Chelecha el Deluueta el mo Kldibel
Mla er a President Thomas S. Monson
A Demad er a Bebeluades a melatk er a dersta er kid e medengei a usbechelled. Mei e bo de mui er a Chedaol Reng er Ngii sel dorrenges aike el mo medung er tia el ongdibel.
Betik er a renguk el odam me a odos er ngak, chelechal de merma kldibel er tia el klou el ongdibel er a Ikelesia, e ak mengemedaol er kemiu e ochotii a beltkil a renguk le ko er kemiu. Kid a kebetech er a bek el elolem el buil el mo melisiich er a ta me a tang, e oudkeu, mengelim, e melisiich a klaumer er kid. Kid a mer tia el me mesuub. Bebil er kemiu a osiik a nger el kirel ker me a aikel tekoi el kau a chemau er a klengar er kau. A rebebil a chemau a ringel er a klengit el reng. A dertsa er kemiu a sebechel ngmai a llomes e mosebechakl e mechelaod sel bo molchesuar a Chedaol Reng er a Rubak.
A le ngar er ngii a kiriu el melodech er a klengar kmeiu, e bo el ngar er ngii er a rengmiu a blak el reng elmo ngmodech sel morenges aikal tekoi el mo medung. Mei me a dersta er kid bo doltirakl aikal tekoi er a klengar er kid me bo el sebeched el mo klikiid el sechal me a redil el ngelekel a Demad er a Babeluades. Bo dolemolm el lomtok er a mekngit sel de betik er ngii er a ngii dil ker.
Kid a ngeltengat el mlei er tial beluulechad er a chelechal taem—el meang el taem er a reksi er a beluulechad. Kid a diak el sebeched el dmak rokui el ngara eungel a chimol chadou, e ng di ng mla mo sebeched el lorenges er a ongdibel lokiu a tibi, rasio, cable, satellite transmission, me a Iternet —me a dirrek aike el mobile services. Kid a mo kldibel el chimo el chad, el mengedecheduch a kakerous el tekoi, e kiei a kakerous el beluu, e ng di ke dechad er a chimo el klaumerang me a chimo el osisechakl me a chimo el moktek.
Me ngulemuchel el kekerei er a 182 el rak er a memong, e ng di a beluulechad el rokir a mla mo medengelkid. Tia ell ungil omeruul el doruul er ngii a mo melemolm el ngar er ngii, el mo melodech e omekngeltengat a klengar. Ng diak a ngii dil uchul, diak a ngii dil klisiich er tial beluulechad el sebechel tomer er a urelel a Dios. Me a ngii dil ngera el mei, e ng di tia el ureor a di melemolem el bedul uchei. Kom locha dobedebek a tekingel a Prophet Joseph Smith: “Ng diak a diak el klikiid el chim el mo tomer er tia el ureor; a odechelakl a mo er ngii, a re mekngit el chad a mo dmak, a resoldau mo kldibel, a teloched el chais oberk, e ng di tia el klemerang er a Dios a di melemolm el meleketek, e mesisiich, e mimokl, el di mereko loberk er a bel el merkelel a beluulechad, bek el basio,rokui el beluu, me a bek el beluu, e le morenges er a bek el ding, el di mereko le mekedmokl a moktek er a Dios, e a Ngarbab el Jehovah a kmo a ureor a merekong.”1
Ng kmal betok a meringel me a olasm er tia el beluulechad er a chelechang, e rodam me a odos er ngak, e ng di dirrek el betok a ungil . Di ua sel ngara teruich me a edei el tebechelel a klaumernag , “Alsekum ngar ngii a kldung, me a klamiokel me a llechub e ng ungil tekoi me a llechub e ng odengesall, e a aikaikid el tekoi a ki mosiik.” Mei e bo dolemolem el meruul aikang.
A kuureng a suliu er a klaumerang er kemiu me a blak el reng er kemiu el kirel evangkelio. A kuureng a suliu er a beltkil a rengmiu me a ngelsungemiu el mo er a ta me a tang. A kuureng a suliu e ra ureriu el mo er a ward me a branch me a stake me a district. Aika el ureriu a uchul me a Rubak a sebechel remuul a betok el moktek er Ngii er tia el beluulechad.
A kuureng a suliu er a ungil blekerdeliu el mer ngak er a ngii dil ker el kbor ngii. A kuureng a suliu er a nglunguchiu el mer ngak. Ak mla omelchesiu aika el nglunguuch e kmal oureng a saul el kirel.
Chelechang, odam me a odos er ngak, kid a mlei el mo mesuub e mosisechakl. Betok el klumech a mo medung er a ikal erul klebesei. A kuuchais er kemiu el kmo tirka el sechal me a redil el mo mengedecheduch a ulsiik a ngeso er a babeluades se er a longedmokl aika el cheldechederir. Tir a ultuil er a chedaol tekoi el kirel aike el bo louchais el me er kid.
A Demad er a Babeluades a melatk el kirel a dersta a er kid e medengei a usbechelled. Mei e bo de mui er a Chedaol Reng er Ngii sel dorrenges aike el mo medung er tia el ongdibel. Tia a klemerang el nglunguchek el ngara chedaol ngklel a Rubak e Osobeled, el Jesus Kristo, amen.