo isi ulugalii o e mafai ona avea ma matua ae ua latou teena ma aloese ma le manatu faapito mai lena tiutetauave.
Sa ou fai ia i la’ua, “O le mea sili lua te mananao i ni fanau, ma o le a faalagolago tele lena manao i o oulua olaga i le lalolagi ma ona talaatu, aua o le a maua ai le tulaga mautu faaleagaga ma lagona. I le i’uga, o le a sili atu oulua aua sa oulua mananao i ni fanau ae sa le mafai ona oulua maua, pe a faatusatusa atu ia i latou sa mafai, ae mumusu e fai ni fanau.”
O loo i ai pea isi e le o faaipoipo lava ma o lea ua leai ai ni fanau. O nisi, ona o tulaga e le oo i ai lo latou malosi, o loo tausia ni fanau o ni tina nofotoatasi po o ni tama nofotoatasi. O tulaga le tumau ia. I le tulaga faavavau o mea—e le o taimi uma i le olaga faaletino—o le a faataunuuina ai ia manaoga ma moomooga amiotonu.
“Afai e gata i lenei olaga mea tatou te faamoemoe i ai ia Keriso, ua sili lo tatou malaia i tagata uma lava.”3
O le taunuuga silisili o gaoioiga uma i le Ekalesia o le vaaia lea o se tane ma lana ava ma le la fanau o fiafia i le aiga, ua puipuia e mataupu faavae ma tulafono o le talalelei, faamau ma le saogalemu i feagaiga o le perisitua e faavavau. E tatau ona malamalama ia tane ma ava o lo latou valaauga muamua lava—lea e le mafai lava ona faamaloloina mai ai i latou—o le tiute lea i le tasi ma le isi ma i a latou fanau.
O se tasi o mea sili ua mauaina o le tulaga faamātua o lo tatou aoaoina sili lea o mea e taua moni lava mai i a tatou fanau nai lo mea na tatou aoaoina mai i o tatou matua. Ua tatou iloaina le upumoni i le valoaga a Isaia faapea “e taitaiina foi i latou e le tama itiiti.”4
I Ierusalema, “Ona valaau atu ai lea o Iesu i le tama itiiti, ua faatu ia te ia i o latou luma,
“Ua faapea atu, E moni, ou te fai atu ia te outou, a le liua outou, ma avea ia pei o tama iti, tou te le sao lava i le malo o le lagi.
“O lenei o sē faamaulalo o ia ia te ia e pei o le tama itiiti nei, e sili lea i le malo o le lagi.”5
“A ua fetalai atu Iesu, Ina tuu mai ia o tama iti e o mai ia te au, aua le vaoia i latou, aua e faapei o i latou nei o e o i le malo o le lagi.
“Ua faaee ona aao ia te i latou, ona maliu ese ai lea o ia i lea mea.”6
Tatou te faitau i le Tusi a Mamona e uiga i le asiasiga a Iesu Keriso i le Lalolagi Fou. Sa Ia faamalolo ma faamanuia i tagata ma poloaiina ina ia aumai fanau iti ia te Ia.
Sa faamaumauina e Mamona, “Na latou aumai a latou fanau laiti ma ua faanonofo i latou i lalo i luga o le eleele faataamilo ia te ia, ma sa tu Iesu i le totonugalemu; ma sa soso ese le motu o tagata seia oo ina aumai i latou uma ia te ia.”7
Ona Ia poloaiina lea o tagata ina ia tootutuli. Faatasi ma tamaiti na siomia o Ia, na tootuli le Faaola ma tuu atu se tatalo i lo tatou Tama i le Lagi. Ina ua uma le tatalo, na tutulu le Faaola, “ma sa ia ave a latou fanau laiti, taitoatasi, ma faamanuia i latou, ma tatalo atu i le Tama mo i latou.
“Ma ina ua uma ona ia faia o lenei mea sa toe tutulu o ia.”8
E mafai ona ou malamalama i lagona na faaalia e le Faaola i tamaiti. O loo tele se mea e ao ona aoaoina mai le mulimuli i Lana faataitaiga i le saili atu e tatalo, faamanuia, ma aoao “ia tamaiti laiti.”9
O au sa lona 10 i se aiga e 11 tamaiti. E pei ona ou iloaina, e le i auauna atu lo’u tama po o lo’u tina i se valaauga maualuga i le Ekalesia.
Sa auauna atu ma le faamaoni o matou matua i lo la valaauga sili ona taua—o ni matua. Sa taitaia e lo matou tama lo matou aiga i le amiotonu, e aunoa ma le ita po o le fefe. Ma o le faataitaiga mamana a lo matou tama sa faalauteleina e le faufautua mālū a lo matou tina. O le talalelei o se uunaiga mamana i le olaga o i matou uma i le aiga o le au Packer ma i le isi tupulaga e sosoo ai ma le isi tupulaga ma le isi, e pei lava ona matou iloaina.
Ou te faamoemoe ina ia faamasinoina au o se alii lelei e pei o lo’u tama. Ae ou te lei faalogoina na upu “le [auauna] lelei e” mai lo’u Tama Faalelagi, ou te faamoemoe ia muamua ona ou faalogoina mai lo’u tama faalelalolagi.
E tele lava taimi ou te le mautonu ai pe aisea na valaauina ai au o se Aposetolo ma sosoo ai ona avea o se Peresitene o le Korama a le Toasefululua e ui ou te sau mai se aiga sa ono mafai ona ta’ua e lē i toaaga i le lotu. E le na o au le tagata o le Toasefululua ua fetaui i ai lena faamatalaga.
Ma le mea mulimuli, e mafai ona ou iloaina ma malamalama atonu sa mafua ona o lena tulaga na valaauina ai au. Ma e mafai ona ou malamalama i le mafuaaga i mea uma tatou te faia i le Ekalesia, e manaomia ona tatou saunia le ala i le avea ai ma taitai mo matua ma fanau ina ia maua se taimi e faatasitasi ai o ni aiga. E tatau ona faaeteete ia taitai perisitua ina ia avea le Ekalesia ma faamanuiaga o le aiga.
O loo tele mea e uiga i le ola ai i le talalelei a Iesu Keriso e le o mafai ona fuaina e lena mea, ia e faitauina pe lisiina i faamaumauga o le auai. Ua tatou faapisiina i tatou lava i le fauga o fale ma paketi ma polokalama ma faiga faatulagaina. I le faia o ia mea, e mafai ai ona laaloa la tatou vaai i le agaga moni o le talalelei a Iesu Keriso.
E tele lava ina sau se tagata ma faapea mai ia te au, “Peresitene Packer, pe le manaia pe afai e … ?”
E masani lava ona ou taofia i latou ma fai atu, leai, ona ou te masalo o le mea e mulimuli mai o se gaoioiga fou po o se polokalama lea o le a faaopoopo ai se avega o taimi ma mea tautupe i le aiga.
O taimi faaleaiga o taimi paia ia ma e tatau ona puipuia ma faamamaluina. Matou te uunaia o tatou tagata ia faaali atu le tuuto i o latou aiga.
Ina ua faatoa ma faaipoipo, sa ma filifili ma lo’u toalua o le a ma taliaina le fanau o le a fananau mai ia i ma’ua atoa ai ma le tiutetauave e o mai faatasi ma lo latou fananau mai ma le tuputupu ae. Sa oo mai foi le taimi, sa fai ai o latou lava aiga.
E faalua i talu ona ma faaipoipo, i le taimi o le fananau mai o le ma fanau tama laiti, sa faapea mai ai le fomai ia i ma’ua, “Ou te manatu o le a le ola le tasi lea.”
I taimi uma ia e lua na mafua ai ona ma tali atu o le a ma tuu atua o maua ola pe afai e mafai ona ola lo ma atalii laitiiti. I le ala o lena ofo, na manino ai ia i maua o lenei lava tuuto e tasi e talitutusa ma le mea o lagonaina e lo tatou Tama Faalelagi e uiga ia i tatou taitoatasi. Oka se manatu ina a faalelagi.
I le taimi nei i le pulapula lagoto o lo ma olaga, ua ma malamalama ai ma Sister Packer ma molimauina e mafai ona faavavau o tatou aiga. A tatou usitai i poloaiga ma ola atoatoa i le talalelei, o le a puipuia ma faamanuiaina i tatou. I le popole ai mo le ma fanau ma fanau a fanau ma fanau a fanau a fanau, o le ma tatalo ia maua e aiga taitasi uma o lo matou aiga uluola lea lava tuuto e tasi i na tamaiti laiti faapelepele.
Tina ma tama, o le isi taimi e te sapaia ai se tamaitiiti fou faatoa fanau mai i ou lima, e mafai ona e mauaina se vaaiga faaleagaga o mealilo ma le faamoemoega o le olaga. O le a e malamalama atili pe aisea ua i ai le Ekalesia e pei ona i ai, ma pe aisea ua avea ai le aiga ma faalapotopotoga faavae i le olaga nei ma le faavavau. Ou te molimau atu e moni le talalelei a Iesu Keriso, o le fuafuaga o le togiola, lea na ta’ua o le ata o le fiafia, o se fuafuaga mo aiga. Ou te tatalo i le Alii, ia faamanuiaina aiga o le Ekalesia, o matua ma fanau, ma ia taavale atu i luma lenei galuega e pei ona faamoemoeina ai e le Tama. Ou te tuuina atu ai lenei molimau, i le suafa o Iesu Keriso, amene.